ބަލި މީހުންނަށް އެހީވުމުގެ ނަމުގައި ސްކޭމް ކުރުން އިތުރުވާތީ، އެ ކަމަށް ސަމާލުވުމަށް ފުލުހުންގެ އެންޓި ސްކޭމް ސެންޓަރުން މިރޭ އިލްތިމާސްކޮސްފިއެވެ.
މަކަރާއި ހީލަތް ހަދައިގެން އެކި ގޮތް ގޮތަށް ސްކޭމަރުން ފައިސާ ހޯދައެވެ. ޒަމާނަށް އަންނަ ބަދަލުތަކާއެކު އެ އުކުޅުތައް ވެސް ކުރިއަރާއިރު، ބަލި މީހުންނަށް އެހީ ހޯދުމުގެ ނަމުގައި ސްކޭމްތައް ހިންގާ މިންވަރު އިތުރުވަމުން އަންނަ ކަމަށް ފުލުހުން ވަނީ ބުނެފައެވެ.
އެ ފަދަ ސްކޭމްތަކުގެ ބައެއް ޕޯސްޓުތައް ވެސް ފުލުހުން ވަނީ ހިއްސާކޮށްފައެވެ. ދީނުގެ މަގު ކިޔާ ޕޭޖަކުން ކޮށްފައިވާ އެ ޕޯސްޓުގައި ވަނީ، ކަންފަތުން ފެށިގެން ސިކުނޑީގެ ބޭރު ފަށަލައާ ހަމައަށް އިންފެކްޓުވެ، ވަރަށް އަވަހަށް އޮޕަރޭޝަނެއް ކުރަން ޖެހޭ އަންހެނަކަށް މާލީ އެހީތެރިކަން ބޭނުންވާ ކަމަށް ބުނެފައެވެ. އަދި، ފައިސާ ފޮނުވާނެ އެކައުންޓު ނަމްބަރު ވެސް އެ ޕޭޖުން ވަނީ ހިއްސާކޮށްފައެވެ.
ފުލުހުންގެ އެންޓި ސްކޭމް ސެންޓަރުން ވަނީ، އެ ފަދަ ސްކޭމުތަކަށް ސަމާލުވާން އިލްތިމާސްކޮށްފައެވެ. އެ ފަދަ ސްކޭމްތަކުން ރައްކާތެރިވާނެ ގޮތް ވެސް ވަނީ ކިޔައިދީފައެވެ.
މިގޮތުން، ޕޯސްޓުގައިވާ ފޮޓޯއަކީ އެހެން ގައުމެއް ނުވަތަ މާކުރީގެ ފޮޓޯއެއްތޯ ބެލުމަށް ގޫގުލް އިމޭޖަސް ބޭނުންކޮށްގެން ސާޗު ކުރުމަށާއި މައުލޫމާތު ހިއްސާކޮށްފައިވާ ޕޭޖުގެ މައުލޫމާތު ސައްހަތޯ ޔަގީންކުރުމަށް ވަނީ އިލްތިމާސްކޮށްފައެވެ.
އޭގެއިތުރަށް، ފައިސާ ފޮނުވުމުގެ ކުރިން ދީފައިވާ ނަންބަރަށް ގުޅައި، ހަގީގީ ނަންބަރެއްތޯއާއި އެކައުންޓް ނަންބަރާ ގުޅުންހުރި މީހެއްތޯ ބެލުމަށާއި މެޑިކަލް ލިޔުންތަކުގައި ޝައްކު ކުރެވޭ ކަމެއް ހުރިތޯ ކަށަވަރުކުރުމަށް ވަނީ އެދިފައެވެ.
ޓެކްނޮލޮޖީއަށް އަންނަ ބަދަލާ ގުޅިގެން ސްކޭމަރުން އަންނަނީ، އެކި އުކުޅުތައް ބޭނުންކޮށްގެން ފައިސާ ހޯދަމުންނެވެ. މި ގޮތުން، ކެންސަރު ޖެހިފައިވާ މީހަކަށް އެހީވުމުގެ ނަމުގައި ސްކޭމެއް ހިންގާތީ ސަމާލުވާން ފުލުހުން ވަރަށް ފަހުން ވެސް ވަނީ އިލްތިމާސްކޮށްފައެވެ.