އެމެރިކާގެ އާ ސަރުކާރުން އެގައުމުގައި ދިރިއުޅޭ މައިގްރެންޓުން ހާއްސަކޮށް މެކްސިކޯ އަށް ނިސްބަތްވާ މީހުން ޑީޕޯޓުކުރަން ފެށުމާ ގުޅިގެން މަޝްހޫރު އެކްޓަރު އަދި ލަވަކިޔުންތެރިޔާ ސެލީނާ ގޮމޭޒަށް ރޮވިއްޖެއެވެ.
ޑޯނަލްޑް ޓްރަމްޕްގެ ސަރުކާރުގެ އެގްޒެކިއުޓިވް އޯޑަރުތަކުގެ ތެރޭގައި މައިގްރެންޓުން ގައުމުން ޑީޕޯޓު ކުރުމަށް ގިނަ މަސައްކަތްތަކެއް ކުރާނެ ކަމަށް ވަނީ ހާމަކޮށްފައެވެ. އެއާއެކު އެމެރިކާގެ އިމިގްރޭޝަން އެންޑް ކަސްޓަމްސް އެންފޯސްމެންޓް (އައިސް) އިން އަންނަނީ އެތައް ބަޔަކު ޑިޕޯޓު ކުރަމުންނެވެ. އެގޮތުން ހަފުތާ ބަންދުގައި އެކަނި ވެސް ވަނީ 956 އިމިގްރަންޓުން ފުލުހުންގެ ބެލުމުގެ ދަށަށް ގެންގޮސްފައެވެ.
https://x.com/PopBase/status/1883914666029752803
ސެލީނާއަށް އިމިގްރަންޓުންގެ ވާހަކަ އަކީ ވަރަށް މުހިއްމު ވާހަކައެއް ކަމުގައި އޭނާ ވަނީ މީގެ ކުރީ ވެސް ހާމަކޮށްފައެވެ. އެއީ އޭނާގެ އާއިލާއަށް ނިސްބަތްވާ މީހުން ވެސް އޭގެތެރޭގައި ހިމެނޭތީއެވެ.
މީގެކުރީން ދިން އިންޓަވިއުއެއްގައި ސެލީނާ ބުނެފައިވަނީ 1970 އިން ފެށިގެން އޭނާގެ އާއިލާގެ އެތައް ބަޔަކު މެކްސިކޯ އިން އެމެރިކާއަށް ބަދަލުވެފައިވާ ކަމަށެވެ. އެހެންވީމާ އެމީހުން ގައުމުން ބޭރު ކުރާތީ އެކަމާ ކަންބޮޑުވާ ކަމަށް އޭނާ ވަނީ ކުރިން ވެސް ބުނެފައެވެ.
ދާދިފަހުން ސޯޝަލް މީޑިއާއަށް ޕޯސްޓު ކުރި ވީޑިއޯއެއްގައި ސެލީނާ ވަނީ ރޮމުން އެތައް ބައެއްގެ ކިބައިން މައާފަށް އެދިފައެވެ. އެގޮތުން އެތައް ބަޔަކު ބޭރު ކުރާތީ އެކަމާ ކުރެވޭނެ އެއްވެސް ކަމެއް ނުފެންނަ ކަމަށް ސެލީނާ ބުންޏެވެ. އެއްވެސް ކަމެއް ކުރެވެން ނެތުމަކީ އެކަމާ ރޮވޭ ވަރު ކަމެއް ކަމަށް ސެލީނާ ފާހަގަކުރިއެވެ.
މި ވީޑިއޯ އާންމުކުރުމުން އާންމުންގެ ފަރާތުން ސެލީނާއަށް ރައްދުވީ ފާޑުކިޔުމެވެ. އަދި ސަމާލުކަން ހޯދަން މަސައްކަތް ކުރަނީ ކަމަށް އެތައް ބަޔަކު ސެލީނާއަށް ދިމާލަށް ބުންޏެވެ. އެކަމާ ގުޅިގެން އޭނާ ވަނީ މިހާރު ސޯޝަލް މީޑިއާއިން ވީޑިއޯ ޑިލީޓު ކޮށްލާފައެވެ.