މި ސަރުކާރުގެ އެންމެ ފުރަތަމަ ޓޫރިޒަމް މިނިސްޓަރު އިބްރާހީމް ފައިސަލް އެ މާގަމަށް އައްޔަން ކުރެއްވީތީ އާއި އޭނާ މަގާމުގައި ހުންނެވިއިރު ރައީސް ޑރ. މުހައްމަދު މުއިއްޒުގެ ފަރާތުން ދެއްވި އެއްބާރުލެއްވުމަށް ޝުކުރު އަދާ ކުރައްވައިފިއެވެ.
ފައިސަލް މަގާމުން ވަކިކޮށްފައި ވަނީ މިދިޔަ އަންގާރަ ދުވަހުގެ ހެނދުނުގެ ވަގުތެއްގައެވެ. ފައިސަލް މަގާމުން ވަކިކުރި ނަމަވެސް، އެކަމާ ގުޅޭ މާގިނަ މައުލޫމާތެއް ރައީސް އޮފީހުން ހާމަކޮށްފައެއް ނުވެއެވެ. އިތުރަށް އެ އޮފީހުން ބުނީ ޓޫރިޒަމް މިނިސްޓްރީގެ ކަންކަން ވަގުތީ ގޮތުން ބަލަހައްޓަވާނީ އިކޮނޮމިކް މިނިސްޓަރު މުޙައްމަދު ސައީދު ކަމަށެވެ.
ފައިސަލް މިއަދު ނެރުއްވި ބަޔާނެއްގައި ވަނީ މަގާމުން ވަކި ކުރުމާ ހަމައަށް ޓޫރިޒަމް މިނިސްޓަރުކަމުގެ މަގާމުގައި ދިވެހި ގައުމަށާއި ދިވެހި ރައްޔިތުންނަށް ޚިދުމަތް ކުރަން ފުރުސަތު ދެއްވި ކަމަށް ޓަކައި އަބަދު ވެސް ފަޚުރުވެރިވާނެ ކަމަށް ވިދާޅުވެފައެވެ. އަދި އެ ކަމަށްޓަކައި ވަނީ ރައީސް ޑރ. މުހައްމަދު މުއިއްޒަށް ޝުކުރު އަދާކުރައްވައިފައެވެ.
ފައިސަލް ވިދާޅުވެފައި ވަނީ ވޭތުވެދިޔަ ތަނުގައި އޭނާއާ ހަވާލުކުރެވިފައިވާ މަސައްކަތްތައް ކުރައްވާފައި ވާނީ ގާބިލިއްޔަތުކަން ތަންދިން އެންމެ އުސް ދަރަޖައިގައި ވަރުބަލި ކަމެއްނެތި، ޝައުގުވެރިކަމާއި އިޚްލާސްތެރިކަމާ އެކުގައި ކަމަށެވެ. އަދި ޓޫރިޒަމްގެ އަމާޒުތަކަށް ވާސިލްވާން މަސައްކަތްކޮށްފައި ވާނީ ބަދަލުވަމުންދާ ދުނިޔޭގެ ފަތުރުވެރިކަމަށް ބަލައިގެން، ރައްޔިތުންނާ ގާތުން ކަމަށް ވިދާޅުވެފައިވެއެވެ.
މިނިސްޓަރުކަމުގައި ހުންނަވައިގެން ޚިދުމަތް ކުރެއްވިއިރު، ރައީސް މުއިއްޒުގެ ފަރާތްޕުޅުންނާއި އެ މަނިކުފާނުގެ ވަޒީރުންގެ މަޖިލީހުގެ އިތުރުން، ޖަމިއްޔާތަކާއި އެމްއެމްޕީއާރުސީއާއި ޓޫރިޒަމް މިނިސްޓްރީގެ ސިޔާސީ މުވައްޒަފުންނާއި ސިވިލް ސާވިސް މުވައްޒަފުންގެ ފަރާތުން ވަރަށް ބޮޑު އެއްބާރުލުމެއް ލިބުނުކަން ފާހަގަ ކުރައްވައި ވިދާޅުވީ އެ ފަރާތްތަކަށް އޭނާގެ ހިތުގައި އޮތީ ލޯތްބާ ޝުކުރު ކަމަށް އެ ބަޔާނުގައި ވެއެވެ.
ޓޫރިޒަމް އެހެން ހަރުފަތަކަށް ގެންދަންޖެހޭ ކަމަށާއި، އެ ކަމަށް ޓަކައި އަޅަންޖެހޭ އެންމެ ބޮޑު ފިޔަވަޅަކީ މި ސަރުކާރުން އެންމެ ބޮޑު އަހަންމިއްޔަތުކަމެއް ދީފައި އޮތް ފިޔަވަޅުތައް ކަމަށް ފައިސަލް ވިދާޅުވިއެވެ. އެއީ ޓޫރިޒަމްގެ ފަހި ފުރުސަތުތައް ޒުވާނުންނަށް ހޯދައިދީ، އިންވެސްޓުކޮށް، ޒުވާނުންގެ ބައިވެރިވުމާއެކު ދިވެހި ޓޫރިޒަމް ދިވެހީންގެ އަތްމައްޗަށް ގެނައުމެވެ. އަދި އިތުރު އެނދު ތަރައްގީކުރާނެ ފަންޑު ހޯދައިދިނުމާއެކު ފަސޭހަ ފަހި މާހައުލެއް ޒުވާނުންނަށް އުފައްދައިދިނުމެވެ.
