ކެމްބްރިޖު އިމްތިހާނުގެ މުގައްރަރުތަކަށް ފެންވަރު ރަނގަޅު ފޮތްތަކާއި ޑިޖިޓަލް ކޮންޓެންޓު އުފެއްދުމުގެ ގާބިލްކަން ދިވެހި މުދައްރިސުންގެ ކިބައިގައި ހުރިކަމަށާއި، އަންނަ ހަފުތާގައި ފޮތްތައް ލިޔަން ޝައުގުވެރިވާ މުދައްރިސުންނަށް އެ ފުރުސަތު ހުޅުވާލާނެ ކަމަށް އެޑިއުކޭޝަން މިނިސްޓަރު ޑރ. އިސްމާއިލް ޝަފީއު އިއްޔެ ވިދާޅުވެއްޖެއެވެ.
ފޭސްބުކްގައި ކުރެއްވި ޕޯސްޓެއްގައި މިނިސްޓަރު ޝަފީއު ވިދާޅުވީ ރާއްޖޭގައި ރާއްޖެއިން ބޭރުގެ މުގައްރަރުތަކަށް ކިޔަވައިދީގެން ސާނަވީ އިމްތިހާނުތައް ބާއްވާތާ ޒަމާންތަކެއް ވެއްޖެ ކަމަށެވެ.
އެގޮތުން 1968ގައި ޔުނިވަސިޓީ އޮފް ލަންޑަން އެގްޒަމިނޭޝަން އެންޑް އެސެސްމެންޓް ކައުންސިލް (ޔޫއެލްއީއޭސީ)ގެ އިމްތިހާނު ރާއްޖޭގައި ދޭން ފަށައި، ފަހުން އެ އިމްތިހާނު އެޑްއެކްސެލްއަށް ރީބްރޭންޑުކުރެވި، 2001 ވަނަ އަހަރާ ހަމައަށް ކުރިއަށް ގެންދެވުނުކަން ފާހަގަކުރެއްވިއެވެ. އަދި ސްކޫލުތަކުގެ ސާނަވީ އިމްތިހާނު، ކެމްބްރިޖު އިންޓަނޭޝަނަލް އެގްޒަމިނޭޝަނަށް 2002ގައި ބަދަލުކޮށް، އެ އިމްތިހާނު ހަދާތާ ވެސް 23 އަހަރުވެއްޖެ ކަމަށް ޝަފީއު ވިދާޅުވިއެވެ.
އެހާ ދިގު މުއްދަތެއް ފާއިތުވިއިރުވެސް އެ އިމްތިހާނު ހަދާ މާއްދާތަކުގެ ފޮތްތައް ގެންނަމުން ދަނީ ރާއްޖެއިން ބޭރުން ކަމަށްވާއިރު، ކެމްބްރިޖު އިމްތިހާނުގެ މުގައްރަރުތަކަށް ފެންވަރު ރަނގަޅު ފޮތްތަކާއި ޑިޖިޓަލް ކޮންޓެންޓު އުފެއްދުމުގެ ގާބިލުކަން ދިވެހިރާއްޖޭގެ މުދައްރިސުންގެ ކިބައިގައި ހުރިކަމަށް ގަބޫލުކުރައްވާ ކަމަށް ޝަފީއު ވިދާޅުވިއެވެ.
ދަރިވަރުންނާއެކު ޓީޗަރެއް: ސްކޫލު ކުދިންނަށް ރިޕޯޓު ފޯމު ދެނީ -- ސަން ފޮޓޯ/ މުޙައްމަދު މާވީ
އެގޮތުން މިނިސްޓްރީން ބޭރުން ގަނެގެން ދަރިވަރުންނަށް ފޯރުކޮށްދޭ ފޮތްތަކުގެ ބަދަލުގައި ގިނަ އިސްކޫލުތަކުގައި ދަރިވަރުން ބަރޯސާވަމުން ދަނީ ވެސް ރާއްޖޭގެ މުދައްރިސުން ތައްޔާރުކޮށް ދަރިވަރުންނަށް ދޭ ނޯޓުތަކަށް ކަމަށް އޭނާ ވިދާޅުވިއެވެ.
އަދި ބޭރުން ގަނެގެން މިހާރުދެވޭ މަސައްކަތު ފޮތަށް ވުރެ މާ ފެންވަރު ރަނގަޅު، ސީދާ އިމްތިހާނަށް އަމާޒުކުރެވިފައިވާ ފޮތްތައް ވެސް ރާއްޖޭގެ މުދައްރިސުން ތައްޔާރުކޮށްފައިވާކަން ފާހަގަކުރައްވާފައިވެއެވެ.
"އަޅުގަނޑު ގަބޫލުކުރަނީ ފުރުސަތު ފަހިކޮށް އެކަށީގެންވާ އަގެއްގައި މިފަދަ ފުރުސަތެއް ދިވެހި މުދައްރިސުންނަށް ހުޅުވާލައިފިނަމަ އޭގެ މަންފާ ބޮޑުވާނެކަމެށް،" ޝަފީއު ވިދާޅުވިއެވެ.
ޝަފީއު ވިދާޅުވީ އޭރުން ފޮތް ގަތުމަށް ބޭރަށް ކުރާ ހޭދަ ގައުމުގެ ތެރޭގައި ހިފެހެއްޓުމާއި، އެފަދަ ފޮތް ލިޔުމުގެ ހުނަރުވެރިކަން އިތުރުވުގެން ދާނެ ކަމަށެވެ. އަދި މިހާރު ބޭރުން ގަނެގެން ދަރިވަރުންނަށް ފޯރުކޮށްދޭ ފޮތްތައް ބޭނުންނުކުރުމުގެ ސަބަބުން އިސްކޫލުތަކުން ނޯޓު ޕްރިންޓުކުރުމަށް ކުރާ ހޭދަ ކުޑަކުރެވުމުގެ އިތުރަށް ތިމާވެއްޓާއި ރައްޓެހި އާދަކާދަތައް އަށަގަންނެވުމަށް އިތުރު ބާރަކަށް އެކަން ވާނެ ކަމަށް ޝަފީއު ވިދާޅުވިއެވެ.
"އިރާދަކުރެއްވިއްޔާ، މިއަންނަ ހަފްތާގައި ފޮތްތައް ލިޔަން ޝައުގުވެރިވާ ފަރާތްތަކަށް ފުރުސަތު ހުޅުވާލާނެ. ފަރުދެއްގެ ގޮތުގައިވެސް އަދި ޓީމެއްގެ ގޮތުގައިވެސް ފޮތާއި ޑިޖިޓަލް ކޮންޓެންޓު ތައްޔާރުކޮށް ވިއްކަން ހުށަހެޅިދާނެ،" ޝަފީއު ވިދާޅުވިއެވެ.
ޝަފީއު ވަނީ އަންނަ ހަފުތާގައި ފޮތްތައް ލިޔަން ޝައުގުވެރިވާ ފަރާތްތަކަށް އެ ފުރުސަތު ހުޅުވާލާއިރު އެކަމުގައި ތަޖުރިބާހުރި މުދައްރިސުން އިސްނެންގެވުމަށް އެދިވަޑައިގެންފައެވެ.