މަޝްހޫރު ހޮލީވުޑް ތަރި ހޭލީ ބެރީ، އޭނާގެ 12 އަހަރުގެ ދަރިފުޅަށް ޖިސްމާނީ އަނިޔާކުރި ކަމަށް ތުހުމަތުކޮށް، ކުރީގެ ފިރިމީހާ އޮލިވިއޭ މާޓިނޭޒް އޭނާއާ ދެކޮޅަށް ރައްކާތެރިކަމުގެ އަމުރަކަށް އެދި ކޯޓަށް މައްސަލަ ހުށަހަޅައިފިއެވެ.
މާޓިނޭޒް ކޯޓަށް ހުށަހެޅި ލިޔެކިޔުންތަކުގައި ބަޔާންކޮށްފައިވާ ގޮތުގައި، މިދިޔަ ސެޕްޓެމްބަރު މަހުގެ 26 ވަނަ ދުވަހު ހޭލީ ވަނީ އެ މީހުންގެ 12 އަހަރުގެ ދަރިފުޅު މޭސިއޯގެ ކަރުގައި ހިފާ ނޭވާ ހާސްކޮށްލަން މަސައްކަތްކޮށްފައެވެ.
މި ހާދިސާއާ ގުޅިގެން މާޓިނޭޒް ވަނީ ދަރިފުޅުގެ ފުރިހަމަ ބެލެނިވެރިކަން އޭނާއަށް ހޯދުމަށް ވެސް ކޯޓުގައި އެދިފައެވެ. މީގެ އިތުރުން، ވޭތުވެދިޔަ މަދު އަހަރުތަކެއްގެ ތެރޭގައި ވެސް ހޭލީގެ ފަރާތުން ދަރިފުޅަށް ޖިސްމާނީ އަދި ނަފުސާނީ ގޮތުން އަނިޔާތަކެއް ލިބިފައިވާ ކަމަށާއި، ޚަރަދުގެ މައްސަލަތަކާ ގުޅުވައިގެން ދަރިފުޅާ ދައްކާފައިވާ ވާހަކަތަކުގެ ސަބަބުން ނަފުސާނީ ގޮތުން ނޭދެވޭ އަސަރުތަކެއް ކޮށްފައިވާ ކަމަށް ވެސް އޭނާ ތުހުމަތުކުރެއެވެ.
މާޓިނޭޒް އިތުރަށް ބުނެފައިވަނީ، ދަރިފުޅާއި މަންމައާ ދެމެދު އޮތް ގުޅުން އެއްކޮށް ކަނޑާލަން ބޭނުން ނުވި ނަމަވެސް، ހޭލީ އޭނާގެ އަމަލުތަކަށް ފުރިހަމައަށް ޒިންމާދާރުވަންދެން ދަރިފުޅާ ބައްދަލުކުރުން ވަގުތީގޮތުން މެދުކަނޑާލަން ޖެހޭ ކަމަށެވެ. އަދި ކުރިމަގުގައި ދަރިފުޅާ ބައްދަލުކުރާ ވަގުތުތަކުގައި އެއްވެސް ބާވަތެއްގެ މަސްތުވާތަކެތި ނުވަތަ ރަލުގެ ނުފޫޒުގައި ހުރެގެން ނުވާނެ ކަމަށް ކަނޑައަޅައި، އަމުރެއް ނެރެދިނުމަށް ވެސް އޭނާ ވަނީ އެދިފައެވެ.
ހޭލީ ބެރީ ދަރިފުޅު މޭސިއޯއާ އެކު--ފޮޓޯ/ފޭސްބުކްމި ތުހުމަތުތައް ދޮގުކުރަމުން ހޭލީ ބެރީގެ ވަކީލު މެރީނާ ބެކް ނެރުނު ބަޔާނެއްގައި ބުނެފައިވަނީ، މާޓިނޭޒްގެ މި ހުށަހެޅުމަކީ އެއްވެސް އަސާސެއް ނެތް، ޙަޤީޤަތް އޮޅުވާލުމަށް ކޮށްފައިވާ ދަށުދަރަޖައިގެ ކަމެއް ކަމަށެވެ. އަދި މާޓިނޭޒަކީ ތަކުރާރުކޮށް ކޯޓު އަމުރުތަކާ ޚިލާފުވެ، ދަރިފުޅުގެ ތަޢުލީމީ އަދި ނަފުސާނީ ދުޅަހެޔޮކަމަށް ހުރަސްއަޅަމުންދާ ފަރާތެއް ކަމަށާއި، އެކަން ސާބިތުވާނެ ޤާނޫނީ ހެކި އެބަހުރި ކަމަށްވެސް ވަކީލު ފާހަގަކުރިއެވެ.
ވަކީލު އިތުރަށް ފާހަގަކުރިގޮތުގައި، މާޓިނޭޒްގެ މި އަމަލަކީ އޭނާގެ މިޒާޖުގައި ހުންނަ ހަރުކަށި އަދި ބޭއަދަބީ ސިފަތަކުގެ ސަބަބުން ހައިރާންވާންޖެހޭ ކަމެއް ނޫން ކަމަށެވެ. އަދި މިފަދަ ދޮގު އިލްޒާމުތަކުގެ ސަބަބުން ހޭލީ ފަސްނުޖެހޭނެ ކަމަށާއި، ދަރިފުޅުގެ ޙައްޤުގައި ކުރަންޖެހުނު ކޮންމެ ކަމެއް ކުރާނެ ކަމުގެ ޔަޤީންކަން ވަނީ ދީފައެވެ.
ހޭލީ ބެރީ އާއި އޮލިވިއޭ މާޓިނޭޒް 2013 ވަނަ އަހަރު ކުރި ކައިވެނި ރޫޅާލުމަށް ކޯޓަށް ހުށަހެޅީ 2015 ވަނަ އަހަރެވެ. މި މައްސަލައާ ގުޅިގެން ހޭލީ ބެރީގެ ފަރާތުން ރަސްމީކޮށް އަދި ވަކި އެއްޗެއް ހާމަކޮށްފައެއް ނުވެއެވެ.