މޯލްޑިވްސް ޕޯޓްސް ލިމިޓެޑް (އެމްޕީއެލް)ގެ މެނޭޖިން ޑިރެކްޓަރު މުހައްމަދު ވަޖީހު އިބްރާހީމް މަގާމުން މިއަދު ވަކިކޮށްފިއެވެ.
މިކަން ހާމަކޮށްފައި ވަނީ ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)ން އެކްސްގައި ކުރި ޕޯސްޓެއްގައެވެ.
މި ޕޯސްޓުގައި ވަނީ އޭނާ ކުންފުނީގެ އެމްޑީގެ މަގާމުންނާއި ބޯޑު ޑިރެކްޓަރު ކަމުގެ މަޤާމުން ވަކިކޮށްފައި ވާކަމަށެވެ. އިތުރު ތަފުސީލެއް ހާމަކޮށްފައެއް ނުވެއެވެ.
ވަޖީހު އެ ކުންފުނީގެ އެމްޑީގެ މަގާމަށް އައްޔަން ކުރީ 2023ވަނަ އަހަރުގެ ނޮވެމްބަރު 28ގައެވެ.
މި ސަރުކާރުގެ ފުރަތަމަ ޓޫރިޒަމް މިނިސްޓަރުކަން ކުރެއްވި އިބްރާހީމް ފައިސަލް ވެސް މިދިޔަ އަންގާރަ ދުވަހު ރައީސް އޮފީހުން ވަނީ ވަކި ސަބަބެއް ނާންގާ ވަކިކޮށްފައެވެ. ފައިސަލް އަކީ މަޖިލީހުގެ ރައީސް އަބްދުއްރަހީމްގެ ދަރިކަލުންނެވެ.
ވަޖީހާ އަބްދުއްރަހީމާ ވެސް ގާތް ގުޅުމެއް އޮވެއެވެ.
އަބްދުއްރަޙީމަކީ ރައީސް ޑރ. މުހައްމަދު މުއިއްޒު ވެރިކަމަށް ވަޑައިގެންއިރު އެންމެ އަރިސް ބޭފުޅާއެވެ. ފުރަތަމަ ހުންނެވީ ރައީސްގެ ޚާއްސަ އެޑްވައިޒަރެއްގެ ގޮތުގައެވެ. ޗީފް މިނިސްޓަރުގެ މަގާމުގައެވެ. އެއަށްފަހު، ރައްޔިތުންގެ މަޖިލީހުގެ ރައީސްކަން ވެސް އެމަނިކުފާނަށް ދެއްވީ ޚުދު ރައީސް ބޭނުންފުޅުވެގެންނެވެ.
ނަމަވެސް މިހާރު ރައީސާއި އަބްދުއްރަހީމުގެ ގުޅުން ގޯސްވެފައި ވާކަމަށް އެމަނިކުފާނު ވަނީ ނޫހަކަށް ދެއްވި އިންޓަވިއުއެއްގައި އެއްބަސްވެ ވަޑައިގެންފައެވެ.
ރައީސާއި އަބްދުއްރަޙީމްގެ ގުޅުން ފެށުނީ ޕީއެންސީ ސެނެޓުގައި ބޭއްވި ޕްރައިމަރީއާ ހަމައިންނެވެ. އެ ޕްރައިމަރީ ކާމިޔާބުކޮށް، އޭރު މާލޭ މޭޔަރަކަށް ހުންނެވި ރައީސް މުއިއްޒު ވެރިކަމަށް ގެނައުމަކީ ސިޔާސީ ހަޔާތުގެ އެންމެ ކާމިޔާބު، އެންމެ ބުރަ، މަސައްކަތުގެ ގޮތުގައި އަބްދުއްރަޙީމް އޭރު ވިދާޅުވިއެވެ.