ތަޣައްޔަރުވެފައި އޮތް ސިޔާސީ މަސްރަހު ސާފުކޮށް، ޑިމޮކްރެޓްސް ވަރުގަދަކުރާނަން: އިންތި

ހެޔޮ ވެެރިކަމެއް ކުރެވޭނީ ވެސް މިހާރު ތަޣައްޔަރުވެފައި އޮތް ރާއްޖޭގެ ސިޔާސީ މަސްރަހު ސާފުކޮށްގެންކަމަށާއި، ކުރިއަށް ތަނުގައި ދަ ޑިމޮކްރެޓްސްގެ މަސައްކަތް ބައްޓަންކުރާނީ ސިޔާސީ މަސްރަހު ސާފުކޮށް، އެ ޕާޓީއަށް ތާއީދު ހޯދައި ވަރުގަދަކުރަން ކަމަށް ދަ ޑިމޮކްރެޓްސްގެ އާ ރައީސް ކުރީގެ މެންބަރު އިމްތިޔާޒު ފަހުމީ މިރޭ ވިދާޅުވެއްޖެއެވެ.

ޕާޓީގެ ރައީސްގެ ހައިސިއްޔަތުން ފުރަތަމަ ފަހަރަށް އާންމު މެންބަރުންނާ ވާހަކަދައްކަވަމުން އިންތި ވިދާޅުވީ ޕާޓީގެ ހުރިހާ މެންބަރުން ވެސް ދެމިތިބެންވާނީ މިހާރު އެ ޕާޓީ ބިނާވެފައިވާ ބިންގަލުގެ މަތީގައި ކަމަށެވެ. އާ ލީޑާޝިޕުން މަސައްކަތްކުރާނީ އެ ބިންގަލުގެ މަތީ، ރައްޔިތުންގެ ތާއީދާއި މަގުބޫލުކަން ހޯދައި އިތުރުކުރުމަށް ކަމަށް ވެސް އިންތި ވިދާޅުވިއެވެ.

އަދި މިއަދު ކުރަންވެފައި އޮތް މަސައްކަތަކީ ތަޣައްޔަރުވެފައި އޮތް ރާއްޖޭގެ ސިޔާސީ މަސްރަހު ސާފުކުރުން ކަމަށް ވެސް އިންތި ވިދާޅުވިއެވެ.

"ތަޣައްޔަރު ވެފައި އޮތް ސިޔާސީ ކްލައިމެޓެއްގައި މިވަގުތުގައި އެންމެ ބޮޑަށް ބޭނުންވަނީ ހަމަ ހަގީގަތުގައި ވެސް ބޭނުންވާނީ މީހުން އިތުބާރުކުރާ ސާފު ޕާޓީއެއް. އެ ސާފު ޕާޓީއަށް ނޫނިއްޔާ މި ރާއްޖޭގައި ތަޣައްޔަރުވެފައިވާ ސިޔާސީ ކްލައިމެޓް ސާފެއް ވެސް ނުކުރެވޭނެ،" އިންތި ވިދާޅުވިއެވެ.

އޭނާ ވިދާޅުވީ ތަޣައްޔަރުވެފައި އޮތް ސިޔާސީ މަސްރަހު ސާފުކުރުމުގެ މަސައްކަތް މިއަދު އަދި އެ ޕާޓީއަށް ނުކުރެވުނެއް ކަމަކު، "މިއަދުވެސް، މާދަމާ ވެސް، އޭގެ ފަހުން ވެސް މަސައްކަތްކުރާނީ އެ މަގަށް" ކަމަށެވެ.

"އިރާދަކުރެއްވިއްޔާ މި މަގަށް ގޮސް ރާއްޖޭގެ ރައްޔިތުން ބަލައިގަންނަ، އަޅުގަނޑުމެން ރައްޔިތުންނަށް ހުށަހަޅާ ސިޓީ އުރައެއްގައި ދޭ ފައިސާ ފޮއްޗަކަށެއް ނޫން، އަޅުގަނޑުމެން ވެރިކަމަކަށް އައުމަށް ނުޙައްގު ގޮތުގައި ބަހައި ވަޒީފާ ތަކަކަށް ނޫން ތާއީދު ހޯދަންވީކީއެއް،" އިންތި ވިދާޅުވިއެވެ.

އިންތި ވިދާޅުވީ ޑިމޮކްރެޓްސްއަށް ތާއީދު ހޯދަންވާނީ އެ ޕާޓީގެ ހަރުދަނާ ސިޔާސަތުތައް ވިއްކައިގެން ކަމަށެވެ. އަދި ރާއްޖޭގެ ވެރިކަމުގެ ނިޒާމު ހަރުދަނާކޮށް ކޮރަޕްޝަން ނައްތައިލުމަށް ކުރާ މަސައްކަތުން ރައްޔިތުންގެ އިތުބާރު ހޯދައިގެން ކަމަށް އިންތި ވިދާޅުވިއެވެ.

https://sun.mv/201854

މީގެ އިތުރުން އިންތިވަނީ ޑިމޮކްރެޓްސްގައި ހުންނަވާއިރު ލިބޭ އެއް ހިތްހަމަޖެހުމަކީ، އެ ޕާޓީއަކީ އެއްވެސް މިންވަރަކަށް ވަގުފޯމެއް ހުށަަހަޅައިގެން މެންބަރަކު މިހާތަނަށް ވެސް ވަދެފައިވާ ޕާޓީއަކަށް ނުވުން ކަމަށެވެ.

މިރޭވަނީ އެ ޕާޓީގެ ގައުމީ މަޖިލީހުގެ ބައްދަލުވުމެއް ބާއްވައިފައެވެ. 34 މެންބަރުން ބައިވެރިވި މި ޖަލްސާގައި މިރޭވަނީ ރައީސްކަމުގެ މަގާމަށް 34 ވޯޓުން އިންތި ހޮވައި ހޮވައި، އެ ކަން އިއުލާނުކޮށްފައެވެ. އަދި ނައިބު ރައީސަކަށް ކުރީގެ މެންބަރު މުޙައްމަދު ވަހީދު (ވައްޑޭ)ވަނީ ހޮވައިފައެވެ.

ޑިމޮކްރެޓްސްގެ ސިޔާސީ ހަރަކާތްތައް މި ފަހުން ވަރަށް މަދުވެފައި އޮތް އިރު މި ފަހުން އެ ޕާޓީ އުފައްދަން އިސްކޮށް އުޅުނު، ބައެއް މެންބަރުން ޕާޓީންވަނީ ވަކިވެފައެވެ.

ހަރަކާތްތައް މަދުވެފައި އޮތްއިރު، މިދިޔަ ޑިސެމްބަރު މަހުގެ ތެރޭ އެ ޕާޓީން ބޮނޑިބަތް ޕާކުގައި ޖަލްސާތަކެއް ބާއްވައި އަޑުއުފުލައިފައިވެއެވެ.