ރެކޯޑު އަދަދަކަށް ގްރެމީ އެވޯޑު ހޯދާފައިވާ މަޝްހޫރު ލަވަކިޔުންތެރިޔާ ޓޭލާ ސުވިފްޓް، އޭނާގެ އެންމެ ފަހުގެ އަލްބަމް 'ދަ އައިލެންޑަ'ގެ އިތުރު ލަވަތަކާއެކު ނެރުނު 'ދަ އައިލެންޑަ: އެންކޯ' އާއެކު މިއަހަރުގެ އެންމެ ގިނަ ރެކޯޑުތަކެއް މުގުރާލި އަންހެން ފަންނާނުގެ މަޤާމު ހޯދައިފިއެވެ. މި ރިލީޒާއެކު އޭނާ ވަނީ މި އަހަރު ސްޕޮޓިފައިގައި އެއް ދުވަސްތެރޭ އެންމެ ގިނައިން ސްޓްރީމް ކުރެވުނު އަންހެން އާޓިސްޓުގެ ރެކޯޑު ޤާއިމުކޮށްފައެވެ.
ސުވިފްޓް މި އާ ލަވަތައް ނެރުނީ ސަޕޯޓަރުންގެ މެދުގައި ބޮޑު ޝައުޤުވެރިކަމެއް އުފެއްދުމަށްފަހު، އެކި ކަހަލަ ސިއްރު އިޝާރާތްތަކެއް ދިނުމަށްފަހުގައެވެ. މިގޮތުން އެންމެ ފުރަތަމަ އިޝާރާތެއް ފެނުނީ އެމީ އެވޯޑްސްގެ ތެރެއިން 'ލޯ އެންޑް އޯޑަރ: އެސްވީޔޫ'ގެ ސްކިޓެއްގެ ތެރެއިންނެވެ.
އޭގެ ފަހުން، މި ހަފުތާގައި 'ޕޭޝަންޓް ޒީރޯ' ރިލީޒްކުރާނެކަން އިއުލާނުކޮށް، އެ ލަވައިގެ ލިމިޓެޑް އެޑިޝަން ތިން ސީޑީ އޭނާގެ ވެބްސައިޓުގައި ވިއްކަން ބެހެއްޓިއެވެ. ނަމަވެސް، ޖެހިގެން އައި ދުވަހު ސުވިފްޓް ވަނީ ހައިރާންކުރުވަނިވި ނިންމުމެއް ނިންމައި، ހަމައެކަނި އެއް ލަވައިގެ ބަދަލުގައި ހަތަރު އާ ލަވައާއެކު 'ދަ އައިލެންޑަ: އެންކޯ' ހުކުރު ދުވަހު ރިލީޒްކުރާނެކަން އިއުލާނުކޮށްފައެވެ. މި ކަލެކްޝަންގައި ހިމެނެނީ 'ޕޭޝަންޓް ޒީރޯ'، 'ކްލީވްލޭންޑް'، 'ޕިންކް ކްލައުޑިންގް' އަދި 'ބެބިލޯން'އެވެ.
ޓޭލާ، ފިރިމީހާ ޓްރެވިސްއާ އެކު--ފޮޓޯ/ވެރައިޓީސުވިފްޓް ދެން އެންމެ އަވަހަށް ފެންނާނީ އެމްޓީވީ ވީޑިއޯ މިއުޒިކް އެވޯޑްސް (ވީއެމްއޭ)ގައެވެ. މި ހަފުލާގައި އޭނާގެ 'ޕޭޝަންޓް ޒީރޯ'ގެ މިއުޒިކް ވީޑިއޯ އަލަށް ދައްކާލުމުގެ އިތުރުން، އެންމެ ފުރަތަމަ ފަހަރަށް ދޭ 'އާޓިސްޓް-ޑައިރެކްޓަ އެވޯޑު' އޭނާއަށް ދޭނެއެވެ.
އޮސްކާ އެވޯޑު ހޯދާފައިވާ ސިނެމަޓޯގްރަފަރު އެމަނުއެލް ލުބެޒްކީގެ ސިނެމަޓޯގްރަފީ ހިމެނޭ މި މިއުޒިކް ވީޑިއޯއިން ސުވިފްޓްގެ އިތުރުން ހޮލީވުޑްގެ މަޝްހޫރު ތަރިން ކަމަށްވާ ޑެކޯޓާ ޖޯންސަން އަދި ކޮލިން ފަރެލް ވެސް ފެންނާނެއެވެ.