އިއްޔެއިން ފެށިގެން މުދަލު ޒަކާތް ދައްކަން ވާޖިބުވާ ނިޞާބު އަނެއްކާ ވެސް ޒަކާތު ހައުސްއިން ދަށްކޮށްފިއެވެ.
އެންމެ ފަހުން މުދަލު ޒަކާތުގެ ނިޞާބަށް ޒަކާތު ހައުސްއިން ބަދަލު ގެނެސްފައިވަނީ މިދިޔަ އޮކްޓޫބަރުގެ މަހުގެ 10ގައެވެ. އޭރު ޒަަކާތުގެ ނިޞާބު ކުޑަކުރީ 9353.40 ރުފިޔާއިން 9240.35 ރުފިޔާއަށެވެ.
އޭގެ ފަހުން އިއްޔެ ޒަކާތު ހައުސްއިން ވަނީ މުދަލު ޒަކާތް ނެރުން ވާޖިބުވާ ނިޞާބުގެ މިންވަރަކީ ރިހީ ގުރާމަކަށް 14.79 ރުފިޔާގެ ރޭޓުން 595 ގުރާމަށްވާ 8،800 ރުފިޔާ ފަސް ލާރި ކަމަށް ކަނޑައަޅާފައެވެ.
ރާއްޖޭގައި ޒަކާތުގެ ނިޞާބުގެ މިންވަރު ކަނޑައަޅަނީ ރިހީގެ އަގަށް ބަލައިގެންނެވެ. ރިހީގެ އަގަށް އަންނަ ބަދަލަކާ ގުޅިގެން ޒަކާތުގެ ގޮތުގައި ދައްކަންޖެހޭ ދިވެހި ފައިސާގެ މިންވަރު ވެސް ބަދަލުވާނެއެވެ.
މުދަލު ޒަކާތުގެ ނިޞާބަކީ، ތިމާގެ މުދަލުގައި އެ މިންވަރެއް ހަމަވުމުން އެއިން މުދަލު ޒަކާތް ނެރުން ވާޖިބުވާ އެންމެ މަދު މިންވަރެވެ.
ފާހަގަކޮށްލެވޭ ގޮތުގައި، މިދިޔަ އަހަރު މުދަލު ޒަކާތުގެ ގޮތުގައި 101 މިލިއަން ނުވަ ލައްކަ ތިރީސްނުވަހާސް ހަތްދިހަ ރުފިޔާ 15 ލާރި ވަނީ ލިބިފައިވާ ކަމަށް އިސްލާމިކް މިނިސްޓްރީން ވަނީ ބުނެފައެވެ.
މިއީ ރާއްޖޭގެ ތާރީޚުގައި ވެސް އެއް އަހަރެއްތެރޭ މުދަލު ޒަކާތުގެ ގޮތުގައި ލިބިފައިވާ އެންމެ ބޮޑު އަދަދުކަން މިނިސްޓްރީން ވަނީ ފާހަގަކޮށްފައެވެ.
މިނިސްޓްރީން ބުނީ، ޒަކާތުގެ ގޮތުގައި ލިބޭ ފައިސަ އަބަދު ވެސް ޚަރަދުކުރަމުން ދަނީ ޝަރުއީ އުސޫލުތަކާއި މިންގަޑުތަކުގައި ކަނޑައަޅާފައިވާ ގޮތުގެ މަތިން އޭގެ ހައްގުވެރިންގެ މައްޗަށް ކަމަށެވެ.