ހިޔާ ޓަވަރު ފަހެއްގައި ހިނގި އަލިފާނުގެ ހާދިސާއާ ގުޅިގެން މިހާތަނަށް 85 މީހުންނަށް ވަގުތީ ބޯހިޔާވަހިކަން ފޯރުކޮށްދީފައިވާ ކަމަށް ނެޝަނަލް ޑިޒާސްޓާ މެނޭޖުމަންޓް އޮތޯރިޓީ (އެންޑީއެމްއޭ) އިން މިއަދު ބުނެފިއެވެ.
އެމްއެންޑީއެފުން މިއަދު ބުނީ، އެ ހާދިސާގެ މައުލޫމާތު އިއްޔެ 18:33 ހާއިރު ރިޕޯޓުކުރުމުން އެމްއެންޑީއެފް މާލެ އޭރިއާ ކޮމާންޑް، ހުޅުމާލޭ ފަޔާ ސްޓޭޝަނުން އެ ސަރަހައްދުގައި ހަރަކާތްތެރިވި ކަމަށެވެ.
އެ ހާދިސާ ހިނގީ، އެ ޓަވަރުގެ ނުވަ ވަނަ ފަންގިފިލާއާއި 14 ވަނަ ފަންގިފިލައާ ދެމެދުގެ ވައިގޮޅީގައި ހުރި އޭސީ އައުޓްޑޯއެއްގައި ކަމަށް އެމްއެންޑީއެފުން ބުންޏެވެ. އެހެންވެ، އެ ޓަވަރުގައި ހުންނަ ވައި ގޮޅީގައި ހުރި ފެން ހޮޅިތަކަށް ބޮޑެތި ގެއްލުންތަކެއް ލިބިފައިވާ ކަމަށް އެމްއެންޑީއެފުން ވަނީ ބުނެފައެވެ.
ހެނދުނު 09:19 ހާއިރު އެންޑީއެމްއޭއިން ބުނީ، އެހާތަނަށް ހަތް އެޕާޓުމަންޓަކުން 37 މީހުންނަށް ވަގުތީ ބޯހިޔާވަހިކަން ފޯރުކޮށްދީފައިވާ ކަމަށެވެ. އެއީ، ފަސް ދުވަހަށް ކަމަށް އެ އޮތޯރިޓީން އޭރު ވަނީ ބުނެފައެވެ.
އޭގެފަހުން 13:30ހާއިރު ކުރި ޕޯސްޓެއްގައި އެންޑީއެމްއޭއިން ބުނީ، މިހާތަނަށް 18 އެޕާޓުމަންޓުގައި ދިރިއުޅޭ 85 މީހުންނަށް ވަގުތީ ބޯހިޔާވަހިކަމާއި ކެއުމާއި ބުއިމަށް އެހީތެރިކަން ފޯރުކޮށްދީފައިވާ ކަމަށެވެ.
އޭގެއިތުރަށް، ފަސް ވަނަ ޓަވަރުގެ 38 އެޕާޓުމަންޓުގެ ނަރުދަމާ ހޮޅިތަކަށް ގެއްލުންތައް ލިބިފައިވާ ކަމަށް އެންޑީއެމްއޭއިން ވަނީ ބުނެފައެވެ. އެ ގެއްލުންތައް ދެނެގަނެ، މަރާމާތު ކުރުމުގެ މަސައްކަތް ކުރަމުން އަންނަނީ، ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)އިންނެވެ.
އޭގެއިތުރަށް، އެހީތެރިކަމެއް ބޭނުންވާނަމަ، އެންޑީއެމްއޭގެ އިމަޖެންސީ ނަމްބަރު 115އަށް ގުޅުމަށް އެ އޮތޯރިޓީން ވަނީ އެދިފައެވެ.
ބޮޑު އާބާދީއެއް އޮންނަ ހިޔާ ޓަވަރުތަކުގައި މީގެ ކުރިން ވެސް އަލިފާނުގެ ހާދިސާތައް ހިނގައި، ގެއްލުންތައް ވެފައި އެބަހުއްޓެވެ.