މޯލްޑިވިއަން މެޑިކަލް އެސޯސިއޭޝަން (އެމްއެމްއޭ)އިން ގޮވާލައިފައިވާ ގޮތަށް، ހަކުރު އެކުލެވޭ ބުއިންތަކުން ނަގާ ޓެކްސް ބޮޑުކޮށް، ގިނަ ދިވެހީންގެ ތެރޭގައި މަގުބޫލު ޝީޝާ މަނާކުރުމަށް މަޝްވަރާކުރަމުން އަންނަ ކަމަށް ހެލްތު މިނިސްޓަރު ޢަބްދުالله ނާޒިމް އިބްރާހީމް މިއަދު ވިދާޅުވެއްޖެއެވެ.
މި ސަރުކާރުން ދުންފަތާ ދެކޮޅަށް ކުރަމުންދާ މަސައްކަތްތަކުގެ ދަށުން 2024ގައި ވަނީ ވޭޕް މަނާކޮށް، ސިނގިރޭޓުން ނަގާ ޓެކްސް ބޮޑުކޮށްފައެވެ. އަދި 2007އިން ފެށިގެން އުފަންވެފައިވާ އަދި އެ ތާރީޚުގެ ފަހުން އުފަންވާ ހުރިހާ ކުދިންނަށް ދުންފަތް މަނާ ކުރުމުގެ ގާނޫނު މިދިޔަ ނޮވެންބަރު މަހު ވަނީ ތަންފީޒު ކުރަން ފަށައިފައެވެ.
އެ ފިޔަަވަޅުތަކަށް ތައުރީފުކޮށް، ދިވެހި ޑޮކްޓަރުން ހިމެނޭ ޖަމިއްޔާއިން މިދިޔަ އޮކްޓޫބަރު މަހު ނެރުނު ބަޔާނެއްގައި ވަނީ، ހަކުރު އެކުލެވޭ ބުއިންތަކާ ޕާމް އޮއިލްއާއި ޓްރާންސް ފެޓް ގިނައިން ހުންނަ ކާބޯތަކެއްޗާއި ޕްރޮސެސްކޮށްފައިވާ މަސް ފަދަ އުފެއްދުންތަކުން ނަގާ ޓެކްސް ބޮޑުކުރަން ގޮވާލައިފައެވެ. އަދި އެކި ފްލޭވާތަކުގެ ދުންފަތް އެކުލެވޭ ބާވަތްތަކާއި ޝީޝާ އެއްކޮށް މަނާކުރަން އެ ޖަމިއްޔާއިން ގޮވާލިއެވެ.
މިއަދު އޮތް ނޫސްވެރިންގެ ބައްދަލުވުމެއްގައި، މެޑިކަލް އެސޯސިއޭޝަންގެ ލަފަޔާ ގުޅޭ ގޮތުން ނާޒިމް ވިދާޅުވީ، އެފަދަ ބަދަލެއް ގެންނަން ޖެހޭނީ ވަކި ނިޒާމަކާއި އުސޫލެއްގެ ތެރެއިން ކަމަށެވެ. އެއީ ހަކުރު ފަދަ ތަކެއްޗަކީ ދިވެހީންގެ ދިރިއުޅުމުގެ ވައްޓަފާޅިއާ ވަރަށް ބޮޑަށް ގުޅިފައިވާ ތަކެތި ކަމަށްވުމުންކަން އޭނާ ފާހަގަކުރެއްވިއެވެ.
"މި ކަމުގެ އެންމެ މުހިންމު ކަމަކީ ޕަބްލިކް ހެލްތު ޕާސްޕެކްޓިވްއަކުން ރައްޔިތުންގެ އެވެއާނެސް އިތުރުކޮށް ހަރުފަތަކަށް ފަހު ހަރުފަތަކުން އެއަށް އަޅަން ޖެހޭ ފިޔަވަޅު އަޅަމުން ގެންދިޔުން،" ނާޒިމް ވިދާޅުވިއެވެ.
މިނިސްޓަރު ނާޒިމް: ޝީޝާ މަނާކޮށް، ހަކުރު އެކުލެވޭ ބުއިންތަކުން ޓެކްސް ބޮޑު ކުރަން މަޝްވަރާކުރާ ކަމަށް ވިދާޅުވި -- ފޮޓޯ/ ރައީސް އޮފީސް
އޭނާ ވިދާޅުވީ، ޝީޝާއާއި ހަކުރު އެކުލެވޭ ބުއިންތަކާ ގުޅޭ މަޝްވަރާތައް ސަރުކާރުން އެކި ފަންތީގައި ކުރަމުން އަންނަ ކަމަށެވެ. އަދި ކަމާ ގުޅޭ ބަދަލެއް ތަންފީޒު ކުރެވޭނީ އެންމެ މުހިންމު ހާލަތުގައި، އެންމެ މުހިންމު ދަނޑިވަޅެއް ބަލައިފައި ކަމަށް ނާޒިމް ވިދާޅުވިއެވެ.
"އެއީ ވަރަށް މަލްޓިސެކްޓޯރަލްކޮށް ނަގަން ޖެހޭ ޑިޒިޝަންއެއް، މަލްޓިސެކްޓޯރަލް ލެވެލްގައި މަޝްވަރާކުރެވި، އެއަށް ފިޔަވަޅު އެޅޭނެ ދުވަހެއް އެއީ އަޅުގަނޑުމެން އިންތިޒާރު ކުރާ ދުވަހެއް ހެލްތު ސެކްޓާއިން، ނަމަވެސް މީގެ އެންމެ މުހިންމު ކަމަކީ ރައްޔިތުންގެ ހޭލުންތެރިކަން،" އޭނާ ވިދާޅުވުއެވެ.
އެހެންވެ، ޝީޝާއާއި ހަކުރާ ގުޅޭ ގޮތުން ހޭލުންތެރި ކުރުމުގެ މަސައްކަތް މި އަހަރު އިސްކަން ދީގެން ކުރިއަށްގެންދާނެ ކަމަށް މިނިސްޓަރު ވިދާޅުވިއެވެ.
"އެހެންވީމަ މަލްޓިސެކްޓޯރަލްކޮށް މަޝްވަރާކުރެވި، މިކަމަށް އަޅުގަނޑުމެން ހައްލު ހޯދުމަށް މަސައްކަތް ކުރަމުންދާނެ ވާހަކަ ދަންނަވަން،" އޭނާ ވިދާޅުވިއެވެ.
ރާއްޖޭގައި ޒުވާނުން ހިމެނޭ ގޮތަށް، ދުންފަތުގެ ބާވަތްތަކާއި ޝީޝާ ބޭނުންކުރުން ވެސް ވަރަށް އާންމެވެ.
މެޑިކަލް އެސޯސިއޭޝަނުން ވަނީ، އެ ޖަމިއްޔާއިން ގޮވާލައިފައިވާ ބަދަލުތައް ގެނައުމުން، ގައިންގަޔަށް ނާރާ ބަލިތަކާއި ދުންފަތުގެ އިސްތިއުމާލުކުރުމާ ގުޅުންހުރި ބަލިތަކުން ރައްކާތެރިވެ، ދުޅަހެޔޮ ގައުމަކަށް ވުމަށް މަގުފަހިވާނެ ކަމަށް ބުނެފައެވެ.