ކޮންމެ ތަނެއްގައި ޑިއުޓީ ކުރަންޖެހުނަސް، ވީ އެންމެ ރަނގަޅަކަށް ޚިދުމަތްދޭން ހޯމްލޭންޑް މިނިސްޓަރު އަލީ އިހުސާން ފުލުހުންނަށް ގޮވާލައްވައިފިއެވެ.
އިހުސާން މިހެން ގޮވައިލެއްވީ 38ވަނަ ޕޮލިސް އިނީޝިއަލް ޓްރެއިނިން ކޯހުގެ ދަސްވެނިންނާ ވާހަކަ ދައްކަވަމުންނެވެ.
މި އަހަރު ނިމުމުގެ ކުރިން ރާއްޖޭގެ ގިނަ ރަށްތަކެއްގައި ފުލުހުން ޚިދުމަތް ގާއިމް ކުރުމަކީ ސަރުކާރުގެ އަމާޒެކެވެ.
އިހުސާން ވިދާޅުވީ ރާއްޖޭގައި ދެމުން އަންނަ ފުލުހުންގެ ޚިދުމަތަކީ އުނދަގޫ ޚިދުމަތެއް ކަމަށެވެ. އެއީ ގުދުރަތީ ގޮތުން ރާއްޖޭގެ ރަށްތައް ދުރުދުރުގައި އުފެދިފައި ހުރުމުން، ދަތުރުފަތުރުގެ ދަތިކަން ވެސް އޮތުމުން ކަމަސް އިހުސާން ފާހަގަކުރެއްވިއެވެ.
އެ މަސައްކަތުގެ ތެރެއިން ގިނަ ފުލުހުން އެކިއެކި ރަށްރަށަށް ޑިޕްލޯއި ކުރެވޭނެކަން އިހުސާން ފާހަގަ ކުރެއްވިއެވެ. އަދި ކޮންމެ ފަހަރަކު ޑިއުޓީކުރަން ލިބޭނީ އެންމެ ހިތްއެދޭ ތަނުގައި ނޫން ކަމަށް ވިޔަސް، ކޮންމެ ދިމާލެއްގައި ކުރާ ޑިއުޓީގައި ވެސް ރައްޔިތުން ހިތްއެދޭ ގޮތަށް ޚިދުމަތްދޭން އަޒުމް ކަނޑައެޅުމަށް އިހުސާންވަނީ ފުލުހުންނަށް ގޮވާލައްވައިފައެވެ.
"މި ޚިދުމަތުގައި އުޅޭއިރުގައި އަޅުގަނޑުމެންނަށް އަބަދު ޚިދުމަތް ކުރަން ލިބޭނީ އެންމެ ހިތްއެދޭ ތަނުގައެއް ނޫން. އެހެން ނަމަވެސް އެ މީހާގެ ޑިއުޓީ ކޮންމެ ދިމާލަކަށް ޖެހުނަސް، އެންމެ ހިތް އެދޭގޮތަށް ޚިދުމަތް ދޭން އަޒުމް ކަނޑައަޅައިގެން، ޚިދުމަތުގެ ފެންވަރު އެންމެ ރަނގަޅަށް ދިނުމަކީ، ކޮންމެ ފުލުހެއްގެ އަޒުމަކަށް ވާންވާނެ،" އިހުސާން ވިދާޅުވިއެވެ.
އިހުސާންގެ ވާހަކައިގައިވަނީ ފުލުހުންގެ އަސާސީ ތަމްރީނުން ދަސްވެނިވި ކުދިންނަށް އަގުހުރި ނަސޭހަތްތަކެއް ދެއްވައިފައެވެ. އެ ގޮތުން ވެރިންނަށް ކިޔަމަންވުމާއި އިހުތުރާމާއި ލޯތްބާއެކު ރީތި ބަހުން މުއާމަލާތް ކުރުމާއި ކުރުމާއި، ޚިދުމަތް ދިނުމުގައި ރައްޔިތުމީހާއަކީ ތިމާގެ އެންމެ އިސްވެރިޔާކަމަށް ދެކުމަކީ ވަރަށް މުހިންމު ކަމެއް ކަމަށް ވިދާޅުވިއެވެ.
