މިދިޔަ އަހަރަކީ މުދަލު ޒަކާތުގެ ގޮތުގައި އެންމެ ގިނަ އަދަދެއްގެ ފައިސާ ލިބުނު އަހަރުކަމަށް އިސްލާމީ ކަންތައްތަކާ ބެހޭ ވުޒާރާއިން މިއަދު ބުނެފިއެވެ.
އެ ވުޒާރާއިން ނެރުނު އިއުލާނެއްގައި ވާގޮތުން މިދިޔަ އަހަރު މުދަލު ޒަކާތުގެ ގޮތުގައި 101 މިލިއަން ނުވަ ލައްކަ ތިރީސްނުވަހާސް ހަތްދިހަ ރުފިޔާ 15 ލާރި ވަނީ ލިބިފައެވެ.
އިސްލާމިކް މިނިސްޓްރީން ބުނީ، 2023ވަނަ އަހަރުގެ ޑިސެމްބަރު މަހުގެ 18ވަނަ ދުވަހު ރައީސުލްޖުމްހޫރިއްޔާ ޑރ. މުހައްމަދު މުއިއްޒު އުފެއްދެވި ޒަކާތު ހައުސްއަކީ ރާއްޖޭގެ ޒަކާތުގެ ނިޒާމު ހަރުދަނާކޮށް ތަރައްގީކުރަން އެޅުނު މުހިންމު ފިޔަވަޅެއް ކަމަށެވެ.
އެގޮތުން މިދިޔަ އަހަރު ދިވެހިން ޒަކާތާ ގުޅިގެން ހޭލުންތެރި ކުރުމަށް ތަފާތު ހަރަކާތްތައް ޒަކާތު ހައުސްއިން ކުރިއަށް ގެންދިޔަކަން އިސްލާމިކް މިނިސްޓްރީން ވަނީ ފާހަގަކޮށްފައެވެ.
"ނަތީޖާއެއްގެ ގޮތުން ދިވެހި ރައްޔިތުން ޒަކާތުގެ ކަންކަމަށް ފަތުވާތެރިވާ މިންވަރު އިތުރުވެފައި ވާކަން މޯލްޑިވްސް އިންލޭންޑް ރެވެނިއުއިން އެކުލަވައިލި ތަފަސްހިސާބުތަކުން ދައްކައެވެ،" އެ އިއުލާނުގައި ވެއެވެ.
މިއީ ރާއްޖޭގެ ތާރީޚުގައި ވެސް އެއް އަހަރެއްތެރޭ މުދަލު ޒަކާތުގެ ގޮތުގައި ލިބިފައިވާ އެންމެ ބޮޑު އަދަދުކަން މިނިސްޓްރީން ވަނީ ފާހަގަކޮށްފައެވެ.
މިނިސްޓްރީން ބުނީ، ޒަކާތުގެ ގޮތުގައި ލިބޭ ފައިސަ އަބަދު ވެސް ޚަރަދުކުރަމުން ދަނީ ޝަރުއީ އުސޫލުތަކާއި މިންގަޑުތަކުގައި ކަނޑައަޅާފައިވާ ގޮތުގެ މަތިން އޭގެ ހައްގުވެރިންގެ މައްޗަށް ކަމަށެވެ.