ގދ. ގައްދޫގައި ބިދޭސީ ޓީޗަރުންތަކެއް ބޮޑު އަގުގައި ޓިއުޝަންދޭ މައްސަލައެއް ބޮޑުވެ، ފިޔަވަޅު އަޅަން އެ ރަށު ކައުންސިލުން ނިންމައިފިއެވެ.
އެ ކައުންސިލުން އިއްޔެ ކޮށްފައިވާ އިއުލާނެއްގައި ވަނީ، ތައުލީމީ ދާއިރާގައި މަސައްކަތް ކުރާ ބިދޭސީ ޓީޗަރުންތަކެއް ޓިއުޝަންދޭ ކަމުގެ ގިނަ ޝަކުވާތަކެއް ލިބެމުން އަންނާތީ އެ ކަމަށް ޚާއްސަ ފިޔަވަޅުތަކެއް އަޅަން ނިންމާފައިވާ ކަމަށް ބުނެފައެވެ.
މިގޮތުން، އެ ފިޔަވަޅުތައް އަޅަން ގައްދޫ ކައުންސިލުން މަސައްކަތް ކުރަމުން އަންނަނީ ހޯމް މިނިސްޓްރީއާއި އެޑިއުކޭޝަން މިނިސްޓްރީއާ ގުޅިގެން ކަމަށް އިއުލާނުގައިވެއެވެ.
މި މައްސަލައާ ގުޅުން ހުރި އިތުރު މައުލޫމާތު ހިއްސާކުރައްވައި، އެރަށު ކައުންސިލްގެ މެންބަރު އަހުމަދު ޝަމާހު 'ސަން'އަށް މިއަދު ވިދާޅުވީ، ބިދޭސީ ޓީޗަރުންތަކެއް ޓިއުޝަން ނަގާ ކަމުގެ ޝަކުވާތައް މިދިޔަ އަހަރުން ފެށިގެން އެ ކައުންސިލަށް ލިބެމުން އަންނަ ކަމަށެވެ. އެގޮތުން، މާއްދާއަކަށް 800 ރުފިޔާއާއި 1،000 ރުފިޔާއާ ދެމެދުގެ އަގުތަކެއް ނަގާ ކަމުގެ މައުލޫމާތު ލިބިފައިވާ ކަމަށް ޝަމާހު ވިދާޅުވިއެވެ.
ނަމަވެސް، އާންމުކޮށް ޓިއުޝަން ނަގައިދޭ ޓީޗަރުން މާއްދާއެއް ކިޔަވައިދެނީ މަހަކަށް 300 ނުވަތަ 400 ރުފިޔާއާ ދެމެދުގެ އަގެއްގައި ކަމަށް އޭނާ ވިދާޅުވިއެވެ.
މިއީ ތައުލީމުގެ ފެންވަރު ރަނގަޅު ގޮތެއްގައި ހަމަހަމަ ކަމާ އެކު ދަރިވަރުންނަށް ފޯރުކޮށްދޭން ބުރޫއަރާނެ ކަމެއް ކަމަށް ގައްދޫ ކައުންސިލުން ވަނީ ބުނެފައެވެ.
އެހެންވެ، ގާނޫނާ ޚިލާފަށް އަމިއްލައަށް އަގު ހަދައިގެން ގައްދޫގައި ޓިއުޝަންދޭ ޓީޗަރުންނަށް ރާއްޖޭގެ އިމިގްރޭޝަންގެ ގާނޫނާއި ރާއްޖޭގައި ބިދޭސީން ވަޒީފާ އަދާކުރުމާ ބެހޭ ގަވައިދުގެ ދަށުން ފިޔަވަޅު އަޅަން ކަމާ ބެހޭ އިދާރާތަކަށް ފޮނުވާނެ ކަމަށް އެ ކައުންސިލުން ވަނީ ބުނެފައެވެ.
މި މައްސަލައިގައި އެޑިއުކޭޝަން މިނިސްޓްރީއާއި ހޯމް މިނިސްޓްރީގެ ބަހެއް މިހާތަނަށް ލިބިފައި ނުވާތީ މި މައްސަލައިގައި އަޅާނެ ފިޔަވަޅުތަކުގެ ތަފުސީލު އަދި ލިބިފައެއް ނުވެއެވެ.