އެމްއެމްޕީއާރުސީ ކޮރަޕްޝަންގެ ތަހުގީގު ހިމެނޭހެން، އެންޓި ކޮރަޕްޝަން ކޮމިޝަން (އޭސީސީ)ގެ ތަހުގީގުތައް އަވަސްކުރަން ޕްރޮސެކިއުޓާ ޖެނެރަލް (ޕީޖީ) އައްބާސް ޝަރީފް މިއަދު އަމުރުކުރައްވައިފިއެވެ.
އޭސީސީގެ ތަހުގީގުތައް އެކަށީގެންވާ އަވަސްމިނެއްގައި ނުހިނގާކަމުގެ ޝަކުވާ ވަނީ ބޮޑުވެފައެވެ.
ޕީޖީ އޮފީހުން ބުނީ، ދައުލަތާއި އާންމު ރައްޔިތުންގެ މަސްލަހަތު މަތީ މިންވަރަކަށް ހިމެނޭ މައްސަލަތައް ހިމެނޭހެން އޭސީސީގެ ތަހުގީގުތައް ލަސްވާކަމުގެ ޝަކުވާ ލިބިފައިވާ ކަމަށެވެ. އެހެންވެ، ދައުލަތަށް ގެއްލޭ ފައިސާ ހޯދުމުގައާއި އާންމު ރައްޔިތުންނާއި ދައުލަތުގެ މަސްލަހަތަށް އުނިކަން އަންނަކަން ވެސް ޕީޖީގެ ސަމާލުކަމަށް ވަނީ އައިސްފައެވެ.
އެހެންވެ، ގާނޫނުއަސާސީގެ 223 ވަނަ މާއްދާގެ ދަށުން އޭސީސީން ތަހުގީގުކުރާ އެންމެހައި ޖިނާއީ މައްސަލަތައް ޕީޖީ އޮފީހަށް ހުށަހެޅުމުގައި އަމަލުކުރާނެ ގޮތުގެ އިރުޝާދެއް އެކުލަވާލައި، މިއަދުން ފެށިގެން އަމަލުކުރަން ޕީޖީ އައްބާސް ވަނީ އަމުރުކުރައްވައިފައެވެ.
އޭސީސީގެ ރައީސް އާދަމް ޝާމިލް: އޭސީސީގެ ތަހުގީގުތައް އަވަސްކުރަން ޕީޖީ ވަނީ އަމުރުކުރައްވާފައި -- ސަން ފޮޓޯ/ ނާއިޝް ނާހިދު
ޕީޖީ އޮފީހުން ނެރުނު ބަޔާނެއްގައި ބުނީ، ޕީޖީގެ އަމުރުގައި އޭސީސީން ތަހުގީގުކުރަމުންދާ އެމްއެމްޕީއާރުސީގެ ޚިޔާނާތުގެ މައްސަލައާއި ކޮވިޑުގެ ދުވަސްވަރު ދައުލަތުގެ މުދަލާއި ފައިސާ ނަހަމަގޮތުގައި ބޭނުންކުރި މައްސަލައާއި ސަރުކާރު ހިއްސާވާ ކުންފުނިތަކާއި، ބިންވެރިޔާ އަދި ގެދޮރުވެރިޔާ ސްކީމާ ގުޅުންހުރި މައްސަލަތައް ފަދަ މާލިއްޔަތާއި ފަރުދުންގެ މަސްލަހަތާ ގުޅުންހުރި ޚިޔާނާތުގެ ބޮޑެތި މައްސަލަތަކުގެ ތަހުގީގު އަވަހަށް ހިންގައި، އިރުޝާދާ އެއްގޮތަށް ޕީޖީއަށް ހުށަހަޅަން އަމުރުކުރައްވާފައިވާ ކަމަށެވެ.
މި އިރުޝާދުގެ ބޭނުމަކީ، އެ ކޮމިޝަނުން ތަޙުޤީޤުކުރާ މައްސަލަތަކުގެ ތަޙުޤީޤު އަވަސްކުރުމުގެ އިތުރުން، ތަޙުޤީޤުތަކުގެ މަރުޙަލާތައް ކުރިއަށްގެންދާނެ ސިސްޓަމިކް ގޮތްތަކެއް ކަނޑައެޅުމާއި، ޖިނާއީ މައްސަލަތައް ބަލާ އެކިއެކި އިދާރާތަކުން ހިންގާ ތަހުޤީޤުތަކުގެ ޔުނީފޯމިޓީ ކަށަވަރުކުރުމާއި، ތަޙުޤީޤުގެ ކުރީ މަރުޙަލާއިން ފެށިގެން މި އޮފީހުގެ ލަފާ ހޯދަން އިތުރަށް ފަސޭހަކޮށް، އެކަމާގުޅޭ އިންތިޒާމުތައް ހަމަޖެއްސުން ކަމަށް އެ ބަޔާނުގައި ވަނީ ބުނެފައެވެ.
އެމްއެމްޕީއާރުސީ ޚިޔާނާތުގެ މައްސަލަ އަވަހަށް ތަހުގީގުކުރަން އަމުރުކުރެއްވިއިރު، އެ މައްސަލައިގައި ހިމެނޭ މީހުންނާ އެކު ކުރިން ހަދާފައި އޮތް އިމިއުނިޓީ އެއްބަސްވުންތައް ވެސް މިހާރު ވަނީ ބާތިލުކޮށްފައެވެ.
އެ އެއްބަސްވުންތައް ބާތިލުކުރަން ޕީޖީ ނިންމެވުމާ ގުޅިގެން ރައީސް ޑރ. މުހައްމަދު މުއިއްޒު ވަނީ އެ ނިންމެވުމަށް މަރުހަބާ ވިދާޅުވެފައެވެ. އެމްއެމްޕީއާރުސީގެ މައްސަލަ ތަހުގީގުކޮށް، ދައުލަތަށް ގެއްލުނު ފައިސާ އަނބުރާ ހޯއްދަވާނެ ކަމަށް އެ މަނިކުފާނު މީގެ ކުރިން ވެސް ތަކުރާރުކޮށް ވިދާޅުވިއެވެ.