ދުނިޔޭގައި ކުޅޭ އެންމެ ދުވަސްވީ ފުޓްބޯޅަ މުބާރާތުގެ ގޮތުގައި ފާހަގަ ކުރެވިފައިވާ އިނގިރޭސި އެފް އޭ ކަޕްގެ ސެމީ ފައިނަލްއިން މެންޗެސްޓާ ސިޓީ ޖާގަހޯދައިފިއެވެ.
މި މުބާރާތުގެ ސެމީ ފައިނަލްއިން ސިޓީ ޖާގަހޯދާފައިވަނީ ކްއާޓާ ފައިނަލްގައި ބޯންމޯތާ ބައްދަލުކޮށް ދެ ލަނޑު އެއް ލަނޑުން ކުރި ހޯދައިގެންނެވެ.
ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މި މެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ސިޓީއިންނެވެ. މި މެޗުގެ ފުރަތަމަ ހާފުގައި ސިޓީއަށް ލަނޑު ޖަހާނެ ރަނގަޅު ފުރުސަތު ތަކެއް ލިބިގެންދިޔަ ނަމަވެސް ހިތްވަރާއެކު ކުޅެމުންދިޔަ ބޯންމޯތު ކައިރީ މިއިން އެއްވެސް ހަމަލާއެއްގެ ބޭނުން ހިފޭގޮތެއް ނުވިއެވެ.
މި މެޗުގެ ފުރަތަމަ ލަނޑު މެޗުގެ 21 ވަނަ މިނެޓުގައި ޖަހާ ލީޑު ނަގާފައިވަނީ ބޯންމޯތުންނެވެ. މި ލަނޑު އެ ޓީމަށް ކާމިޔާބު ކޮށްދިނީ އެވަނީލްސަންއެވެ.
މި ލަނޑާއެކު ސިޓީގެ ކޯޗު ޕެޕް ގާޑިއޯލާ އެ ޓީމުގެ ކޯޗު ކަމާ ހަވާލުވި ސީޒަން ކަމަށްވާ 2016-2017 ވަނަ އަހަރުގެ ސީޒަނަށްފަހު ފުރަތަމަ ފަހަރަށް ސިޓީއިން ތަށްޓަކާ ނުލާ ސީޒަން ނިންމާލަން ޖެހިދާނެ ކަމުގެ އިހްސާސް އެ ޓީމުގެ ސަޕޯޓަރުންގެ ހިތަށް އެރުމަކީ ގާތް ކަމެކެވެ. ސަބަބަކީ މި ސީޒަންގައި ސިޓީގެ ފަރާތުން ފެންނަމުންދާ ކުޅުމާއި މީގެ ކުރިން ބޯންމޯތު އަތުން ބަލިވެފައިވުމެވެ.
މި ހާފުގައި ސިޓީއަށް ލަނޑެއް ނުޖެހުނު ނަމަވެސް ލަނޑު ޖަހާނެ ރަނގަޅު ފުރުސަތު ތަކެއް ލިބިގެންދިޔައެވެ. ހާއްސަކޮށް ހުނަރުވެރި ފޯވަޑް އާލިން ހާލަންޑަށް ލިބިގެންދިޔަ ފުރުސަތުތައް ފާހަގަ ވެގެންދިޔައެވެ. މިގޮތުން ފުރަތަމަ ހާފުގައި ސިޓީއަށް ލިބިގެންދިޔަ ޕެނަލްޓީއެއް ހާލަންޑް އަތުން ބޭކާރުވެގެންދިޔައިރު ލަނޑު ޖަހާނެ ރަނގަޅު ދެ ފުރުސަތެއް ހާލަންޑް އަތުން ބޭނުން ނުހިފި ގެއްލިގެންދިޔައެވެ.
މި މެޗުގެ ދެވަނަ ހާފަށް ސިޓީއިން ނިކުތީ ފަހަތަށް ކުޅެމުންދިޔަ އަބްދުކާދިރު ހުސަނޯވްގެ ބަދަލުގައި ނީކޯ އޯ ރައިލީ އަރުވައިގެންނެވެ. އަދި މި ބަދަލުގެ ނަތީޖާ ފެނުމަށް މާގިނައިރު ތަކެއް ނުނެގިއެވެ. މިގޮތުން މެޗުގެ 49 ވަނަ މިނެޓުގައި އޯ ރައިލީ ތަނަވަސްކޮށްދިން ފުރުސަތެއްގައި ހާލަންޑް ވަނީ ސިޓީއަށް މެޗުގެ ނަތީޖާ ހަމަހަމަ ކޮށްދީފައެވެ. މި މެޗުގެ ދެވަނަ ހާފުގައި ސިޓީ ފެނިގެންދިޔައީ މުޅިން ތަފާތު ޓީމެއްގެ ގޮތުގައެވެ.
މި މެޗުން ސިޓީ މޮޅުވި ލަނޑު މެޗުގެ 63 ވަނަ މިނެޓުގައި ކާމިޔާބު ކޮށްދިނީ އަނެއްކާވެސް އޯ ރައިލީ ތަނަވަސްކޮށްދިން ފުރުސަތެއްގައި އޮމަރު މަރްމޫޝްއެވެ. އޭނާ މިލަނޑު ޖަހާފައިވަނީ ހާލަންޑަށް އަނިޔާވުމުގެ ސަބަބުން އޭނާގެ ބަދަލުގައި ކުޅެން އެރިތާ މާގިނައިރު ތަކެއް ނުވެއެވެ.
މި މެޗުގައި މީގެ އިތުރުންވެސް ލަނޑު ޖަހާނެ ރަނގަޅު ދެތިން ފުރުސަތު ސިޓީއަށް ލިބިގެންދިޔައެވެ. މި މެޗުގައި ބޯންމޯތުން ނަތީޖާ ހަމަހަމަ ކުރެވޭތޯ މަސައްކަތް ކުރި ނަމަވެސް އެކަން އެ ޓީމަށް ކުރެވޭގޮތެއްނުވިއެވެ.
މި ކާމިޔާބީއާއެކު ސިޓީއިން އެފް އޭ ކަޕްގެ ސެމީ ފައިނަލުން ޖާގަހޯދާފައިވާއިރު ސެމީ ފައިނަލްގައި ސިޓީ ބައްދަލުކުރުމަށް ހަމަޖެހިފައިވަނީ ނޮޓިންހަމް ފޮރެސްޓް އާއެވެ.