މަޝްހޫރު ބިރުވެރި ގޭމް ފްރެންޗައިޒް "ރެޒިޑެންޓް އީވިލް"އަށް ބިނާކޮށް، އަނެއްކާ ވެސް އާ ފިލްމެއް އުފެއްދުމަށް ތައްޔާރުވެއްޖެއެވެ.
ރެޒިޑެންޓް އީވިލް އެންމެ ފުރަތަމަ ސްކްރީނަށް އައިސްފައިވަނީ ފިލްމު ސީރީޒްއެއްގެ ގޮތުގައި 2002ވަނަ އަހަރު އެވެ. އެ ފިލްމު ސީރީޒް ބޮކްސް އޮފީހުގައި ކާމިޔާބު ވިޔަސް، ގޭމުގެ ފޭނުންނަށް ފިލްމު ކަމަކުނުދިޔައެވެ.
އެއަށްފަހު 2021ވަނަ އަހަރުވެސް ވަނީ ރެޒިޑެންޓް އީވިލްގެ ފިލްމެއް ނެރެފައެވެ. ގޭމުގެ އޮރިޖިނަލް ބައެއް ކެރެކްޓާސް އެ ފިލްމުން ފެނުނު ނަމަވެސް ޕްލޮޓް ގޯސްކަމުން އެ ފިލްމު ވެސް އާންމުންނަށް ކަމަކުނުދިޔަ އެވެ.
އެހާ ހިސާބުން ނިންމާނުލައި ނެޓްފްލިކްސް އިން ވަނީ ރެޒިޑެންޓް އީވިލްގެ ދުނިޔެއަށް ބިނާކޮށް ސީރީޒް އެއް 2022ވަނަ އަހަރު ނެރެފައެވެ. މި ސީރީޒް ވެސް ވެގެން ދިޔައީ ބޮޑު ފްލޮޕަކަށެވެ.
މިހާތަނަށް ނެރުނު ރެޒިޑެންޓް އީވިލްގެ ފިލްމުތަކާއި ސީރީޒް ތަކަކީ އޮރިޖިނަލް ގޭމްތަކުގެ ވާހަކައާ އެހާ ގާތްކޮށް އުފައްދާފައިވާ ޝޯތަކާއި ފިލްމުތަކެއް ނޫނެވެ. އެއާއެކު ކޮންމެ ފަހަރަކުވެސް ފޭނުންނަށް މި އުފެއްދުންތައް ވަނީ ބޮޑު ޖޯކަކަށެވެ.
އަނެއްކާވެސް މިހާރު ތައްޔާރުވަނީ ރެޒިޑެންޓް އީވިލްގެ ފިލްމެއް ނެރުމަށެވެ. މައުލޫމާތު ލިބޭގޮތުގައި އާ ފިލްމު ބިނާ ކުރާނީ ފުރަތަމަ ގޭމުގެ ޕްލޮޓު މައްޗަށެވެ. އަދި ގޭމްގެ ވާހަކަ އާ ވީހާވެސް ގާތްކޮށް މި ފިލްމު އުފެއްދުމަށް މަސައްކަތް ކުރާނެ ކަމަށް ރިޕޯޓުތަކުން ބުނެއެވެ.
މި ފިލްމު އުފެއްދުމުގެ މަސައްކަތް ކުރާނީ ޒެކް ކްރެގާއެވެ. ޒެކް އަކީ މަގުބޫލު ފިލްމުތައް ކަމަށްވާ "ބާބޭރިއަން" (2022) އާއި "މިސް މާޗު" (2016)، އުފައްދާފައިވާ ޑައިރެކްޓަރެކެވެ. އޭނާ ބުނާގޮތުގައި އަލަށް ނެރޭ ރެޒިޑެންޓް އީވިލް ފިލްމަކީ އޮރިޖިނަލް ގޭމާ އެއްގޮތަށް ބިރުވެރި ރަހަތަށް ގިނަ ފިލްމަކަށް ވާނެއެވެ.
އާ ފިލްމުގެ ކޮޕީރައިޓްސް ދޫކުރުމަށް މިހާރު ވަނީ ބިޑަށް ހުޅުވާލާފައެވެ. އަދި އެމެރިކާގެ ބޮޑެތި ޕްރޮޑަކްޝަންތައް ކަމަށްވާ ފޮކްސް ސްޓޫޑިއޯސް އާއި ނެޓްފްލިކްސް އަދި ވޯނާ ބްރޮސް އިން ވަނީ މި ފިލްމުގެ ރައިޓްސް ހޯދުމަށް ޝައުގުވެރިކަން ހުރި ކަން ހާމަކޮށްފައެވެ.
އަލަށް ނެރޭ ފިލްމުގެ މަސައްކަތް ފަށާނެ ދުވަހެއް އަދި ނޭނގެއެވެ. ނަމަވެސް ވަރަށް އަވަހަށް ކާސްޓުގެ މަސައްކަތް ނިމި ޝޫޓިން ފަށާނެ ކަމަށް ޒެކް މައުލޫމާތު ދެއެވެ.