މާލޭގައި ބޯކޮށާ ސެލޫނަކުން ވައްކަން ކުރަން އުޅުމުގެ ތުހުމަތުގައި ދިވެހި އަންހެނަކާއި ފިރިހެނަކު ހައްޔަރުކޮށް، ކްރިމިނަލް ކޯޓުން ބަންދު މުއްދަތު ޖަހައިފިއެވެ.
ކްރިމިނަލް ކޯޓުން އިއްޔެ، ވައްކަމާއި ހުއްދަ ނޫން ތަނަކަށް ވަންނަން އުޅުމުގެ ތުހުމަތުގައި ބަންދު މުއްދަތު ޖަހައިފައިވަނީ 43 އަހަރުގެ އަންހެނަކާއި 37 އަހަރުގެ ފިރިހެނެއްގެ މައްޗަށެވެ.
ބަންދު އަމުރުގައިވަނީ، އެ ދެ މީހުން ކުރި ކަމަށް ތުހުމަތު ކުރެވޭ ކުށް ކުރި ކަމަށް ކޮންމެވެސް ވަރަކަށް ބާރުދޭ މިންވަރެއްގެ ހެކި ހުށަހަޅައިފައިވާ ކަމަށެވެ. އެގޮތުން، އެ ދެ މީހުން، ސެލޫނެއްގެ ދޮރު މަތާލައިގެން ނުވަތަ ފޭކޮށްގެން ވައްކަން ކުރަން އުޅުނު ކަމަށް ތުހުމަތު ކުރެވޭ ކަމަށް އަމުރުގައިވެއެވެ.
އެ ދެ މީހުން ގެންގުޅުނު އުޅަނދެއް ފުލުހުންގެ ބެލުމުގެ ދަށަށް ގެންގޮސްފައިވާއިރު، އެ އުޅަނދުން، ދޮރު ހަލާކުކޮށްލަން ބެނުން ކުރި ކަމަށް ބެލެވޭ ފުށްކަށްޓެއް ފެނުނު ކަމަށް ކޯޓު އަމުރުގައިވެއެވެ.
އެހެންވެ، މުޖުތަމައުގެ ސަލާމަތާއި ރައްކާތެރިކަމަށް ޓަކައި އެ ދެ މީހުން ބަންދުކުރުމަށް ނިންމައި، ކްރިމިނަލް ކޯޓުން އިއްޔެ ވަނީ ދެ މީހުންގެ ބަންދަށް 15 ދުވަސް ޖަހައިފައެވެ.
ރާއްޖޭގައި ވައްކަންތައް އާންމުވެފައިވާއިރު، މި އަހަރުގެ މިހާތަނަށް ފުލުހުންނަށް އެންމެ ގިނައިން ހުށަހަޅައިފައިވަނީ ވެސް ވައްކަމުގެ މައްސަލަތަކެވެ. އެއީ 272 މައްސަލައެކެވެ. އަދި މިދިޔަ އަހަރު ފުލުހަށް 12,096 މައްސަލަ ހުށަހަޅައިފައިވާއިރު، އޭގެ ތެރޭގައި ވައްކަމުގެ 3,478 މައްސަލަ ހިމެނުނެވެ.