އަންނަ ކައުންސިލު އިންތިޚާބުގައި ވާދަކުރާ ކެންޑިޑޭޓުންގެ ކުށުގެ ރެކޯޑު ސާފުކުރުމަށް އެއްފަހަރާ ގިނަ ފޯމުތައް ފޮނުވުމުން، ކަރެކްޝަންސްގެ ސާވާއަށް ލޯޑު ބޮޑުވެ، ކުށުގެ ރެކޯޑު ސާފުކުރުމުގައި ދަތިތައް ކުރިމަތިވެއްޖެއެވެ.
ކަރެކްޝަންސް އިން މިއަދު ބުނީ، ކައުންސިލު އިންތިޚާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިޚާބުގައި ވާދަކުރާ ގިނަ ކެންޑިޑޭޓުންތަކެއްގެ ކުށުގެ ރެކޯޑު ސާފުކުރުމަށް އެއްފަހަރާ ގިނަ ފޯމުތަކެއް ފޮނުވުމުން، އެ ޚިދުމަތުގެ ސާވާގެ ލޯޑު ބޮޑުވެ، ފޯމުތައް ބަލައިގަތުމުގައި ދަތިތައް ކުރިމަތިވެފައިވާ ކަމަށެވެ.
އެކަން ހައްލުކުރުމަށް މަސައްކަތް ކުރަމުން އަންނަ ކަމަށް، ކަރެކްޝަންސްއިން ބުންޏެވެ.
އެކަމަކު މިކަމުގެ މާ ބޮޑު ތަފުސީލެއް އެ ޚިދުމަތުން ނުދެއެވެ.
ކަރެކްޝަންސްގެ ސާވާގެ ލޯޑު ބޮޑުވިއިރު، އިދިކޮޅު އެމްޑީޕީން ވަނީ، ދައުލަތުގެ އިދާރާތަކުން ކުށާއި ދަރަނީގެ ރެކޯޑު ސާފުކުރަން ވަގުތު ނަގާ ކަމަށް ބުނެ ކަންބޮޑުވުން ފާޅުކޮށްފައެވެ. އަދި އިންތިޚާބަށް ވާދަކުރާ ކެންޑިޑޭޓުން ގަނޑުކޮށް ފޯމު ހުށަހެޅޭ ގޮތް ހަދަންވެސް އެ ޕާޓީން ގޮވާލިއެވެ.