ހުޅުމާލޭ ދެވަނަ ފިޔަވަހީގައި، ހިޔާ ޓަވަރެއްގައި ރޯވެއްޖެއެވެ.
"ސަން"އަށް މައުލޫމާތު ލިބިފައިވާ ގޮތުގައި އަލިފާން ރޯވެފައި ވަނީ ހިޔާ ޓަވަރު ފަހެއްގެ 24 ވަނަ ފަންގިފިލާގެ އެޕާޓްމެންޓެއްގައެވެ. އެ ފަންގިފިލާއިން ކަޅު ދުން އަރަމުން އަންނައިރު، ތިރީ ފަންފިލާތަކަށް ވެސް ދުމުގެ ވަސް ފެތުރިފައިވާ ކަމަށް މައުލޫމާތު ލިބެއެވެ.
އެ ޓަވަރުގެ މަތީ ފަންގިފިލާތަކުގެ ބައެއް އެޕާޓްމެންޓުތަކުން މީހުން ތިރިއަށް ފައިބަމުން އަންނަ ކަމަށް ވެސް، އެ ސަރަހައްދުގައި ހުރި "ސަން"ގެ ނޫސްވެރިއަކު ވަނީ މައުލޫމާތު ދީފައެވެ.
އެ ހާދިސާއާ ގުޅޭ ގޮތުން އެމްއެންޑީއެފުން މިހާތަނަށް ބުނީ، ހިޔާ ޓަވަރު ފަހެއްގައި އަލިފާނުގެ ހާދިސާއެއް ހިނގުމާ ގުޅިގެން ފަޔާ އެންޑް ރެސްކިއު ސާވިސަސްއިން ހަރަކާތްތެރިވަމުން އަންނަ ކަމަށެވެ. ނަމަވެސް ކަމާ ގުޅޭ އިތުރު މައުލޫމާތެއް ދީފައިނުވެއެވެ.
ބޮޑު އާބާދީއެއް އޮންނަ ހިޔާ ޓަވަރުތަކުގައި މީގެ ކުރިން ވެސް އަލިފާނުގެ ހާދިސާތައް ހިނގައި، ގެއްލުންތައް ވެފައި އެބަހުއްޓެވެ.