މި އަހަރު ރާއްޖޭގެ ހުރިހާ ރަށެއްގައި ލެބޯޓްރީ ގާއިމުކުރާނެކަން ސަރުކާރުން އިއުލާންކޮށްފައި ވަނިކޮށް، 60 ލެބް ޓެކްނީޝަނުން ހޯދަން ހެލްތު މިނިސްޓްރީން މިއަދު އިއުލާންކޮށްފިއެވެ.
ހެލްތު މިނިސްޓްރީން ކުރި އިއުލާނުގައި ވަނީ، އެ މިނިސްޓްރީގެ ދަށުން ހިންގާ ހޮސްޕިޓަލްތަކާއި ސިއްހީ މަރުކަޒުތަކުގައި މަސައްކަތް ކުރާނެ ލެބް ޓެކްނީޝަނުން ހޯދުމުގެ މަސައްކަތް ކުރަމުން އަންނަ ކަމަށެވެ.
ހެލްތު މިނިސްޓްރީން 60 ލެބް ޓެކްނީޝަނުން ހޯދަމުން އަންނައިރު، އަސާސީ މުސާރައަކީ 5،610 ރުފިޔާއެވެ. އަދި ސާވިސް އެލަވަންސްއަށް 2،500 ރުފިޔާ، އެކޮމޮޑޭޝަން އެލަވަންސަށް 3،000 ރުފިޔާއާއި ފުޑް އެލަވަންސަށް 1،800 ރުފިޔާ ކަނޑައަޅައިފައިވެއެވެ.
ލެބް ޓެކްނީޝަނަކަށް ކުރިމަތިލާ މީހުންގެ ހުންނަން ޖެހޭ އެންމެ ދަށް ޝަރުތުތަކުގެ ތެރޭގައި، ލެބް ޓެކްނޮލޮޖީން ޑިޕްލޮމާއެއް ހާސިލުކޮށްފައިވުމާއި އެ ދާއިރާއިން ދެ އަހަރުގެ ތަޖުރިބާ ހޯދައިފައިވުން ހިމެނެއެވެ.
ހެލްތު މިނިސްޓަރު އަބްދުﷲ ނާޒިމް އިބްރާހީމް: ހުރިހާ ރަށެއްގައި މި އަހަރު ލެބޯޓްރީ ގާއިމުކޮށް، އާންމު ޓެސްޓު ހެދޭ ގޮތް ހަދާނެ ކަމަށް ވިދާޅުވެފައިވޭ --- ފޮޓޯ/ ހެލްތު މިނިސްޓްރީ
މީގެ އިތުރުން، ޕާމަނަންސް ބޭސިކް ރެޖިސްޓްރޭޝަން ސެޓްފިކެޓެއް އޮންނަން ޖެހޭއިރު، މިނިސްޓްރީން ވަނީ، ވަޒީފާއަށް ނެގުމުގައި 45 އަހަރުން ދަށުގެ މީހުންނަށް އިސްކަންދޭނެކަން ފާހަގަކޮށްފައެވެ. އަދި ކަމާ ގުޅުންހުރި އިދާރާތަކުން ވެސް އެޕްލިކޭޝަން ހުށަހެޅޭނެ ކަމަށް ބުނެފައިވާއިރު، ކޮންމެ އޭޖެންސީއަކުން ހުށަހެޅޭނީ ފަސް އެޕްލިކޭޝަން ކަމަށް އިއުލާނުގައިވެއެވެ.
ލެބް ޓެކްނީޝަންގެ މަގާމަށް ކުރިމަތިލުމަށް ފުރުސަތު ހުޅުވާލައިފައިވަނީ އަންނަ އަންގާރަ ދުވަހުގެ ނިޔަލަށެވެ.
މިދިޔަ ހުކުރު ދުވަހު ހެލްތު މިނިސްޓަރު އަބްދުﷲ ނާޒިމް އިބްރާހިމްވަނީ، ސިއްހީ ނިޒާމުގައި ސަރުކާރުން އެންމެ އިސްކަންދެނީ އަތޮޅުތަކުގައި ޑައިގްނޯސްޓިކް ފެސިލިޓީތައް ވަރުގަދަ ކުރުމަށް ކަމަށް ވިދާޅުވެފައެވެ. ޑައިގްނޯސްޓިކް ފެސިލިޓީއަކީ އާންމު ޓެސްޓުތައް ހަދާ ލެބޯޓްރީ ފަދަ ތަންތަނެވެ.
އެހެންވެ، ރައީސް ޑރ. މުހައްމަދު މުއިއްޒު އެންމެ އިސްކަންދެއްވަނީ ކުދި އާބާދީތަކުގައި ލެބޯޓްރީތައް ގާއިމުކުރަން ކަމަށް މިނިސްޓަރު ވިދާޅުވިއެވެ.
އޭނާ ވިދާޅުވި ގޮތުގައި އެ މަސައްކަތް މި ސަރުކާރުން ފެށިއިރު، ލެބޯޓްރީގެ ޚިދުމަތް ނުލިބޭ 76 ރަށެއް އޮތެވެ. ނަމަވެސް މި އަހަރު ހުރިހާ ރަށެއްގައި ލެބޯޓްރީ ގާއިމުކޮށް ނިންމާނެ ކަމަށް ނާޒިމް ވިދާޅުވިއެވެ.