އަންނަ އޭޕްރިލް މަހުގެ ހަތަރުވަނަ ދުވަހު އޮންނަ ލޯކަލް ކައުންސިލު އިންތިޚާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިޚާބުގައި ވާދަކުރުމަށް ހުޅުވާލި ފުރުސަތުގައި ރޭ އެގާރަ ޖެހުމާ ހަމައަށް 2,800 އަށް ވުރެ ގިނަ މީހުން ފޯމު ހުށަހަޅާފައިވާކަން އިލެކްޝަންސް ކޮމިޝަންގެ ތަފާސްހިސާބުތަކުން ދައްކައިފިއެވެ.
އެ ކޮމިޝަނުން މިއަދު އާއްމުކުރި ތަފާސްހިސާބުތަކުގައިވާ ގޮތުން ކައުންސިލަރުންގެ މަގާމަށް ވާދަކުރުމަށް 1،865 މީހަކު ފޯމު ހުށަހެޅިއެވެ. އަދި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ މެންބަރުންގެ މަގާމުތަކަށް 1،548 މީހަކު ކުރިމަތިލިއެވެ.
އެހެންކަމުން އެއީ ޖުމުލަ 3،413 ފޯމެވެ.
ކައުންސިލު އިންތިޚާބަށް ކުރިމަތިލީ މީހުންގެ ތެރެއިން ގިނަ ކެންޑިޑޭޓުން ކުރިމަތިލީ ސިޔާސީ ޕާޓީތަކުންނެވެ. އެގޮތުން ކައުންސިލަރުންގެ މަގާމަށް 1،366 މީހުން ސިޔާސީ ޕާޓީތަކުން ކުރިމަތިލިއިރު، އަމިއްލަގޮތުން ކުރިމަތިލީ 499 މީހުންނެވެ. އަދި އަންހެނުންގެ ކޮމިޓީތަކަށް ސިޔާސީ ޕާޓީތަކުން 1،216 މީހުން ކުރިމަތިލިއިރު، 332 މީހުން ކުރިމަތިލީ އަމިއްލަގޮތުންނެވެ.
ކޮމިޝަނުގެ ތަފާސްހިސާބުތަކުން އެނގޭ ގޮތުގައި، ކައުންސިލަރު ކަމަށް ކުރިމަތިލީ ކެންޑިޑޭޓުންގެ ތެރެއިން ގަބޫލުކުރީ 1،556 މީހުންގެ ފޯމެވެ. އެއީ ސިޔާސީ ޕާޓީތަކުން ކުރިމަތިލީ 1،197 މީހުންނާއި އަމިއްލަގޮތުން ކުރިމަތިލީ 359 މީހުންގެ ފޯމެވެ. އަދި ފޯމުތައް ގަބޫލުނުކުރާ 309 މީހުންގެ ތެރެއިން 286 މީހަކު އަލުން ފޯމު ހުށަހެޅި ކަމަށް، އެ ތަފާސްހިސާބުތަކުގައިވެއެވެ.
އަދި އަންހެނުންގެ ކޮމިޓީތަކަށް ކުރިމަތިލީ ކެންޑިޑޭޓުންގެ ތެރެއިން ގަބޫލުކުރީ 1،332 މީހުންގެ ފޯމެވެ. އެއީ ސިޔާސީ ޕާޓީތަކުން ކުރިމަތިލީ 1،091 މީހުންނާއި އަމިއްލަގޮތުން ކުރިމަތިލީ 241 މީހުންގެ ފޯމެވެ. އަދި ފޯމުތައް ގަބޫލުނުކުރާ 216 މީހުންގެ ތެރެއިން 192 މީހަކު ވަނީ އަލުން ފޯމު ހުށަހަޅައިފައެވެ.
ބައެއް ކެންޑިޑޭޓުންގެ ފޯމުތައް ގަބޫލުނުކުރާ ކަމަށް އިލެކްޝަންސް ކޮމިޝަނުން ފާހަގަކުރި ކަންކަމުގެ ތެރޭގައި ހިމެނެނީ ކުށާއި ދަރަނީގެ ރެކޯޑާއި އޭގެ ތަފުސީލު ހުށަހަޅާފައި ނެތުމާއި، ކަރެކްޝަންސް އިން ފުރިހަމަކުރަންޖެހޭ ކުށުގެ ރެކޯޑު ފުރިހަމަކޮށްފައި ނެތުމެވެ.
ފާހަގަކުރެވޭ ގޮތުގައި، އިންތިޚާބަށް ކުރިމަތިލާން ދީފައިވާ މުއްދަތު ކަމަށްވާ މި މަހުގެ 17އިން މާދަމާ މެންދުރުފަހު 3:30 ނިޔަލަށް ދީފައިވާ ފުރުސަތު މަދު ކަމަށާއި، އިދާރާތަކުން ކުށުގެ ރެކޯޑު ސާފުކުރުން ލަސްވާ ކަމުގެ ކަންބޮޑުވުން ފާޅުކޮށް، އިދިކޮޅު އެމްޑީޕީން ވަނީ އިންތިޚާބަށް ކުރިމަތިލާން އިތުރު ދިހަ ދުވަސް ދޭން އެދިފައެވެ.
އެކަމަކު އިލެކްޝަންސް ކޮމިޝަނުން ނިންމީ ބުރާސްފަތި ދުވަހުން ފެށިގެން މާދަމާގެ ނިޔަލަށް، ފޯމު ހުށަހަޅާ ގަޑި ހަވީރު 5:30 އަށް އިތުރުކުރުމަށެވެ.
އެމްޑީޕީގެ ކައުންސިލު އިންތިޚާބުގެ ކެމްޕެއިންގެ ތަރުޖަމާނު އަދި ދިއްދޫ ދާއިރާގެ ކުރީގެ މެންބަރު ޢަބްދުالله ވަޙީދު 'ސަން'އަށް ވިދާޅުވިގޮތުގައި މިވަގުތުވެސް އެ ޕާޓީގެ 50އަށް ވުރެ ގިނަ މެންބަރުންގެ ކުށުގެ ރެކޯޑު ސާފުނުކުރެވި، އިދާރާތަކުގައި ވެއެވެ.