ސްކޫލުތަކުގެ ދަރިވަރުންނަށް ލިބުނު ބޮޑު ބަންދަށް ފަހު، މިއަދު ރާއްޖޭގެ ހުރިހާ ސްކޫލެއްގައި ދިރާސީ އާ އަހަރުގެ ކިޔެވުން ރަސްމީކޮށް ފަށައިފިއެވެ.
ދަރިވަރުން އެ އައީ ޑިސެންބަރު މަހު ލިބުނު ބޮޑު ޗުއްޓީންނެވެ.
މިދިޔަ ދިރާސީ އަހަރު ނިންމައި ޑިސެންބަރު 25 ގައި ވަނީ ދަރިވަރުންނަށް ބޮޑު ޗުއްޓީ ދީފައެވެ. އެއީ، ކުރިން ޗުއްޓީއަށް ގެނައި ބަދަލު، އަލުން ކުރިން އޮތް ގޮތަށް ބަދަލުކޮށް ދަރިވަރުންނަށް ޑިސެންބަރު މަހު ބޮޑު ޗުއްޓީ ލިބުނު ފުރަތަމަ ދިރާސީ އަހަރެވެ.
މީގެ ކުރިން އެޑިއުކޭޝަން މިނިސްޓްރީން އާންމުކުރި ތަފާސްހިސާބުތަކުގައި ވާގޮތުން މި އަހަރު 80،000 އަށްވުރެ ގިނަ ދަރިވަރުން ތައުލީމު ހާސިލުކުރާނެއެވެ.
ދަރިވަރުން މިއަދު އެނބުރި ސްކޫލަށް ދަނީ: ދިރާސީ އާ އަހަރުގެ ކިޔެވުން މިއަދު ވަނީ ފަށާފައި -- ސަން ފޮޓޯ/ މުހައްމަދު އަފްވާން
އެ ގޮތުން، މި އަހަރު 4،790 ދަރިވަރުން ވަނީ އަލަށް ސަރުކާރު ސްކޫލުތަކުގެ ގްރޭޑް އެކެއްގައި ކިޔަވަން އެދިފައެވެ. އޭގެ ތެރޭގައި ހިމެނެނީ އަތޮޅުތަކުގެ ގްރޭޑް އެކަކަށް ވަންނަން އެދުނު 3،042 ދަރިވަރުންނާއި މާލޭ ސްކޫލުތަކަށް ވަންނަން އެދުނު 1،748 ދަރިވަރުންނެވެ.
މިނިސްޓްރީން މީގެ ކުރިން ބުނި ގޮތުގައި މި އަހަރު މާލެއަށް އަތޮޅުތަކުން 1،530 ދަރިވަރުން ވަނީ ބަދަލުވެފައެވެ.
ދަރިވަރުން މިއަދު އެނބުރި ސްކޫލަށް ދިޔައިރު އެ ދަރިވަރުންނަށް ރޯދަމަހުގެ ފުރަތަމަ ހަފުތާއަށް ފަހު ސްކޫލުތައް ބަންދުވާނެއެވެ. އެ ގޮތުން، ރޯދަމަހު ކިޔަވައިދޭނީ އެންމެ ހަފުތާއެއްގައި ކަމަށް އެޑިއުކޭޝަން މިނިސްޓްރީގެ ދިރާސީ އަހަރުގެ ކަލަންޑަރުގައިވެއެވެ.
ފުރަތަމަ ޓާމް ނިންމައި މި އަހަރުގެ ޖުލައި މަހުގެ 17 ވަނަ ދުވަހު ދަރިވަރުންނަށް ޓާމް ޗުއްޓީ ލިބޭނެއެވެ. ދެވަނަ ޓާމްގެ ކިޔެވުން ފަށާނީ އޮގަސްޓް މަހުގެ ދެވަނަ ދުވަހެވެ. މި އަހަރު ވެސް ދަރިވަރުންނަށް އަހަރު ނިންމައި ބޮޑު ޗުއްޓީ ލިބޭނީ ޑިސެންބަރުގައެވެ.
އެ ގޮތުން، ޑިސެންބަރު 18 ގައި މި އަހަރުގެ ކިޔެވުން ނިމޭނެއެވެ. އަދި، އަންނަ ދިރާސީ އަހަރުގެ ކިޔެވުން ފަށާނީ ޖަނަވަރީ 17، 2027 ގައެވެ.