ފައިސަލް ވިދާޅުވި ގޮތުގައި އެމްއެމްޕީއާރުސީއަށް ރާއްޖޭގެ ޓޫރިޒަމް މާކެޓު ކުރުމަށް ދީފައި އޮންނަ ބަޖެޓު 25 މިލިއަނާއި 50 މިލިއަން ޑޮލަރާ ދެމެދުގެ އަދަދަކަށް ބަދަލުވެ އެ ބަޖެތު ބޮޑުވާން ޖެހެއެވެ.
މީގެ 15 އަހަރު ފަހުން ރާއްޖޭގެ ކޮންމެ އަތޮޅެއްގައި 6،000 އާއި 8.000އާ ދެމެދު އަދަދަކަށް އެނދު ތަރައްގީ ކުރެވި، ބައިނަލްއަގުވާމީ އެއާޕޯޓުތަކާއެކު ޝެޑިއުލް ފްލައިޓުތައް އަޅަން ފަށައި ދިވެހި ޓޫރިޒަމް ފުޅާވެގެން ދިއުމަކީ ފައިސަލް ގެންގުޅުއްވާ ތަސައްވުރެއްކަން މި ބަޔާނުގައި ފާހަގަކުރައްވާފައި ވެއެވެ. މީގެ އިތުރުން ރާއްޖޭގެ ތިން ސަރަހައްދެއްގައި ކްރޫޒް މެރީނާ ހަދައި ކްރޫޒްލައިނާތަކަށް ޖާގަ ހޯދައިދިނުމާއެކު ޓޫރިޒަމް ސިންދަފާތުކޮށް، މެޑިކަލް ޓޫރިޒަމާއި، ސްޕޯޓްސް ޓޫރިޒަމާއި، ހެރިޓޭޖް ޓޫރިޒް ކުރިއަރާތަން ދެކެން ބޭނުންވާ ކަން ވެސް މި ބަޔާނުގައި ފާހަގަކޮށްފައި ވެއެވެ.
ފައިސަލް ވިދާޅުވެފައިވަނީ ގައުމަށް ޚިދުމަތް ކުރުމަކީ އަބަދު ވެސް އޭނާގެ އެންމެ ބޮޑު ހުވަފެން ކަމަށާއި، އެއީ ލިބޭ އެންމެ ބޮޑު އުފާ ކަމަށެވެ. އެއީ އޭނާ އަދާކުރަންޖެހޭ އެންމެ ބޮޑު ގައުމީ ވާޖިބު ކަމަށް ވެސް ވިދާޅުވެފައި އޮތެވެ. އެ ބަޔާން ނިންމާލާފައިވަނީ ރާއްޖޭގެ ޓޫރިޒަމަށް ފެހިކަމާއި އާރޯކަން ލިބިލިބި ހުރުމަށް އެދެމުންނެވެ.
ފައިސަލް ޓޫރިޒަމް މިނިސްޓަރުކަމުން ވަކިކުރީ ސަރުކާރުން ކަނޑައެޅި ދެ މިލިއަން ޓޫރިސްޓުން ރާއްޖެ ގެނައުމުގެ ތާރީޚީ އަމާޒު ވެސް ހާސިލް ކުރައްވާފައިވަނިކޮށެވެ.
ފައިސަލް އަކީ ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲގެ ދަރިކަލުންނެވެ.
އަބްދުއްރަޙީމަކީ ރައީސް ޑރ. މުހައްމަދު މުއިއްޒު ވެރިކަމަށް ވަޑައިގެންއިރު އެންމެ އަރިސް ބޭފުޅާއެވެ. ފުރަތަމަ ހުންނެވީ ރައީސްގެ ޚާއްސަ އެޑްވައިޒަރެއްގެ ގޮތުގައެވެ. ޗީފް މިނިސްޓަރުގެ މަގާމުގައެވެ. އެއަށްފަހު، ރައްޔިތުންގެ މަޖިލީހުގެ ރައީސްކަން ވެސް އެމަނިކުފާނަށް ދެއްވީ ޚުދު ރައީސް ބޭނުންފުޅުވެގެންނެވެ.
ނަމަވެސް މިހާރު އެދެބޭފުޅުންގެ ގުޅުން ގޯސްވެފައިވާކަމަށް އަބްދުއްރަހީމް ވަނީ އެއްބަސްވެ ވަޑައިގެންފައެވެ.