އިސްރާއީލާއި އެމެރިކާ ގުޅިގެން އީރާނާ ދެކޮޅަށް ކުރަމުންދާ ހަނގުރާމައިގެ ސަބަބުން، ދުނިޔޭގެ ސެމީކޮންޑަކްޓާ ނުވަތަ ޗިޕް އުފެއްދުމަށް ބޭނުންވާ މުހިންމު ސާމާނު ލިބުމަށް ބޮޑެތި ހުރަސްތަކެއް ކުރިމަތިވެދާނެ ކަމަށް ދެކުނު ކޮރެއާއިން އިންޒާރު ދީފިއެވެ.
މިދިޔަ ހޮނިހިރު ދުވަހު އީރާނުގެ ރޫހީ ލީޑަރު އާޔަތުﷲ އަލީ ޚާމަނާއީ އަވަހާރަކޮށްލުމާ ގުޅިގެން، އީރާނުން އިސްރާއީލަށް ވަރުގަދަ މިސައިލް ހަމަލާތަކެއް ދީފައިވާއިރު، މި ހަމަނުޖެހުންތަކުގެ ސަބަބުން ދުނިޔޭގެ އިގްތިސާދަށް ބޮޑު ލޮޅުމެއް އަރާނެ ކަމަށް ތަޖުރިބާކާރުން ބުނެއެވެ.
ދެކުނު ކޮރެއާގެ ވެރިކަން ކުރާ ޕާޓީގެ މެންބަރެއް ކަމަށްވާ ކިމް ޔަންގް-ބޭ ވިދާޅުވީ، ދުނިޔޭގެ މެމޮރީ ޗިޕްގެ ތިންބައިކުޅަ ދެބައި އުފައްދާ ދެކުނު ކޮރެއާއަށް ބޭނުންވާ ބައެއް މުހިންމު ގޭސްތަކާއި މާއްދާތައް މެދުއިރުމަތިން ލިބުން ދަތިވެދާނެ ކަމުގެ ބިރު އެބައޮތް ކަމަށެވެ. މީގެ ތެރޭގައި ޗިޕް އުފެއްދުމުގައި ހޫނުމިން ކޮންޓްރޯލް ކުރުމަށް ބޭނުންކުރާ "ހީލިއަމް" އާއި "ބްރޯމިން" ހިމެނެއެވެ. ހީލިއަމް އަކީ ގަތަރު ފަދަ މަދު ގައުމުތަކަކުން އުފައްދާ މާއްދާއެކެވެ.
ދުނިޔޭގެ ޗިޕްގެ ބޮޑުބައެއް އުފައްދަނީ ދެކުނު ކޮރެއާ އަދި ޓައިވާނުގައި ----
މީގެ އިތުރުން، ހަކަތައިގެ އަގު އުފުލުމުގެ ސަބަބުން ސްމާޓްފޯނާއި، ލެޕްޓޮޕް އަދި ކާރު ފަދަ ތަކެތީގެ އަގު ބޮޑުވުމުގެ ފުރުސަތު އެބައޮތް ކަމަށް، ސެމްސަންގް ފަދަ ބޮޑެތި ކުންފުނިތަކާއެކު ބޭއްވި ބައްދަލުވުމަށްފަހު ކިމް ވިދާޅުވިއެވެ.
މި ހަނގުރާމައިގެ އަސަރު ކުރާނީ ހަމައެކަނި ޗިޕް އުފެއްދުމަކަށް ނޫނެވެ. ޔޫ.އޭ.އީ އާއި ބަހްރޭންގައި ހުރި އެމެޒޯންގެ ބައެއް ޑޭޓާ ސެންޓަރުތަކަށް ޑްރޯން ހަމަލާތަކެއް އަރައި ބޮޑެތި ގެއްލުންތަކެއް ވެފައިވާތީ، މައިކްރޯސޮފްޓް އަދި އެންވީޑިއާ ފަދަ ކުންފުނިތަކުން މެދުއިރުމަތީގައި އާޓިފިޝަލް އިންޓެލިޖެންސް (އޭއައި) ފުޅާކުރުމަށް ގެންގުޅޭ ރޭވުންތަކަށް ވެސް ވަނީ ހުރަސް އެޅިފައެވެ.
މިކަމާ ގުޅިގެން ޓައިވާނުގެ ޓީއެސްއެމްސީ އާއި އެހެނިހެން ބޮޑެތި ޗިޕް އުފައްދާ ކުންފުނިތަކުން ބުނެފައިވަނީ ހާލަތު ވަރަށް ގާތުން ބަލަމުންދާ ކަމަށެވެ. ނަމަވެސް ބައެއް ކުންފުނިތަކުން ބުނާ ގޮތުގައި ކުރިއަށް އޮތް ދުވަސްތަކަށް ބޭނުންވާ ވަރަށް މުދާ މިހާރު ވަނީ ރައްކާކުރެވިފައެވެ.
ސެމީކޮންޑަކްޓަރު ނުވަތަ ޗިޕް އުފެއްދުމަކީ ދުނިޔޭގެ ޓެކްނޮލޮޖީގެ މައިބަދައެވެ. ސްމާޓްފޯނުން ފެށިގެންގޮސް ޒަމާނީ ހަތިޔާރާއި އާޓިފިޝަލް އިންޓެލިޖެންސް (އޭއައި) ސިސްޓަމްތައް މަސައްކަތް ކުރަނީ މި ޗިޕްތަކުގެ އެހީގައެވެ.
ދުނިޔޭގެ ޗިޕްގެ ބޮޑުބައެއް ދެކުނު ކޮރެއާ އަދި ޓައިވާނުގައި އުފެއްދި ނަމަވެސް، މި ތަކެތި އުފެއްދުމަށް ބޭނުންވާ ހީލިއަމް ފަދަ މާއްދާތަކަށް މެދުއިރުމަތީގެ ގައުމުތަކަށް ބޮޑަށް ބަރޯސާވާންޖެހެއެވެ.
މީގެ ކުރިންވެސް ކޮވިޑް-19 އާއި ރަޝިޔާ-ޔޫކްރެއިން ހަނގުރާމައިގެ ސަބަބުން ސަޕްލައި ޗޭނަށް ބުރޫއަރައި، ދުނިޔޭގެ ބާޒާރުގައި އިލެކްޓްރޯނިކް ސާމާނާއި އުޅަނދުފަހަރުގެ އަގު އިންތިހާއަށް އުފުލިފައިވެއެވެ. އެހެންކަމުން، މެދުއިރުމަތީގެ ހަމަޖެހުން ގެއްލުމަކީ މުޅި ދުނިޔޭގެ ޓެކްނޮލޮޖީ ސިނާއަތަށް ކުރިމަތިވާނެ އެންމެ ބޮޑު އެއް ނުރައްކަލެވެ.