އިއްޔެ ހިޔާ ޓަވަރު ފަހެއްގައި ހިނގި އަލިފާނުގެ ހާދިސާއާ ގުޅިގެން 37 މީހުންނަށް ވަގުތީ ބޯހިޔާވަހިކަން ފޯރުކޮށްދީފައިވާ ކަމަށް ނެޝަނަލް ޑިޒާސްޓާ މެނޭޖުމަންޓް އޮތޯރިޓީ (އެންޑީއެމްއޭ)އިން މިއަދު ބުނެފިއެވެ.
'ސަން'އިން ސުވާލުކުރުމުން އެންޑީއެމްއޭގެ އޮފިޝަލަކު ވިދާޅުވީ، ހަތް އެޕާޓުމަންޓުގެ މީހުންނަށް ވަގުތީ ބޯހިޔާވަހިކަން ފޯރުކޮށްދިނީ ފަސް ދުވަހަށް ކަމަށެވެ. އެއީ، ގެއްލުންވި އެޕާޓުމަންޓުތައް މަރާމާތު ކުރުމަށް ދުވަސްކޮޅެއް ނަގާނެތީ ކަމަށް އެ މަސައްކަތް ކުރާ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)އާ ހަވާލާދީ، އޮފިޝަލު ވިދާޅުވިއެވެ.
އެންޑީއެމްއޭއިން އެކްސްގައި ކުރި ޕޯސްޓުގައި ވަނީ، އެ ހާދިސާއަށް ފަހު ނަރުދަމާއަށް ލިބުނު ގެއްލުން ދެނެގަނެ، މަރާމާތު ކުރުމުގެ މަސައްކަތް އެޗްޑީސީން ކުރަމުން އަންނަ ކަމަށެވެ. އިތުރަށް ބަލަން ޖެހޭ ކަންކަން އެ އޮތޯރިޓީއާއި އެޗްޑީސީން ބަލަމުން އަންނަކަން އެންޑީއެމްއޭއިން ފާހަގަކުރިއެވެ.
ހިޔާ ޓަވަރު ފަހެއްގައި އަލިފާނުގެ ހާދިސާއެއް ހިނގުން: އެ ހާދިސާއާ ގުޅިގެން 37 މީހުންނަށް ވަނީ ވަގުތީ ބޯހިޔާވަހިކަން ފޯރުކޮށްދީފައި --- ސަން ފޮޓޯ
އޭގެއިތުރަށް، އެހީތެރިކަމެއް ބޭނުންވާނަމަ، އެންޑީއެމްއޭގެ އިމަޖެންސީ ނަމްބަރު 115އަށް ގުޅުމަށް އެ އޮތޯރިޓީން ވަނީ އެދިފައެވެ.
''ސަން''އަށް މައުލޫމާތު ދެއްވަމުން އެންޑީއެމްއޭގެ ޗީފް އެގްޒެކެޓިވް ހިސާން ހަސަން ރޭ ވިދާޅުވީ އަލިފާނުގެ ހާދިސާ ހިނގީ އެ ޓަވަރުގެ ވައިގޮޅިއެއްގެ ތެރޭގައި ކަމަށެވެ. އެ ހާދިސާގައި އެއްވެސް އެޕާޓްމެންޓަކަށް މާބޮޑު ގެއްލުމެއް ލިބިފައި ނުވާކަމަށް އޭނާ ވިދާޅުވިއެވެ.
ހިސާން ވިދާޅުވީ، އަލިފާނުގެ ހާދިސާއާ ގުޅިގެން އެ ޓަވަރުގައި އަޅާފައިވާ މައި ފާޚާނާ ހޮޅިއަށް ގެއްލުންލިބި، ބައެއް އެޕާޓްމެންޓްތަކުގެ ފާޚާނާ މިހާރު ބޭނުންނުކުރެވޭ ކަމަށެވެ.
މިގޮތުން، އެ ގެއްލުންތައް ދެނެގަނެ، މަރާމާތު ކުރުމުގެ މަސައްކަތް ދިވެހި ސިފައިންނާއި ފުލުހުންނާއި، އެޗްޑީސީއާއި އެމްޑަބްލިއުއެސްސީ ގުޅިގެން ކުރަމުން އަންނަ ކަމަށް އޭނާ ވިދާޅުވިއެވެ.
އެ ހާދިސާއާ ގުޅޭ ގޮތުން އެމްއެންޑީއެފުން މިހާތަނަށް ބުނީ، ހިޔާ ޓަވަރު ފަހެއްގައި އަލިފާނުގެ ހާދިސާއެއް ހިނގުމާ ގުޅިގެން ފަޔާ އެންޑް ރެސްކިއު ސާވިސަސްއިން ހަރަކާތްތެރިވި ކަމަށެވެ. ނަމަވެސް ކަމާ ގުޅޭ އިތުރު މައުލޫމާތެއް ދީފައިނުވެއެވެ.
ބޮޑު އާބާދީއެއް އޮންނަ ހިޔާ ޓަވަރުތަކުގައި މީގެ ކުރިން ވެސް އަލިފާނުގެ ހާދިސާތައް ހިނގައި، ގެއްލުންތައް ވެފައި އެބަހުއްޓެވެ.