ޓޫރިޒަމް މިނިސްޓްރީގެ ސްޓޭޓް މިނިސްޓަރުގެ މަގާމުގައި ހުރެ، ޓެރަރިޒަމްގެ ވާހަކަ ދެއްކުމުން ސަސްޕެންޑު ކުރި މުޙައްމަދު ނިހާދު، ފިނޭންސް މިނިސްޓްރީގެ ސްޓޭޓް މިނިސްޓަރުގެ މަގާމަށް އައްޔަން ކޮށްފިއެވެ.
"ސަން"އަށް އެނގިފައިވާ ގޮތުގައި އޭނާ އެ މަގާމަށް އައްޔަން ކޮށްފައި ވަނީ މިދިޔަ ބުރާސްފަތި ދުވަހުއެވެ.
ނިހާދު ޓޫރިޒަމް މިނިސްޓްރީގެ ސްޓޭޓް މިނިސްޓަރުގެ މަގާމުން މިދިޔަ ޑިސެމްބަރު މަހުގެ 24ވަނަ ދުވަހު ސަސްޕެންޑު ކުރީ ވެރިކަންކުރާ ޕީއެންސީން ބޭއްވި ޖަގަހަ ޖަލްސާއެއްގައި ދެއްކެވި ވާހަކައަކާ ގުޅިގެންނެވެ.
އެގޮތުން އޭނާގެ ވާހަކައިގައި ވަނީ ފަތުރުވެރިން ރާއްޖެ އައުމަށް ބިރުވެރިކަން އުފެދޭ ފަދަ މާހައުލެއް އުފެދެން މަގުފަހިވާނެހެން އިދިކޮޅު އެމްޑީޕީގެ ވެރިންނަށް ތުހުމަތުތަކެއް ކުރައްވައިފައެވެ. އެ ތުހުމަތުތައް އޭނާ ގުޅުވައިލީ އެއީ އިދިކޮޅުން ރާވައިގެން ސަރުކާރުން ދެ މިލިއަން ފަތުރުވެރިން ގެނައުމަށް މިދިޔަ އަހަރު ކަނޑައެޅި އަމާޒަށް ހުރަސް އަޅަން ކުރާ ކަމެއްގެ ގޮތުގައެވެ.
ނިހާދަކީ އެމްޑީޕީގެ ޓިކެޓުގައި 19ވަނަ މަޖިލީހަށް ހޮވިވަޑައިގެން، އައްޑޫ ސިޓީ ފޭދޫ ދާއިރާ ތަމްސީލު ކުރެއްވި މެންބަރެކެވެ. ނަމަވެސް މި ސަރުކާރު ވެރިކަމަށް އައުމުން އޭނާ ޕީއެންސީއަށް ސޮއި ކުރައްވާ އެ ޕާޓީގެ ހަރަކާތްތަކުގައި ބައިވެރިވާން ފެށިއެވެ.