ތުރުކީން ރާއްޖެއަށް ދޭން ނިންމާފައިވާ ސްކޮލަޝިޕްތަކަކަށް ކުރިމަތިލާން ފުރުސަތު ހުޅުވާލައިފިއެވެ.
ހަޔާ އެޑިއުކޭޝަން މިނިސްޓްރީން ކުރި އިއުލާނެއްގައި ބުނީ ސްކޮލަޝިޕްގެ ފުރުސަތަށް ކުރިމަތިލުމުގެ މުއްދަތު ހަމަވާނީ އަންނަ މަހުގެ 12 ވަނަ ދުވަހުގެ މެންދުރު 14:00އާ ހަމައަށް ކަމަށެވެ.
ތުރުކީން ދޭ ސްކޮލަޝިޕްތަކުގައި ބެޗްލާސް، މާސްޓާސް އަދި ޕީއެޗްޑީ ހެދުމުގެ ފުރުސަތު ލިބޭނެއެވެ.
މި ސްކޮލަޝިޕްގެ ފުރުސަތުތަކަށް ކުރިމަތިލެވޭނީ މިނިސްޓްރީގެ ޕޯޓަލް މެދުވެރިކޮށެވެ.
ސްކޮލަޝިޕްތަކާ ގުޅޭގޮތުން އިތުރު މައުލޫމާތު ހޯދުމަށް މިނިސްޓްރީގެ ވެބްސައިޓް، މެއިލް ނުވަތަ 1474ކަށް ގުޅުމަށް މިނިސްޓްރީން ވަނީ އެދިފައެވެ.
ރައީސް ޑރ. މުހައްމަދު މުއިއްޒު ނޮވެމްބަރު 2023ގައި ތުރުކީއަށް ކުރެއްވި ދަތުރުފުޅުގައި އެ ގައުމުން ވަނީ ކޮންމެ އަހަރަކު ރާއްޖެއަށް އެކި ދާއިރާތަކުން މަތީ ތައުލީމު ހާސިލުކުރަން 30 ސްކޮލަޝިޕްގެ ފުރުސަތު ދިނުމަށް ނިންމައިފައެވެ.
ރައީސް މުއިއްޒު މީގެ ކުރިން ވަނީ، މަތީ ތައުލީމު ހާސިލުކުރަން ބޭނުންވާ ކުދިންނާއި މީހުންނަށް ފަހި ފުރުސަތުތައް ރާއްޖެއިން ބޭރުން ފަހިކޮށްދެއްވާނެ ކަމަށް ވިދާޅުވެފައެވެ.