ދަ ޑިކޮމްރެޓްގެ ހުސްވެފައިވާ ރައީސްކަމުގެ މަގާމަށް އެ ޕާޓިގެ ތަރުޖަމާނު އަދި ރައްޔިތުންގެ މަޖިލީހުގެ މާފަންނު އުތުރު ދާއިރާގެ ކުރީގެ މެމްބަރު އިމްތިޔާޒް ފަހުމީ (އިންތި) މިރޭ ހޮވައިފިއެވެ.
މިރޭވަނީ އެ ޕާޓީގެ ގައުމީ މަޖިލީހުގެ ބައްދަލުވުމެއް ބާއްވައިފައެވެ.
އެ ބައްދަލުވުމުގައި ވަނީ އެ ޕާޓީގައި އިސްކޮށް ހަރަކާތްތެރިވާ ކުރީގެ މަޖިލިސް މެންބަރުންނާއި، އާންމު މެންބަރުން ބައިވެރިވެފައެވެ. އޮންލައިންކޮށް ވެސް ޖަލްސާގައި މެންބަރުން ބައިވެރިވެފައިވެއެވެ. އޭގެ ތެރޭގައި މާފަންނު މެދު ދާއިރާގެ ކުރީގެ މެންބަރު އިބްރާހިމް ރަޝީދު (ބޮންޑޭ) އާއި ވިލުފުށީ ދާއިރާގެ ކުރީގެ މެންބަރު ހަސަން އަފީފު ހިމެނިވަޑައިގަންނަވައެވެ.
ޑިމޮކްރެޓްސް ގައުމީ މަޖިލީހުގެ ބައްދަލުވުމުގެ ތެރެއިން -- ފޮޓޯ: ޑިމޮކްރެޓްސް
މިރޭގެ ޖަލްސާގައިވަނީ އެ ޕާޓީގެ ރައީސްކަމުން ހަސަން ލަތީފް އިސްތިއުފާ ދެއްވައި އެނބުރި އެމްޑީޕީއަށް ވަޑައިގަތުމުން ހުސްވި އެ މަގާމަށް ވޯޓަށް އަހައިފައެވެ.
އަދި އެ ޕާޓީގެ ނައިބު ރައީސްގެ މަގާމުގައި ހުންނެވި މުހައްމަދު ޝިފާޒް (ޝިއްޕެ) ވެސް ޕާޓީން ވަކިވުމުން ހުސްވި، މަގާމަށް ވޯޓަށް އަހައިފައެވެ.
އެ ދެ މަގާމަށް ވެސް ކުރިމަތިލެއްވީ އެންމެ ބޭފުޅެކެވެ. އެއީ ރައީސްކަމަށް އިންތި އަދި، ނައިބުކަމަށް ކުރީގެ މެންބަރު މުޙައްމަދު ވަހީދު (ވައްޑޭ)އެވެ.
ރައީސްކަމުގެ މަގާމަށް އިންތި ކުރިމަތިލެއްވިއިރު 34 ވޯޓުން އެ މަގާމު އިންތި ވަނީ އެ މަގާމަށް މިރޭ ހޮވައި، އެ ކަން އިއުލާނުކޮށްފައެވެ. އަދި ނައިބު ރައީސަކަށް ވައްޑޭވަނީ ހޮވައިފައެވެ.
އެއާއެކު، ވަގުތީ ގޮތުން ރައީސްކަމުގައި ހުންނެވި ޕާޓީގެ ނައިބު ރައީސްގެ މަޑަވެލި ދާއިރާގެ ކުރީގެ މެންބަރު މުހައްމަދު ފިރުޝާން ވަނީ ޖަލްސާގެ ރިޔާސަތު އިންތިއަށް ހަވާލުކުރައްވައިފައެވެ.
ޑިމޮކްރެޓްސްގެ ސިޔާސީ ހަރަކާތްތައް މަދު ނަމަވެސް މިދިޔަ ޑިސެމްބަރު މަހުގެ ތެރޭ އެ ޕާޓީން ބޮނޑިބަތް ޕާކުގައި ޖަލްސާތަކެއް ބާއްވައި އަޑުއުފުލައިފައިވެއެވެ.