މާލެއާއި ސިނަމާލެ ބުރިޖުގައި މިދިޔަ ހަފުތާގައި 41 އެކްސިޑެންޓު ހިނގައި، 16 މީހުންނަށް އަނިޔާވި ކަމަށް ފުލުހުންގެ ތަފާސްހިސާބުތަކުން ދައްކައިފިއެވެ.
މާލެ ސަރަހައްދުގައި އެކްސިޑެންޓުތައް ހިނގުމަކީ، ވަރަށް އާންމު ކަމެކެވެ. އޭގެތެރޭގައި، ނުރައްކާތެރި އެކްސިޑެންޓުތައް ހިނގާ މިންވަރު ވެސް މަދެއް ނޫނެވެ.
ފުލުހުން މިއަދު އާންމުކުރި ހިސާބުތަކުން އެނގޭ ގޮތުގައި، މިދިޔަ ހަފުތާގައި އެކަނި 41 އެކްސިޑެންޓު ވަނީ ހިނގާފައެވެ. މި އެކްސިޑެންޓުތަކުގައި 16 މީހުންނަށް އަނިޔާވެފައިވާއިރު، 51 ވެހިކަލަކަށް ވަނީ ގެއްލުންތައް ލިބިފައެވެ.
ހިސާބުތަކުން އެނގޭ ގޮތުގައި، ކުދި 38 އެކްސިޑެންޓެއް މިދިޔަ ހަފުތާގައި ހިނގާފައިވާއިރު، މީހަކު މަރުވި އެކްސިޑެންޓެއް ވެސް ހިނގާފައިވެއެވެ. އެއީ، މިދިޔަ ބުދަ ދުވަހުގެ ރޭ ދަންވަރު ބާރު ސްޕީޑުގައި ސައިކަލު ދުއްވާފައި ދަނިކޮށް، ކޮންޓްރޯލްނުވެ, ހިނގި އެކްސިޑެންޓްގައި އެ ސައިކަލުގެ ފަހަތުގައި އިން 16 އަހަރުގެ ކުޑަކުއްޖާ މަރުވި މައްސަލައެކެވެ.
ފުލުހުންގެ ހިސާބުތަކަށް ބަލާއިރު، އެންމެ ގިނަ އެކްސިޑެންޓުތައް ހިނގާފައި ވަނީ، މިދިޔަ ހަފުތާގެ ހޯމަ ދުވަހެވެ. އެ ދުވަހު އެކަނި ވެސް ނުވަ އެކްސިޑެންޓު ހިނގާފައިވެއެވެ. އަދި އެންމެ ގިނަ އެކްސިޑެންޓުތައް ހިނގާފައި ވަނީ، ދެ ސައިކަލު ޖެހިގެންނެވެ. އެ ބާވަތުގެ 15 އެކްސިޑެންޓެއް ހިނގާފައިވާއިރު، ސައިކަލަކާއި ކާރެއް ޖެހިގެން އަށް އެކްސިޑެންޓު ހިނގާފައިވެއެވެ.
ފާހަގަކުރެވޭ ގޮތުގައި، ބާރު ސުޕީޑުގައި ވެހިކަލް ދުއްވުމަކީ ރާއްޖޭގައި އާއްމުވެފައިވާ މައްސަލައެކެވެ. މިފަދަ އެކްސިޑެންޓްތަކުގައި އެތައް ބައެއްގެ ފުރާނަ ގެއްލިފައި އެބަހުއްޓެވެ. އޭގެ ތެރޭގައި ޒުވާނުން ގިނައެވެ.