މަޝްހޫރު ލިޔުންތެރިޔާ ކޮލީން ހޫވާގެ މަޝްހޫރު ވާހަކަ "ވެރިޓީ"އަށް ބިނާކޮށް އުފައްދާފައިވާ ތްރިލާ ފިލްމު، ބޮކްސް އޮފީހުގެ އެއްވަނައަށް އެރުމަށް މިސްރާބު ޖަހައިފިއެވެ.
ހޮލީވުޑްގެ މަގުބޫލު ފިލްމީ ތަރިން ކަމަށްވާ އެން ހެތަވޭ އަދި ޑަކޯޓާ ޖޯންސަން މުހިންމު ރޯލުތަކުން ފެންނަ މި ފިލްމު އިއްޔެ ސިނަމާތަކުގައި އަޅުވާފައިވާއިރު އޭގެ ކުރިން ބޭއްވި ޕްރިވިއު ޝޯތަކުން އެކަނިވެސް ވަނީ 4.5 މިލިއަން އެމެރިކާ ޑޮލަރުގެ އާމްދަނީއެއް ހޯދާފައެވެ.
އެމެޒޯން އެމްޖީއެމްގެ މި ފިލްމު، ރިލީޒްކުރާ ފުރަތަމަ ހަފުތާ ބަންދުގައި 30 މިލިއަނާއި 35 މިލިއަން ޑޮލަރާ ދެމެދުގެ އާމްދަނީއަކާއެކު ބޮކްސް އޮފީހުގެ އެއްވަނަ ހޯދާނެ ކަމަށް ވަނީ ލަފާކުރެވިފައެވެ. މިއީ "ދަ އޮޑިސީ" އަދި "ދަ ޑެވިލް ވެއާސް ޕްރާޑާ 2" އަށްފަހު، ހެތަވޭގެ ފިލްމެއް ބޮކްސް އޮފީހުގެ އެއްވަނައަށް އަރާނެ ތިންވަނަ ފަހަރެވެ.
ޖުމްލަ 40 މިލިއަން ޑޮލަރުގެ ބަޖެޓަކުން އުފެއްދި "ވެރިޓީ" ވާނީ ކޮލީން ހޫވާގެ ވާހަކަތަކަށް ބިނާކޮށް ފަހަކަށް އައިސް އުފައްދާފައިވާ ފިލްމުތަކުގެ ތެރެއިން ބޮޑު ކާމިޔާބީއެއް ހޯދާނެ އަނެއް ފިލްމަށެވެ. މީގެ ކުރިން ނެރުނު ފިލްމުތަކުގެ ތެރޭގައި 2024 ވަނަ އަހަރު ނެރުނު "އިޓް އެންޑްސް ވިތު އަސް" އާއި، 2025 ވަނަ އަހަރުގެ "ރިގްރެޓިންގް ޔޫ" އަދި މި އަހަރުގެ ކުރީކޮޅު ނެރުނު "ރިމައިންޑާސް އޮފް ހިމް" ހިމެނެއެވެ.
ފިލްމު "ޑިގާ" އަދި "ވެރިޓީ"ގެ ޕޯސްޓަރެއް--ފޮޓޯ/ވެރައިޓީބްލޭކް ލައިވްލީ މުހިންމު ރޯލެއް އަދާކުރި "އިޓް އެންޑްސް ވިތު އަސް" އަކީ 50 މިލިއަން ޑޮލަރުގެ ފެށުމަކާއެކު، މުޅި ދުނިޔެއިން 350 މިލިއަން ޑޮލަރުގެ އާމްދަނީއެއް ހޯދި މި ސީރީޒްގެ އެންމެ ކާމިޔާބު ފިލްމެވެ. ނަމަވެސް "ވެރިޓީ" ވާނީ 17 މިލިއަން ޑޮލަރުން ފެށި "ރިމައިންޑާސް އޮފް ހިމް" އާއި 13.6 މިލިއަން ޑޮލަރުގެ ފެށުމެއް ލިބުނު "ރިގްރެޓިންގް ޔޫ" ފަހަތަށް ޖައްސާލައި، ދެވަނައަށް އެންމެ ބޮޑު އާމްދަނީއެއް ހޯދާ ފިލްމަށެވެ.
