ފުލުހުން ތަހުގީގު ކުރަމުން އަންނަ މަސްތުވާތަކެތީގެ މައްސަލައެއްގައި ދިވެހި އަންހެނަކު ހޯދަން ފުލުހުން މިއަދު އިއުލާނުކޮށްފިއެވެ.
ފުލުހުން މިއަދު ނެރެފައިވާ އިއުލާނެއްގައި ވަނީ ފުލުހުންގެ ޑްރަގް އެންޑް ޓްރެފިކިން އިންވެސްޓިގޭޝަނުން ތަހުގީގު ކުރަމުންދާ މައްސަލައެއްގެ ތަހުގީގަށް މީހަކު ހާޒިރުކުރުމަށް ބޭނުންވެ، އުޅޭ ވަކިތަނެއް ނޭނގުމުގެ ސަބަބުން ތަހުގީގަށް ހާޒިރުވުމަށް ޗިޓު ރައްދުކުރެވިފައިނުވާ ކަމަށެވެ.
ފުލުހުން ވަނީ އެ މައްސަލައާއި ގުޅިގެން ހޯދަމުންދާ ފަރާތުގެ ވަނަވަރު ވެސް ހާމަކޮށްފައެވެ.
އެގޮތުން މި މައްސަލައިގައި ފުލުހުން ހޯދަމުން އަންނަނީ، ފްރެސްލައިޓް، މާލެ، އުމުރުން 37 އަހަރުގެ އާމިނަތު ޝިފާނާއެވެ. އަދި އޭނާ ހާޒިރުކުރަނީ ތަހުގީގަށް ސުވާލުކުރުމަށް ކަމަށް ފުލުހުން ވަނީ ބުނެފައެވެ.
އެހެންކަމުން ޖިނާއީ މައްސަލަތައް ތަހުގީގުކުރުމުގައި ފުލުހުން އަމަލުކުރާ އިޖުރާއަތުގެ ގަވާއިދުގެ 27 ވަނަ މާއްދާގެ ދަށުން ތަހުގީގަށް ހާޒިރުވުމަށް، ސާޖަންޓް އާދަމް ހަލީމް ކްރިމިނަލް އިންވެސްޓިގޭޝަން ބިލްޑިންއަށް އަންނަ މަހުގެ ނުވަވަނަ ދުވަހުގެ 14:00 އަށް ނުވަތަ ވީ އެންމެ އަވަހަކަށް ހާޒިރުވުމަށް ފުލުހުން ވަނީ އަންގައިފައެވެ.