ވެރިކަން ކުރާ ޕާޓީ ޕީއެންސީއަށް މެމްބަރުން އިތުރުކުރަން ވަގު ފޯމު ހުށަހެޅިކަމަށް ބުނާ މައްސަލަައިގައި ފިޔަވަޅު އަޅާނެކަމުގެ ޔަގީންކަން ޕްރޮސެކިއުޓާ ޖެނެރަލްގެ އޮފީސް (ޕީޖީ)އިން އިދިކޮޅު އެމްޑީޕީއަށް ދީފައިވާކަމަށް އެ ޕާޓީން މިރޭ ބުނެފިއެވެ.
ވަގު ފޯމުތަކުގެ މައްސަލަ އެމްޑީޕީންވަނީ އެންޓި ކޮރަޕްޝަން ކޮމިޝަން (އޭސީސީ)އަށާއި، ޕީޖީ އޮފީހަށް މި މަހުގެ 16ވަނަ ދުވަހު ވައްދައިފައެވެ.
މި މައްސަލަ ކުރިއަށްދާ ގޮތުގެ ތަފްސީލް ހިއްސާކުރައްވަމުން އެމްޑީޕީގެ އިސް ބޭފުޅަކު "ސަން"އަށް ވިދާޅުވީ ޕީޖީ އޮފީހުން އެ މައްސަލައިގައި ތަހުގީގުތައް ނިމުމުން، ފިޔަވަޅު އަޅާނެކަމުގެ ޔަގީންކަންދީ ސިޓީއެއް ފޮނުވައިފައިވާ ކަމަށެވެ.
މި މައްސަލަ އެ ޕާޓީން ފުލުހަށް ވެސް، އަދި އިލެކްޝަންސް ކޮމިޝަނަށް ވެސް ވަނީ ހުށަހަޅައިފައެވެ. އަދި ވަކިވަކި ފަރުދުން ވެސް އަންނަނީ އެކަން އެހެން ހިނގައިގެން މައްސަލަ ހުށަހަޅަމުންނެވެ.
ޕީއެންސީން މި ފަހުން ހިންގި 'މެންބަޝިޕް ޑްރައިވް'ގައި ވަގު ފޯމު ފުރައިގެން އެ ޕާޓީއަށް މީހުން ވެއްދި މައްސަލަ ވަނީ ވަރަށް ބޮޑުވެފައެވެ. 'މެމްބަޝިޕް ޑްރައިވް' ހަރަކާތުގައި 75،000 އަށްވުރެ ގިނަ މެމްބަރުން އެ ޕާޓީއަށް ވައްދާފައިވެއެވެ. އޭގެ ތެރޭގައި އިދިކޮޅު އެމްޑީޕީގެ ގައުމީ މަޖިލީހާއި، އާއްމު މެންބަރުން ވެސް ހިމެނެއެވެ. އަދި ރައްޔިތުންގެ މަޖިލީހުގެ މިހާރުގެ މެމްބަރަކާއި، ކުރީގެ މެމްބަރަކު ވެސް ހިމެނެއެެވެ.