މި ފިލްމުގައި ބަތަލާ ހެތަވޭ ފެންނާނީ އެކްސިޑެންޓަކަށްފަހު ލިޔުންތެރިކަމާ ދުރުވެ، އެކަހެރި ދިރިއުޅުމެއް އުޅެމުންދާ ލިޔުންތެރިޔާ ވެރިޓީ ކްރޯފޯޑްގެ ރޯލުންނެވެ. ވެރިޓީގެ ފުރިހަމަނުވެ އޮތް ވާހަކަ ނިންމުމަށްޓަކައި އޭނާގެ ފިރިމީހާ (ޖޯޝް ހާޓްނެޓް) ހަވާލުކުރަނީ ލޯވެން އަޝްލީ (ޑަކޯޓާ ޖޯންސަން) އާއެވެ. ނަމަވެސް މި މަސައްކަތުގެ ތެރެއިން ލޯވެންއަށް ވަދެވެނީ ސިއްރުތަކާއި ދޮގުތަކުން ފުރިގެންވާ ނުރައްކާތެރި ކަންތައްތަކެއްގެ ތެރެއަށެވެ.
މި ހަފުތާ ބަންދުގައި ރިލީޒްކުރި އެހެން ފިލްމުތަކާ އަޅާބަލާއިރު "ވެރިޓީ" އުޅެނީ ވަރަށް ބޮޑަށް ކުރީގައެވެ. އެގޮތުން ހޮލީވުޑްގެ ކުޅަދާނަ އެކްޓަރު ޓޮމް ކްރޫޒްގެ "ޑިގާ"އަށް ލިބެމުންދަނީ ވަރަށް ދަށް ތަރުހީބެކެވެ. އަލެހަންޑްރޯ ގޮންޒާލޭޒް އިނާރިތޫ ޑައިރެކްޓްކޮށްފައިވާ "ޑިގާ" ވެގެންދާނީ މިއަހަރު ބޮކްސް އޮފީހުގައި އެންމެ ބޮޑު ގެއްލުމަކާ ކުރިމަތިލާނެ އެއް ފިލްމަށެވެ.
ޕްރިވިއު ޝޯތަކުން އެ ފިލްމަށް ލިބިފައިވަނީ އެންމެ 1.2 މިލިއަން ޑޮލަރެވެ. އަދި 125 މިލިއަން ޑޮލަރުގެ ބަޖެޓަކުން އުފެއްދި މި ފިލްމަށް ފުރަތަމަ ހަފުތާ ބަންދުގައި ލިބޭނެ ކަމަށް ލަފާކުރެވެނީ އެންމެ 12 މިލިއަނާއި 15 މިލިއަން ޑޮލަރާ ދެމެދުގެ އާމްދަނީއެކެވެ.
ތިމާވެށީގެ ކާރިސާއަކުން ދުނިޔެ ސަލާމަތްކުރަން މަސައްކަތްކުރާ ތެޔޮ ވިޔަފާރިވެރިއެއްގެ ރޯލު ކްރޫޒް ކުޅެފައިވާ މި ފިލްމަށް ފާޑުކިޔުންތެރިންގެ ފަރާތުން ފާޑުކިޔުންތައް އަމާޒުވެފައިވީ ނަމަވެސް، ކްރޫޒް އަދި ފިލްމުގެ ޓީމުން ވަނީ އަމިއްލައަށް ސިނަމާއަށް ގޮސް ފިލްމު ބަލައި ވަޒަންކުރުމަށް ބެލުންތެރިންގެ ކިބައިން އެދިފައެވެ.