ކެމްބްރިޖު މުގައްރަރަށް ކިޔަވަދޭނޭ ފޮތްތައް ލިޔުމުގެ ފުރުސަތު ދިވެހި މުދައްރިސުންނަށް އެޑިއުކޭޝަން މިނިސްޓްރީން މިއަދު ހުޅުވާލައިފިއެވެ.
އެ މިނިސްޓްރީއިން ވަނީ ކީ ސްޓޭޖު 4 (ގްރޭޑް 9 އަދި 10)ގެ މުގައްރަރުތަކަށް ބޭނުންވާ ފޮތްތައް ލިޔުމާއި ޑިޖިޓަލް ކޮންޓެންޓް ތައްޔާރުކުރުމަށް މިއަދު ހުޅުވާލާފައެވެ.
އެހެންކަމުން މިކަމަށް އެދި، ޕްރޮޕޯސަލް ހުށަހެޅުމުގެ ސުންގަޑި އަންނަ ފެބުރުއަރީ މަހުގެ 13ވަނަ ދުވަހު މެންދުރުފަހު 14:00އަށް ހަމަވާއިރު މި މަސައްކަތާ ގުޅޭ ގޮތުން އެއްވެސް ސުވާލެއް އޮތްނަމަ އަންނަ ބުރާސްފަތި ދުވަހުގެ 13:00ގެ ކުރީން އީމެއިލް މެދުވެރިކޮށް މިނިސްޓްރީއާ ހިއްސާލުކުރުމަށް އެ މިނިސްޓްރީން ވަނީ އެދިފައެވެ.
އަދި ޕްރޮޕޯސްލް ހުށަހެޅުމުގެ ފުރުސަތު އެކަމަށް ޝަރުތުހަމަވާ އެންމެންނަށް ވެސް މިނިސްޓްރީން ވަނީ ހުޅުވާލާފައެވެ.
ކެމްބްރިޖު އިމްތިހާނުގެ މުގައްރަރުތަކަށް ފެންވަރު ރަނގަޅު ފޮތްތަކާއި ޑިޖިޓަލް ކޮންޓެންޓު އުފެއްދުމުގެ ގާބިލްކަން ދިވެހި މުދައްރިސުންގެ ކިބައިގައި ހުރިކަމަށް އެޑިއުކޭޝަން މިނިސްޓަރު ޑރ. އިސްމާއިލް ޝަފީއު ވަނީ މީގެ ކުރިން ވިދާޅުވެފައެވެ.
ޝަފީއު ވިދާޅުވީ އޭރުން ފޮތް ގަތުމަށް ރާއްޖެއިން ބޭރަށް ކުރާ ހޭދަ ގައުމުގެ ތެރޭގައި ހިފެހެއްޓުމާއި، އެފަދަ ފޮތް ލިޔުމުގެ ހުނަރުވެރިކަން އިތުރުވުގެން ދާނެ ކަމަށެވެ.
އަދި މިހާރު ބޭރުން ގަނެގެން ދަރިވަރުންނަށް ފޯރުކޮށްދޭ ފޮތްތައް ބޭނުންނުކުރުމުގެ ސަބަބުން އިސްކޫލުތަކުން ނޯޓު ޕްރިންޓުކުރުމަށް ކުރާ ހޭދަ ކުޑަކުރެވުމުގެ އިތުރަށް ތިމާވެއްޓާ ރައްޓެހި އާދަކާދަތައް އަށަގަންނެވުމަށް އިތުރު ބާރަކަށް އެކަން ވާނެ ކަމަށް މިނިސްޓަރު ޝަފީއު ވަނީ ވިދާޅުވެފައެވެ.