ނޭޝަނަލް ސެންޓާ ފޯ ދި އާޓްސް (އެންސީއޭ)އިން ބާއްވާ އޮފީސްތަކުގެ ޑްރާމާ މުބާރާތުގައި ބައިވެރިވުމުގެ ފަހުވަގުތު ގާތްވެއްޖެއެވެ.
މިމުބާރާތުގެ ބައިވެރިވުމަށް ޝައުގުވެރިވާ ފަރާތްތަކަށް އެންމެ ފުރަތަމަ ފުރުސަތު ހުޅުވާލާފައިވަނީ މިދިޔަ ޑިސެމްބަރު މަހުގެ ތެރޭގައެވެ. އެއީ މިދިޔަ މަހުގެ 15ގެ ނިޔަލަށެވެ. ނަމަވެސް އެންސީއޭއިން ފަހުން ވަނީ އެ މުއްދަތު މާދަމާގެ ނިޔަލަށް އިތުރުކޮށްފައެވެ.
މުބާރާތުގައި ބައިވެރިވުމަށް އަދި ހަމައެކަނި ޖެހޭނީ ފޯމު ފުރައި އެ ފޯމާއެކު ޑްރާމާގެ މައުލޫމާތު ހިމަނާށެވެ. ޑްރާމާގެ މަސައްކަތް ފަށާނީ ބައިވެރިވާ ފަރާތްތައް ފައިނަލްވެ ބައިވެރިވުމުގެ މުއްދަތު ހަމަވުމުންނެވެ.
އެންސީއޭއިން ބުނީ، މި މުބާރާތަކީ މުނިފޫހިފިލުވުމުގެ ދާއިރާއަށް ފަންނާނުން އިތުރުކޮށް، ފަންނުވެރީންނަށް ހިތްވަރުދީ، އަގުވަޒަންކޮށް، އެކުވެރި ވާދަވެރި މަހައުލެއްގައި ފަންނުވެރިކަން ތަރައްޤީކޮށް ދެމެހެއްޓުމުގެ މަގުސަދުގައި ބާއްވާ މުބާރާތެއް ކަމަށެވެ.
އެގޮތުން މިމުބާރާތުގައި ބައިވެރިވެވޭނީ ސަރުކާރު އޮފީސްތަކާއި މިނިވަން މުވައްސަސާތަކާއި ސަރުކާރު ހިއްސާވާ ކުންފުނިތަކުގެ އިތުރުން ރަށު ކައުންސިލް، އަތޮޅު ކައުންސިލް އަދި ސިޓީ ކައުންސިލްތަކަށް ކަމަށް އެންސީއޭއިން ވަނީ ބުނެފައެވެ.
އޮފީސްތަކުގެ މެދުގައި ބާއްވާ ޑްރަމާ މުބާރާތަކީ ރަމަޟާން މަހާ ދިމާކޮށް އެންސީއޭއިން ކުރިއަށްގެންދާ ހަރަކާތެކެވެ. މިއީ ކޮންމެ އަހަރަކު ވެސް ގިނަ ބައެއްގެ މަގުބޫލުކަން ހޯދާ ކާމިޔަބު މުބާރާތެކެވެ.
ގިނަ ދުވަސްތަކެއް ވަންދެއް ބާއްވަމުން އަންނަ މި މުބާރާތް ބޮޑު މެދުކެނޑުމަކަށްފަހު އަލުން ފަށާފައި ވަނީ މިދިޔަ އަހަރުގައެވެ. މިދިޔަ އަހަރު މުބާރާތް އަލުން ފަށާފައި ވަނީ ފަސް އަހަރުގެ މެދުކެނޑުމަކަށް ފަހުގައެވެ.