ހުޅުމާލޭގައި މިދިޔަ ބުރާސްފަތި ދުވަހު ހިނގި އަލިފާނުގެ ހާދިސާގައި 13 އަހަރުގެ ކުޑަކުއްޖަކު ފިހުނު މައްސަލަ ފުލުހުން ތަހުގީގުކުރަން ފަށައިފިއެވެ.
މީޑިއާތަކާ ހިއްސާކުރި މެސެޖެއްގައި ފުލުހުން ބުނީ 13 އަހަރުގެ ފިރިހެން ކުއްޖަކު ފިހިގެން ފަރުވާދެމުންދާ ކަމަށް ފުލުހުންނަށް ލިބުނު މައުލޫމާތަކާ ގުޅިގެން ފުލުހުން އެކަމުގެ މައުލޫމާތު ހޯދައި، އެ މައްސަލަ ހަމަ އެ ރޭ ތަހުގީގުކުރަން ފަށާފައިވާ ކަމަށެވެ.
އަދި އެ ކުއްޖާއަށް އަދިވެސް ފަރުވާދެމުން ދަނީ ހުޅުމާލެ ހޮސްޕިޓަލުގައި ކަމަށް ފުލުހުން މިއަދު މައުލޫމާތު ދިނެވެ.
އަދި އެ ހާދިސާ ހިނގި ގޮތް ބެލުމުގެ މަސައްކަތް ތަހުގީގުގެ ތެރެއިން ކުރަމުންދާ ކަމަށް ވެސް ފުލުހުން ބުންޏެވެ.
ހުޅުމާލެ ހޮސްޕިޓަލްގެ މީޑިއާ އޮފިޝަލަކު "ސަން" އަށް އެ ރޭ މައުލޫމާތިދިން ގޮތުގައި އެ ހާދިސާގައި ކުއްޖާގެ ހަށިގަނޑަށް ސީރިއަސް ގެއްލުންތަކެއް ލިބިފައެއް ނެތެވެ. ނަމަވެސް ކޮންމެ ވެސް ވަރަކަށް ހަށިގަނޑުގެ ތަންތަން ފިހިފައި ހުރި ކަމަށް އޮފިޝަލް ވިދާޅުވިއެވެ.
"ސީރިއަސް އެއްވެސް ކަހަލަ އަނެއްހެން މޭޖާ ބާނިންއެއް ނެތޭ. ފިހިގެން ގެނައި ކޭސްއެއް. އަޅުގަނޑަކަށް [ހަށިގަނޑުން ފިހުނު] ޕަސެންޓޭޖެއް ދަންވަކާށް ނޭނގޭ،" އޮފިޝަލް އެ ރޭ ވިދާޅުވިއެވެ.
ފިހިގެން ގެންނަ ކޭސްތައް އަވަހަށް ޑިސްޗާޖު ނުކުރާނެކަން އޭނާ ވަނީ ފާހަގަކުރައްވައިފައެވެ.
އެ ހާދިސާއާ ގުޅިގެން ސުވާލުކުރުމުން އެމްއެންޑީއެފުން ބުނީ، ހުޅުމާލޭގައި އެ ރޭ އަލިފާނުގެ ހާދިސާއެއް ހިނގިކަމުގެ ރިޕޯޓެއް ލިބިފައި ނެތް ކަމަށެވެ. އެހެންވެ ހާދިސާ ހިނގަން މެދުވެރިވި ސަބަބު އެނގިފައެއް ނުވެއެވެ.