މީގެ އިތުރުން އިހުސާން ވިދާޅުވީ، މިދިޔަ އަހަރު ފުލުހުންގެ ޚިދުމަތް ރަނގަޅަށް ދެވުނު ކަމަށެވެ. އެހެން ނަމަވެސް އަދި މި އަހަރު، ފުލުހުންގެ ފަރާތުން ލިބޭ ޚިދުމަތާއެކު ރައްޔިތުން ކުރާ އުންމީދު މާ ބޮޑު ކަމަށް ވިދާޅުވިއެވެ. އެ ގޮތުން އިހުސާން އެދިވަޑައިގަތީ މި އަހަރު ވެސް ފުލުހުންގެ ފަރާތުން ރައްޔިތުން އެދޭ ފަދަ ޚިދުމަތްތަކެއް ދިނުމަށެވެ.
"ތިޔަ ފުލުހުންގެ ފަރާތުން އެ އޮތް އެކްސްޕެކްޓޭޝަންގެ ބާ، މިދިޔަ އަހަރަށްވުރެން މި އަހަރު މަތިވާނެ. އެންމެހައި ފުލުހުން ޚިދުމަތުގައި މިންކުރެވިގެންދާ ގޮތް މިދިޔަ އަހަރަށް ވުރެން މަތިވާނެ. މި ޗެލެންޖު އެކްސެޕްޓުކޮށްގެން ރައްޔިތުން އެދޭފަދަ ޚިދުމަތެއް ދިނުމަށް އަތުކުރި އޮޅާލައިގެން މިރޭ މި [ދަސްވެނިވެ] ނިމިގެންދާ ކުދިން ސަފުތަކަށް ގުޅުމަކީ އަޅުގަނޑުގެ އެދުން،" އިހުސާން ވިދާޅުވިއެވެ.
ފުލުހުންގެ 38ވަނަ އަސާސީ ތަމްރީނު ކޯހުގެ ދަސްވެނިވުން ޣައްސާން ޝަރަފުވެރިކޮށްދެއްވުން -- ފޮޓޯ: ފުލުހުން
މިރޭގެ ހަފްލާ ޝަރަފުވެރިކޮށްދެއްވައި ވާހަކަ ދައްކަވަމުން ޑިފެންސް މިނިސްޓަރި މުހައްމަދު ޣައްސާން މައުމޫން ވަނީ، ނަފްސަށްވުރެ ގައުމު އިސްކުރަން ފުލުހުންގެ ކިބައިން އެދިވަޑައިގެންފައެވެ. އަދި ފުލުހުންނަށް ގާނޫނީ ގޮތުން މަތިކޮށްފައިވާ ޒިންމާތަކުގެ މައްޗަށް އަލިއަޅުއްވާލެއްވިއެވެ.
ފުލުހުންނަކީ ބައިވަރު ޒިންމާތަކެއް ހަވާލުވެގެން މަސައްކަތް ކުރަމުން އަންނަ ބައެކެވެ. އެ މަސައްކަތުގެ ތެރެއިން ހަތަރު ކަމަކަށް ވަނީ ޚާއްސަ އިސްކަމެއް ދީފައެވެ. އެއީ ރާއްޖެއިން މަސްތުވާތަކެތި ނައްތައިލުމާއި، ގޭންގު ހަދައިގެން ކުރާ ކުށްތައް ހުއްޓުވުމާއި، ގަވާއިދާ ޚިލާފަށް އުޅެމުންދާ ބިދޭސީންގެ މައްސަލައަށް ޖުމްލަ ހައްލެއް ގެނައުމުގެ އިތުރުން، ކުށުގެ ކުށަށް އަރައިގަންނަ ކުޑަކުދިން ސަލާމަތް ކުރުމެވެ.