ސްޕެއިންގެ ބާސެލޯނާގައި މިހާރު ކުރިއަށްދާ މޯބައިލް ވޯލްޑް ކޮންގްރެސް (އެމްޑަބްލިއުސީ) 2026 ގައި، ދުނިޔޭގެ އެންމެ މޮޅު ފޯނުގެ ލަގަބު ނުވަތަ 'ބެސްޓް އިން ޝޯ' އެވޯޑް ސެމްސަންގްގެ އެންމެ ފަހުގެ ފޯނު 'ގެލެކްސީ އެސް26 އަލްޓްރާ' ކާމިޔާބުކޮށްފިއެވެ.
މި އެވޯޑަކީ ޖީ.އެސް.އެމް.އޭ އިން އިންތިޒާމުކުރާ އަހަރީ ގްލޯބަލް މޯބައިލް އެވޯޑްސްގެ ދަށުން ދެވޭ އެންމެ ޝަރަފުވެރި އެވޯޑެވެ. މި މައުރަޒުގައި ބައިވެރިކުރާ ގިނަ އުފެއްދުންތަކުގެ ތެރެއިން އެންމެ އީޖާދީ އުފެއްދުން ހޮވަނީ ދުނިޔޭގެ ފުންނާބު އުސް އެނަލިސްޓުންނާއި، ނޫސްވެރިން އަދި އިންފްލުއެންސަރުން ހިމެނޭ ޚާއްޞަ ފަނޑިޔާރުންގެ ޕެނަލަކުންނެވެ.
މިދިޔަ ފެބްރުއަރީ މަހުގެ 26 ވަނަ ދުވަހު ބާޒާރަށް ނެރުނު ގެލެކްސީ އެސް26 އަލްޓްރާއަށް މި އެވޯޑް ލިބުނު މައިގަނޑު ސަބަބަކީ، އޭގައި ހިމެނޭ ވަރުގަދަ ހާޑްވެއާ އާއި 'ވަން ޔޫ.އައި 8.5' ސޮފްޓްވެއާ ގުޅުވާލައިގެން އާޓިފިޝަލް އިންޓެލިޖެންސް (އޭއައި) އާއި ޕްރައިވެސީގެ ރަނގަޅު ޚިދުމަތްތަކެއް ފޯރުކޮށްދޭތީއެވެ.
ސެމްސަންގް އިލެކްޓްރޯނިކްސްގެ ގެލެކްސީ އެސް 26 އަލްޓްރާ އެމްޑަބްލިއުސީ 2026 ގައި ދައްކާލުން ---
މި ފޯނުގައި ބޭނުންކޮށްފައިވަނީ މޯބައިލް އޭއައި ތަޖުރިބާތައް ހަލުވިކޮށްދިނުމަށް ޚާއްޞަކޮށް ފަރުމާކޮށްފައިވާ ސެމްސަންގްގެ އަމިއްލަ ޗިޕްސެޓެކެވެ.
މީގެ އިތުރުން، މި ފޯނަކީ ސްކްރީނުގެ ސާފުކަމަށް ބަދަލެއް ނުގެނެސް، ބޭނުންކުރާ މީހާގެ ޒާތީ މައުލޫމާތު ރައްކާތެރިކޮށްދޭ 'ޕްރައިވެސީ ޑިސްޕްލޭ' ޓެކްނޮލޮޖީ ހިމެނޭ ދުނިޔޭގެ ފުރަތަމަ ފޯނެވެ.
މި ކާމިޔާބީއާ ގުޅޭގޮތުން ސެމްސަންގްގެ މޯބައިލް އެކްސްޕީރިއަންސް (އެމްއެކްސް) ބިޒްނަސްގެ މާކެޓިން ހެޑް، ޗޯއީ ސުންގް-އުން ވިދާޅުވީ، ގެލެކްސީ އެސް26 އަލްޓްރާއަކީ ސެމްސަންގްގެ ހުރިހާ ގާބިލުކަމެއް އެކުލެވޭ 'އެޖެންޓިކް އޭއައި' ފޯނެއް ކަމަށެވެ. އަދި ކުރިއަށް އޮތް ތަނުގައިވެސް ޓެކްނޮލޮޖީގެ ރޮނގުން އާ އުސްމިންތަކަކަށް ވާސިލުވުމަށް މަސައްކަތް ކުރާނެ ކަމަށް އޭނާ ވިދާޅުވިއެވެ.
ފާހަގަކޮށްލެވޭ ގޮތުގައި، ސެމްސަންގްގެ 'އަލްޓްރާ' ސީރީޒްއަކީ މޯބައިލް ފޯނުގެ ބާޒާރުގައި އަބަދުވެސް އެންމެ ކުރިއަރާފައިވާ ޓެކްނޮލޮޖީއާއި، އެންމެ މަތީ ފެންވަރުގެ ކެމެރާ އަދި ޕާފޯމަންސް ދައްކުވައިދޭ ފޯނުތަކެކެވެ.
މީގެ ކުރިން 2024 ވަނަ އަހަރު ނެރުނު ގެލެކްސީ އެސް24 ސީރީޒްއާ އެކު ސެމްސަންގުން ވަނީ 'ގެލެކްސީ އޭއައި' ތައާރަފުކޮށް، ސްމާޓްފޯނުތަކުގެ ދައުރު އާޓިފިޝަލް އިންޓެލިޖެންސްގެ މިސްރާބަށް ބަދަލުކޮށްލާފައެވެ.
އެމްޑަބްލިއުސީގައި ސެމްސަންގުން ހޯދި މި ކާމިޔާބީއަކީ، ވާދަވެރި އެޕަލް އަދި ޗައިނާގެ ފޯނު އުފައްދާ ކުންފުނިތަކާ ދެކޮޅަށް މާކެޓުގައި ސެމްސަންގްގެ މަގާމު ވަރުގަދަވެގެންދާނެ މުހިންމު ކުރިއެރުމެއްގެ ގޮތުގައި މާހިރުން ސިފަކުރެއެވެ.
މޯބައިލް ވޯލްޑް ކޮންގްރެސް (އެމްޑަބްލިއުސީ) އަކީ ކޮންމެ އަހަރަކު ދުނިޔޭގެ އެންމެ ބޮޑެތި ޓެކް ކުންފުނިތަކުން އެމީހުންގެ އާ އުފެއްދުންތައް ދައްކާލާ އެންމެ ބޮޑު އެއް މައުރަޒެވެ.