މަގާމުން ވަކިކުރި ނަމަވެސް، ހިތްވަރު ކުރައްވާނެކަމަށް ކުރީގެ ޓޫރިޒަމް މިނިސްޓަރު އަދި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲގެ ދަރިކަލުން އިބްރާހީމް ފައިސަލް މިއަދު ވިދާޅުވެއްޖެއެވެ.
ފައިސަލް މަގާމުން ވަކިކޮށްފައި ވަނީ މިއަދު ހެނދުނުގެ ވަގުތެއްގައެވެ. އެކަމާ ގުޅުވައި ދާދި ދެންމެއަކު އެކްސްގައި ކުރެއްވި ޕޯސްޓެއްގައި އޭނާ ވަނީ ކުރީގެ ރައީސް މުހައްމަދު ނަޝީދުގެ ބަސްފުޅަކުން މިސާލު ނަންގަވައިފައެވެ.
"ކާމިޔާބީގައި ހިތްތިރި ކުރައްވާށެވެ. އަދި ނާކާމިޔާބީގައި ހިތްވަރުގަދަ ކުރާާށެވެ،" ކުރީގެ ރައީސް ނަޝީދުގެ އެކްސް ހޭންޑްލް އާއެކު ފައިސަލް ލިޔުއްވާފައި ވެއެވެ.
ފައިސަލް މަގާމުން ވަކިކުރި ނަމަވެސް، އެކަމާ ގުޅޭ މާގިނަ މައުލޫމާތެއް ރައީސް އޮފީހުން ހާމަކޮށްފައެއް ނުވެއެވެ. އިތުރަށް އެ އޮފީހުން ބުނީ ފަތުރުވެރިކަމާ ބެހޭ ވުޒާރާގެ ކަންކަން ވަގުތީ ގޮތުން ބަލަހައްޓަވާނީ އިގުތިޞާދީ ކަންކަމާ ބެހޭ ވަޒީރު މުޙައްމަދު ސައީދު ކަމަށެވެ.
މަގާމުން ވަކިކުރުމާ ގުޅިގެން "ސަން"އާ ވާހަކަަދައްކަވަމުން ފައިސަލް ވިދާޅުވީ އޭނާއަށް މަގާމުން ވަކިކުރިކަމުގެ ސިޓީ ލިބިވަޑައިގަތީ މިއަދު ހެނދުނު ކަމަށެވެ. ރައީސް އޮފީހުން ފޮނުވި ސިޓީގައި ވެސް މަގާމުން ވަކިކުރީ ކީއްވެކަން ބުނެދީފައިނުވާ ކަމަށް ފައިސަލް ވިދާޅުވިއެވެ.
މީގެ އިތުރުން ފައިސަލް ވިދާޅުވީ ސިޔާސީ ގޮތުން ދެން ކުރިއަށްދާނެ ވަކި ގޮތެއް ނިންމަވާނީ ބައްޕާފުޅު އަބްދުއްރަހީމާ ވެސް މަަޝްވަރާކުރެއްވުމަށް ފަހުގައި ކަމަށެވެ.
"އިރާދަކުރެއްވިއްޔާ ސިޔާސީ މަސައްކަތުގައި މިއަށްވުރެ ގަދަޔަށް ފެންނާނެ. މިހާރު ދެން މިހުރީ ސަރުކާރާ އެކުގައެއް ނޫން ދެއްތޯ،" ފައިސަލް ވިދާޅުވިއެވެ.
ފައިސަލް ވިދާޅުވީ ފަތުރުވެރިކަމާ ބެހޭ ވަޒީރެއްގެ ގޮތުގައި ޚިދުމަތްކުރައްވަން ލިބިވަޑައިގެންނެވި ފުރުސަތުގައި ވަރަށް އިޚްލާސްތެރިކަމާއެކު ޚިދުމަތް ކުރެއްވި ކަމަށެވެ.
ފައިސަލް މަގާމުން ވަކިކުރުމާ ގުޅިގެން އަބްދުއްރަހީމް އެކްސްގައި ކުރެއްވި ޕޯސްޓެއްގައި ވަނީ ފައިސަލް މަސައްކަތްކުރެއްވީ އިޚުލާސްތެރިކަމާއެކު ކަމަށާއި، ނަތީޖާވެސް ނެރެދެއްވި ކަމަށެވެ.
އެ ޕޯސްޓުގައި ވަނީ އެމަނިކުފާނުގެ ދަރިފުޅު، ފައިސަލަށްޓަކައި އެމަނިކުފާނާ އެމަނިކުފާނުގެ އާއިލާ ފަޚުރުވެރިވެލައްވާ ކަމަށެވެ. އަދި ރާއްޖޭގެ ފަތުރުވެރިކަމާބެހޭ ވަޒީރުކަމުގެ މަގާމުގައި ހުންނަވައި ފައިސަލް ޚިދުމަތް ކުރެއްވީ އިޚްލާސްތެރިކަމާއި ތެދުވެރިކަމާއެކު ކަމަށް އެމަނިކުފާނު ވިދާޅުވިއެވެ.
އަދި ނަތީޖާ ވެސް ނެރެދެއްވި ކަމަށާއި ދާއިރާގެ އިތުބާރާއި ލޯބި ފައިސަލް ހޯއްދަވާފައިވާ ކަމަށް އަބްދުއްރަހީމް ވިދާޅުވިއެވެ.
އަބްދުއްރަޙީމަކީ ރައީސް ޑރ. މުހައްމަދު މުއިއްޒު ވެރިކަމަށް ވަޑައިގެންއިރު އެންމެ އަރިސް ބޭފުޅާއެވެ. ފުރަތަމަ ހުންނެވީ ރައީސްގެ ޚާއްސަ އެޑްވައިޒަރެއްގެ ގޮތުގައެވެ. ޗީފް މިނިސްޓަރުގެ މަގާމުގައެވެ. އެއަށްފަހު، ރައްޔިތުންގެ މަޖިލީހުގެ ރައީސްކަން ވެސް އެމަނިކުފާނަށް ދެއްވީ ޚުދު ރައީސް ބޭނުންފުޅުވެގެންނެވެ.
ރައީސާއި އަބްދުއްރަޙީމްގެ ގުޅުން ފެށެނީ ޕީއެންސީ ސެނެޓުގައި ބޭއްވި ޕްރައިމަރީއާ ހަމައިންނެވެ. އެ ޕްރައިމަރީ ކާމިޔާބުކޮށް، އޭރު މާލޭ މޭޔަރަކަށް ހުންނެވި ރައީސް މުއިއްޒު ވެރިކަމަށް ގެނައުމަކީ ސިޔާސީ ހަޔާތުގެ އެންމެ ކާމިޔާބު، އެންމެ ބުރަ، މަސައްކަތުގެ ގޮތުގައި އަބްދުއްރަޙީމް އޭރު ވެސް ވިދާޅުވިއެވެ.