ޒެލްޑާގެ ލައިވް އެކްޝަން 2027 ގައި

ގޭމިން ޕްލެޓްފޯމް ކަމަށްވާ ނިންޓެންޑޯގެ އެންމެ މަގުބޫލު ގޭމް ފްރެންޗައިޒް ކަމަށްވާ "ދަ ލެޖެންޑް އޮފް ޒެލްޑާ"ގެ ލައިވްއެކްޝަން ފިލްމު ރިލީޒްކުރާ ތާރީހު އިއުލާނުކޮށްފިއެވެ.

ނިންޓެންޑޯއިން ޒެލްޑާ ލައިވް އެކްޝަން ފިލްމު އުފައްދަން އުޅޭކަން އިއުލާނުކޮށްފައިވަނީ 2023 ވަނަ އަހަރުގައެވެ. އެއަށް ފަހު ފިލްމާ ގުޅޭ އިތުރު މައުލޫމާތެއް އާންމު ނުކޮށް އެންމެ ފަހުން ވަނީ ފިލްމު ރިލީޒް ކުރާ ތާރީހު އާންމުކޮށްފައެވެ. ނިންޓެންޑޯއިން ހާމަކޮށްފައިވާ ގޮތުގައި ފިލްމު ރިލީޒް ކުރުމަށް ހަމަޖެހިފައިވަނީ 2027 ވަނަ އަހަރުގެ މާޗު 26 ގައެވެ.

ނިންޓެންޑޯއިން މި ފިލްމު ހަދަނީ އަވީ އަރާޑްގެ އަރާޑް ޕްރޮޑަކްޝަންސް މެދުވެރިކޮށެވެ.

މި ފިލްމް ޑައިރެކްޓްކުރާނީ "މޭޒް ރަނާ" ޓްރިލޮޖީއާއި ކުރިއަށް ރިލީޒްކުރުމަށް ހަމަޖެހިފައިވާ "ކިންގްޑަމް އޮފް ދަ ޕްލެނެޓް އޮފް އޭޕްސް"ގެ ޑައިރެކްޓަރު ބޯލެވެ. މި ފިލްމް ކޯ-ފައިނޭންސް ކުރާނީ ނިންޓެންޑޯއިންނާއި ސޮނީ ޕިކްޗާސް އެންޓަޓޭންމަންޓްގެ ފަރާތުންނެވެ.

"ލެޖެންޑް އޮފް ޒެލްޑާ"ގައި ޕްރިންސަސް ޒެލްޑާއާއި އެލްފް-ވޮރިއާ ލިންކްއާ އެކު ގެނަން ބަލިކޮށް، އެ މީހުންގެ ރަސްކަން ސަލާމަތްކުރުމަށް މަސައްކަތް ކުރެއެވެ. މި ފިލްމުގެ ކާސްޓް އަދި އިއުލާންކޮށްފައެއް ނުވެއެވެ.

މި ފިލްމް ވެގެންދާނީ "ލެޖެންޑް އޮފް ޒެލްޑާ" ފްރެންޗައިޒްގެ ފުރަތަމަ ފިލްމަށެވެ. މީގެ ކުރިން ނިންޓެންޑޯ ގޭމަކަށް ހަދާފައިވަނީ "ސުޕަ މާރިއޯ"ގެ ދެ ފިލްމެވެ.

އެ ކުންފުނިން މި ގޭމް ފުރަތަމަ ތައާރަފުކުރީ 1986 ގައެވެ. މި ގޭމަށް 1989 ގައި 13 އެޕިސޯޑްގެ ކާޓޫން ސީރީޒެއްވެސް ހަދާފައިވެއެވެ.

comment ކޮމެންޓް