އީރާނުގެ ރޫޙީ ލީޑަރު އަޔަތުއްﷲ ޢަލީ ޚާމަނާއީ އަނިޔާވެރިކޮށް އަވަހާރަކޮށްލުމުން، އެކަމުގެ ހިތާމައިގައި ދިވެހީންގެ ދިދަ ބައިދަނޑިއަށް ތިރިނުކުރަނީ ކީއްވެތޯ, މޯލްޑިވްސް ޑިވެލޮޕްމަންޓް އެލަޔަންސް (އެމްޑީއޭ)ގެ ފަރާތުން މާލޭގެ މޭޔަރުކަމަށް ވާދަކުރައްވާ ޢަބްދުالله މަޙްޒޫމް މާޖިދު ސުވާލު އުފައްދަވައިފިއެވެ.
އިސްރާއީލާއި އެމެރިކާއިން ގުޅިގެން ދިން ހަމަލާތަކެއްގައި ޚާމަނާއި އަވަހާރަކޮށްލީ މިދިޔަ ހޮނިހިރު ދުވަހެވެ.
އެ ހަމަލާތަކާ ގުޅިގެން ރާއްޖޭގެ ފޮރިން މިނިސްޓްރީން ނެރުނު ބަޔާނެއްގައި ވަނީ، ހުރިހާ ފަރާތަކުން ވެސް ދެމުން އަންނަ ހަމަލާތައް ކުށްވެރި ކުރާ ކަމަށާއި ސުލްހަވުމަށް ގޮވާލާ ކަމަށެވެ. އަދި ރައީސް ޑރ. މުހައްމަދު މުއިއްޒު މިއަދު ވަނީ، އަރަބި އިސްލާމީ ގައުމުތަކުގެ ވެރިންނާ ފޯނުން ގުޅުއްވައި، އެ ގައުމުތަކަށް ކުރިމަތިވެފައިވާ ނުރައްކަލުގެ މި ހާލަތުގައި ރާއްޖެ އޮތީ އެ ގައުމުތަކާ އެކުކަން ހާމަކުރައްވާނެ ކަމަށް ވިދާޅުވެފައެވެ.
ޚާމަނާއީ އަވަހާރަވުމާ ގުޅިގެން ސަރުކާރުން ހިތާމަފާޅު ނުކުރާތީ ކަންބޮޑުވުން ފާޅުކުރައްވައި، މަހްޒޫމް އެކްސްގައި ކުރެއްވި ޕޯސްޓެއްގައި ވަނީ، މީގެ ކުރިން ދިވެހި ސަރުކާރުން އަމަލުކޮށްފައިވާ ގޮތަށް އިޝާރާތް ކުރައްވައިފައެވެ. އެގޮތުން، ޚާއްޞަ ޝަޚުޞިއްޔަތުތަކުގެ އަވަހާރަވުމުން، އިޙްތިރާމް އަދާކުރުމުގެ ގޮތުން ޤައުމީ ދިދަ ބައިދަނޑިއަށް ތިރިކުރުމަކީ ރާއްޖޭގައި ޒަމާނުއްސުރެ އޮންނަ އާދައެއްކަން މަހްޒޫމް ފާހަގަކުރެއްވިއެވެ.
އެ ޕޯސްޓުގައި އޭނާ ވަނީ، 1981 ވަނަ އަހަރު އީރާނުގެ ރައީސާއި ބޮޑުވަޒީރު އަވަހާރަވުމުން ދިވެހި ދިދަ ބައިދަނޑިއަށް ތިރިކުރަން ނިންމި ނިންމުމުގެ ލިޔުމެއް ހިއްސާކުރައްވައިފައެވެ. އަދި، 2024 ވަނަ އަހަރު އީރާނުގެ ރައީސް އިބްރާހީމް ރައީސީ އަވަހާރަވުމާ ގުޅިގެންވެސް ރާއްޖޭގެ ދިދަ ބައިދަނޑިއަށް ތިރިކޮށްފައި ވާކަން މަހްޒޫމް ފާހަގަކުރެއްވިއެވެ.
ނަމަވެސް، މި ފަހަރު ތަފާތުވީ ކީއްވެގެންތޯ އޭނާ ވަނީ ސުވާލު އުފައްދަވައިފައެވެ. އޭނާ ވަނީ، އީރާނުގެ އެންމެ މަތީ ލީޑަރު އަނިޔާވެރިކޮށް އަވަހާރަކޮށްލުމާ ގުޅިގެން، އެ ހިތާމައިގައި ދިވެހީން ބައިވެރިނުވަނީ ކީއްވެގެންތޯ ސުވާލު އުފައްދަވައިފައެވެ.
މަހްޒޫމްގެ ޕޯސްޓާ ގުޅުވައި، ކުރީގެ ފޮރިން މިނިސްޓަރު ދުންޔާ މައުމޫން ވެސް ވަނީ ދިވެހީން އާންމުކޮށް އަމަލުކުރާ ގޮތް ބަދަލުވީ ކީއްވެތޯ ސުވާލު އުފައްދަވައިފައެވެ. އަދި ޚާމަނާއީ އަވަހާރަވުމާއި ގުޅިގެން ޚާރިޖީ ވުޒާރާއިން ނެރުނު ބަޔާނުގައި އެއްވެސް ބަރުދަނެއް ނެތް ކަމަށް ވެސް އޭނާ ސިފަކުރެއްވިއެވެ.
ދުންޔާގެ ޕޯސްޓުގައި ވަނީ އެމެރިކާއާއި އިޒްރޭލުން އީރާނާ ދެކޮޅަށް ހިންގަމުންދާ ޣައިރުޤާނޫނީ އުދުވާންތަކާ މެދު އޭނާ އިންތިހާއަށް ކަންބޮޑުވާކަމަށް ވިދާޅުވެފައެވެ. އީރާނުގެ ލީޑަރު އަވަހާރަކޮށްލުމާއި، ސްކޫލްތަކަށް ހަމަލާދިނުމާއި، އާންމު ރައްޔިތުން ޝަހީދުކުރުމުގެ ސަބަބުން ސަރަޙައްދީ ހަމަނުޖެހުންތައް އިތުރަށް ގޯސްވެ، މުޅި ދުނިޔެއަށް އޭގެ ނޭދެވޭ އަސަރު ފޯރާފައި ވާކަމަށް އޭނާ ވަނީ ވިދާޅުވެފައެވެ.