ކޮޅިގަނޑަކާ ގުޅިގެން މިހާރު ރާއްޖެއަށް ކުރަމުންދާ ވިއްސާރައިގައި ބޯކޮށް ވާރޭވެހި، ފަތުރުވެރިންނާއި ދިވެހީންގެ މެދުގައި މަގުބޫލު ރަށެއް ކަމަށްވާ ކ. މާފުށީގެ މަގުތަކުގައި ފެންބޮޑުވުމުން ފެން ހިންދުމުގެ މަސައްކަތް އެމްއެންޑީއެފްއިން ފަށައިފިއެވެ.
އެމްއެންޑީއެފްއިން ބުނީ ރާއްޖެއަށް މިހާރު ކުރަމުންދާ ވިއްސާރައިގައި މާފުށީގައި ފެން ބޮޑުވުމުގެ ސަބަބުން ފެން ހިންދުމުގައި އެމްއެންޑީއެފް މާލޭ އޭރިއާ ކޮމާންޑް، މާފުށީ ފަޔާ ސްޓޭޝަނުގެ ސިފައިން ހަރަކާތްތެރިވަމުން ދާކަމަށެވެ.
"ސަން"އަށް މައުލޫމާތު ދެމުން މާފުށީ ކައުންސިލްގެ މެމްބަރު އަލީ ޝަމްއޫން ވިދާޅުވީ އެރަށަށް ވާރޭ ވެހެންފެށި މިއަދުގެ 11:30 ހާއިރު ކަމަށެވެ. އަދިވެސް އެރަށަށް މެދު ކެނޑުމެންނެތި ބޯކޮށް ވާރޭ ވެހެމުން ދާކަން އޭނާ ވަނީ ފާހަގަކޮށްފައެވެ.
ޝަމްއޫން ވިދާޅުވީ ކައުންސިލާއި އެރަށުގެ މުއައްސަސާތަކުގެ އިތުރުން އެމްއެންޑީއެފްގެ އެހީތެރިކަމާއި އެކު ފެން ހިންދުމުގެ މަސައްކަތް ކުރަމުން އަންނައިރު، މިހާތަނަށް ދެ ގައަކަށް ފެން ވަދެގެން ރިޕޯޓުކޮށްފައި ވާކަމަށެވެ.
މޫސުމާ ބެހޭ ގައުމީ އިދާރާ މެޓް އޮފީހުން ވަނީ މެދުރާއްޖެ ތެރެއަށާއި ރާއްޖޭގެ އުތުރުގެ އެކި ހިސާބުތަކަށް ވިއްސާރަ ކުރާނެ ކަމަށާއި ބައެއް ރައްތަކަށް ގުގުރުމާއި އެކު ބޯކޮށް ވާރޭ ވެހުން އެކަށީގެން ވާކަމަށް ބުނެފައެވެ.
މެޓް އޮފީހުން ބުނީ ދެކުނުގެ އަތޮޅުތަކުގައި ހުޅަނގުއުތުރާއި އުތުރުން އަދި އެހެން ހިސާބުތަކުގައި އުތުރާއި އިރު އުތުރުން ގަޑިއަކު އަށް މޭލާއި 18 މޭލާއި ދެމެދު ބާރުމިނުގައި ވައި ޖެހޭނެ ކަމަށެވެ. އަދި ވިލާގަނޑުގައި ގަޑިއަކު 30 މޭލަށް ވައި ގަދަވާނެ ކަމަށް މެޓް އޮފީހުން ވަނީ ބުނެފައެވެ.
ރާއްޖޭގެ އުތުރުގެ އަތޮޅުތަކަށް ބޯކޮށް ވާރޭވެހުން އެކަށީގެންވާތީ މެޓުން ވަނީ އެކަމަށް ސަމާލުވުމަށް އިލްތިމާސް ކޮށްފައެވެ.