ހޮލީވުޑްގެ ބައެއް ނަން ފާހަގަކުރެވޭ ތަރިން ހިމެނޭ ގޮތަށް އެޕަލްގެ އައިފޯން ބޭނުންކޮށްގެން ތުރިލާ ފިލްމެއް ތައްޔާރުކޮށްފިއެވެ.
ތަފާތު އެކި ކަހަލަ ބޮޑެތި ފިލްމު އުފައްދާ ޕްރޮޑަކްޝަން ކަމަށްވާ އައިއެފްސީ ފިލްމްސްއިން ތައްޔާރު ކޮށްފައިވާ މި ފިލްމު ވަނީ ފިލްމު ފެސްޓިވަލްތަކުގައި މިހާރު ދައްކާފައެވެ. އާންމުންނާއި ކްރިޓީކުންގެ ފަރާތުން ފިލްމަށް ވަނީ އެވަރެޖް ރޭޓިން އެއް ލިބިފައެވެ.
"އިންހެރިޓެންސް" ނަމަކަށް ކިޔާ މި ފިލްމަކީ ތުރިލާ ފިލްމެކެވެ.
ރައިސް އިފާންސް (ހައުސް އޮފް ޑްރެގަން) އާއި ފީބީ ޑިނެވާ (ބްރިޖަޓަން) ލީޑުން ފެންނަ މި ފިލްމަކީ ޒުވާން އަންހެނަކު ބައިނަލްއަގުވާމީ ކޮންސްޕިރަސީ އެއްގައި ތާށިވެ އެކަމުން ސަލާމަތްވުމަށް މަސައްކަތް ކުރާތަން ދައްކުވައިދޭ ފިލްމެކެވެ. މި ފިލްމުގައި ޔޫރަޕުގެ ބައެއް ސަރަހައްދުތައް ފެނިގެންދާނެއެވެ.
އިންހެރިޓެންސް އެއްކޮށް ޝޫޓު ކޮށްފައިވަނީ އެޕަލްގެ އެންމެ ފަހުގެ ފޯނު އައިފޯނު 16 ޕްރޯއިންނެވެ. ލޮގް ފޯމެޓުގައި ޝޫޓު ކުރުމަށްފަހު މި ފިލްމު ވަނީ ކަލާގްރޭޑްކޮށް އެޑިޓް ކޮށްފައެވެ.
ފިލްމުގެ ޝޫޓިން އާ ގުޅޭގޮތުން މައުލޫމާތު ދެމުން ފީބީ ބުނެފައިވަނީ ފޯނުން ޝޫޓު ކުރުމުގެ ސަބަބުން އެއިން ފަސޭހަ ތަކާއި އުނދަގޫތައް ހުރި ކަމަށެވެ. އެގޮތުން ބޮޑެތި ސެޓަޕްތަކެއް ތައްޔާރުވާން ވަގުތު ބޭނުން ނުވާ ކަމަށް އޭނާ ފާހަގަކޮށްފައެވެ. ނަމަވެސް ގިނަ އިރު ޑައިލޮގްތައް ދަސްކުރަން ޖެހުމާއި އެއް ބުރުން ގިނަ މަންޒަރުތައް ހުއްޓައި ނުލައި އެއް ޝޮޓުން ނަގަން ޖެހޭ ކަމަށް އޭނާ ބުންޏެވެ. އެއާ ގުޅިގެން އުނދަގޫތަކެއްވި ކަމަށް އޭނާ ފާހަގަކުރިއެވެ.
މި ފިލްމު މިއަހަރުގެ ތެރޭގައި ސިނަމާގައި އެޅުވުމަށް ވަނީ ހަމަޖެހިފައެވެ. ނަމަވެސް ދައްކަން ފަށާނެ ދުވަހެއް އަދި ހާމަކޮށްފައެއް ނުވެއެވެ.