މި ސަރުކާރުގެ އެންމެ ފުރަތަމަ ޓޫރިޒަމް މިނިސްޓަރުކަމުގެ މަގާމުގައި ހުންނެވި ރައްޔިތުންގެ މަޖިލީހުގެ ރައީސް އަބްދުއްރަޙީމް އަބްދުﷲގެ ދަރިކަލުން އިބްރާހިމް ފައިސަލް މިއަދު އެ މަގާމުން ވަކިކުރެއްވި ނަަމަވެސް ކުރިއަށް އޮތްތަނުގައި ސިޔާސީ މަސައްކަތްތަކުން މާ ގަދަކޮށް ފެންނާނެކަމަށް މިއަދު ވިދާޅުވެއްޖެއެވެ.
މިއަދު ހެނދުނު ރައީސް އޮފީހުން ވަނީ ފައިސަލް މިނިސްޓަރުކަމުން ވަކިކުރިކަން ހާމަކޮށްފައެވެ. އޭގެ އިތުރަށް އެއްވެސް މައުލޫމާތެއް ހާމަކޮށްފައެއް ނުވެއެވެ.
އިތުރަށް އެ އޮފީހުން ބުނީ ފަތުރުވެރިކަމާ ބެހޭ ވުޒާރާގެ ކަންކަން ވަގުތީ ގޮތުން ބަލަހައްޓަވާނީ އިގުތިޞާދީ ކަންކަމާ ބެހޭ ވަޒީރު މުޙައްމަދު ސައީދު ކަމަށެވެ.
ކުއްލި ގޮތަކަށް ފައިސަލް މަގާމުން ވަކިކުރެއްވިއިރު، ސޯޝަލް މީޑިއާގައި ފައިސަލަަށް ކޮރަޕްޝަންގެ ބައެއް ކަހަލަ ތުހުމަތުތައް ވެސް ވަނީ ކުރެވިފައެވެ.
މަގާމުން ވަކިކުރުމާ ގުޅިގެން "ސަން"އާ ވާހަކަަދައްކަވަމުން ފައިސަލް ވިދާޅުވީ އޭނާއަށް މަގާމުން ވަކިކުރިކަމުގެ ސިޓީ ލިބިވަޑައިގަތީ މިއަދު ހެނދުނު ކަމަށެވެ. ރައީސް އޮފީހުން ފޮނުވި ސިޓީގައި ވެސް މަގާމުން ވަކިކުރީ ކީއްވެކަން ބުނެދީފައިނުވާ ކަމަށް ފައިސަލް ވިދާޅުވިއެވެ.
މީގެ އިތުރުން ފައިސަލް ވިދާޅުވީ ސިޔާސީ ގޮތުން ދެން ކުރިއަށްދާނެ ވަކި ގޮތެއް ނިންމަވާނީ ބައްޕާފުޅު އަބްދުއްރަހީމާ ވެސް މަަޝްވަރާކުރެއްވުމަށް ފަހުގައި ކަމަށެވެ.
"އިރާދަކުރެއްވިއްޔާ ސިޔާސީ މަސައްކަތުގައި މިއަށްވުރެ ގަދަޔަށް ފެންނާނެ. މިހާރު ދެން މިހުރީ ސަރުކާރާ އެކުގައެއް ނޫން ދެއްތޯ،" ފައިސަލް ވިދާޅުވިއެވެ.
ފައިސަލް ވިދާޅުވީ ފަތުރުވެރިކަމާ ބެހޭ ވަޒީރެއްގެ ގޮތުގައި ޚިދުމަތްކުރައްވަން ލިބިވަޑައިގެންނެވި ފުރުސަތުގައި ވަރަށް އިޚްލާސްތެރިކަމާއެކު ޚިދުމަތް ކުރެއްވި ކަމަށެވެ.
ފައިސަލް ވިދާޅުވީ މީގެ ކުރިން އެ މަގާމުގައި ތިއްބެވި މިނިސްޓަރުންނަށް ކޮރަޕްޝަންގެ ބޮޑެތި ތުހުމަތުތައް ކުރެވުނު ކަމަށެވެ.
ނަމަވެސް އޭނާ ޚިދުމަތްކުރެއްވި 15 ވަރަކަށް މަސްދުވަހުގެ ތެރޭ ކޮރަޕްޝަނަށް މަގުފަހިވާ އެއްވެސް ކަމެއް ކުރައްވައިފައި ނުވާނެ ކަމުގެ ޔަގީންކަން ވަނީ ދެއްވައިފައެވެ.
ފާހަގަކޮށްލެވޭ ގޮތުގައި މަޖިލީހުގެ ރައީސް އަބްދުއްރަޙީމް ވެސް ސިޔާސީ ހަރަކާތަކުން ނުފެންނަތާ ދުވަސްތަކެއް ވަނީ ވެފައެވެ. އިތުބާރުހުރި ބައެއް މަސްދަރުތަކުން މީގެ ކުރިން 'ސަން'އަށް ކަށަވަރުކޮށްދީފައިވާ ގޮތުގައި ވެރިކަންކުރާ ޕީއެންސީގައި އެންމެ އިސްކޮށް ތިއްބެވި ދެ ބޭފުޅުންގެ މެދުގައި އޮތް ގުޅުން މި ފަހުން ވަނީ ގޯސްވެފައެވެ.