ރޯދަ ހަދިޔާގެ ގޮތުގައި ސަރުކާރުން ދޫކުރާ މަސް ކޭސްތައް މާލެ ސަރަހައްދުގައި ބަހަން ފެށިތާ 48 ގަޑިއިރުތެރޭ 12،000 ހާހަށް ވުރެ ގިނަ މަސްކޭސް ދޫކޮށްފައިވާ ކަން ލޯކަލް ގަވަނަންސް މިނިސްޓްރީން މިއަދު ހާމަކޮށްފިއެވެ.
ރޯދަ ހަދިޔާގެ ގޮތުގައި މިއީ މަސްކޭސް ދޫކުރާ ދެވަނަ އަހަރެވެ. މިއަހަރު މަސްކޭސް ދޫކުރަން ފެށީ ހޮނިހިރު ދުވަހުގެރެއެވެ. އެރޭ އެކަނިވެސް 4،196 ކޭސް ދޫކުރިއެވެ.
މިނިސްޓްރީން މީޑިއާތަކާ ހިއްސާކުރި ތަފާސްހިސާބުތަކުގައިވާ ގޮތުން، ރޭގެ ނިޔަލަށް މާލެ ސަރަހައްދުގެ ގޭބިސީތަކަށް 12،274 މަސްކޭސް ދޫކޮށްފައިވެއެވެ.
މިނިސްޓްރީން ބުނީ، މާލެ ސަރަހައްދުގައި 65،230 މީޓަރު ރަޖިސްޓްރީކޮށްފައި އެބައޮތް ކަމަށެވެ. އެހެންވެ ރޭގެ ނިޔަލަށް މާލެ ސަރަހައްދުގެ 18.8 ޕަސެންޓު ގޭބިސީތަކަށް މަސްދަޅު ކޭސް ވަނީ ދޫކުރެވިފައި ކަމަށް، މިނިސްޓްރީން ބުންޏެވެ.
މި އަހަރު 118،773 ގޭބީސީއަކަށް 48 ދަޅުގެ މަސް ކޭސް ބަހާނެއެވެ. އެއީ، ރަށްރަށުގެ 56،918 ގޭބީސީއަކަށާއި މާލެ ސަރަހައްދުގެ 61،755 ގޭބީސީއަކަށެވެ.
ރޯދަ ހަދިޔާގެ ގޮތުގައި ދޭ މަސް ކޭހެއް ހިފައިގެން އަންހެނަކު ހިނގާފައި ދަނީ --- ސަން ފޮޓޯ: މޫސާ ނަދީމް
ކޮންމެ ރެޔަކަށް 300 ޓޯކަން ދޫކުރާއިރު، މަސް ކޭސް ދޫކުރާނީ ކަރަންޓު މީޓަރު ނަންބަރު އަދި ބިލު ނަންބަރު ފަދަ މައުލޫމާތުތަކަށް ބެލުމަށްފަހެވެ. އޭގެ އިތުރަށް، މަސް ކޭސް ބެހުމުގެ ކަންކަން ފަސޭހަކޮށްދިނުމަށް ޓޯކަން ނަންބަރު ނެގުމަށް ޚާއްސަ ޕޯޓަލެއް ވެސް ވަނީ ތައްޔާރުކޮށްފައެވެ.
މާލެ ސަރަހައްދުގައި ޖުމުލަ 15 ތަނަކުން މަސް ކޭސް ބަހާނެއެވެ. އެއީ، މާލޭގެ އަށް މަރުކަޒަކާއި ވިލިމާލޭގެ މަރުކަޒަކާއި ހުޅުމާލޭގެ ހަ މަރުކަޒެއްގައެވެ. އެ ތަންތަނަކީ:
- މިފްކޯ މަރުކަޒު
- ސޯޝަލް ސެންޓަރު
- އެމްޓީސީސީ ސޯމިލް
- ހެންވޭރު ސްޓޭޑިއަމް
- ގަލޮޅު ބޯޅަ ދަނޑުގެ ހަތަރު ފަރާތް
- އުމަރު ޒާހިރު ބިލްޑިންގް
- ޕޮލްކޯ ޓަވަރުގެ ތިރިން
- މުހައްމަދު ގާސިމް ޕްރީސުކޫލް
- ކާމިލްދީދީ ސުކޫލު
- ހިޔާ ޓަވަރު ދިހައެއް
- އެމްޕީއެލް ޓަވަރު ޕީ
- ވިލިމާލެ ވެމްކޯ ސައިޓު
ރޯދަ ހަދިޔާގެ ގޮތުގައި ސަރުކާރުން ދޫކުރާ މަސް ކޭސްތައް ހޮނިހިރު ދުވަހުގެރޭ ބަހަން ފެށިއިރު، ޝަރީފް މީގެ ކުރިން ވިދާޅުވިގޮތުގައި އެ މަސައްކަތް މާލޭގައި ކުރިއަށް ގެންދާއިރު، އެއްވެސް މީހަކު ކިޔޫގައި ޖެހޭކަށް ނުޖެހޭނެއެވެ.
މާލޭގައި މަސްކޭސްތައް ދޫކުރުމުގެ މަސައްކަތްކުރަނީ ލޯކަލް ގަވަނަންސް މިނިސްޓްރީންނެވެ. ރަށްރަށުގައި ނަމަ، އެ ރަށްރަށުގެ ކައުންސިލުތަކުންނެވެ.
ބާޒާރުގައި މިފްކޯއިން މަސްދަޅު ކޭހެއް ވިއްކަނީ 760 ރުފިޔާއަށެވެ. އެހެންކަމުން 118،977 މަސްދަޅު ކޭސް ނަމަ އެއީ ޖުމުލަ 90.4 މިލިއަން ރުފިޔާއެވެ.