ދުރު ރާސްތާއަށް ބަލާއިރު، ހަމައެކަނި ހައްލަކީ އާބާދީއާއި ތަރައްގީ އެއްފަސްކުރުން: ރައީސް

މެދު އަދި ދުރު ރާސްތާއަށް ބަލާއިރު، ރާއްޖެއަށް އޮތް ހަމައެކަނި ހައްލަކީ އާބާދީއާއި ތަރައްގީ އެއްފަސްކުރުން ކަމަށް ރައީސް ޑރ. މުޙައްމަދު މުއިއްޒު ވިދާޅުވެއްޖެއެވެ.

ރ. އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން ރޭ އުނގޫފާރުގެ ރައްޔިތުންނާ ބައްދަލުކުރައްވައި ރައީސް ވިދާޅުވީ، މި ސަރުކާރުން ކުދި އާބާދީތަކަށް އަޅާ ނުލައި ދޫކޮށްލާ ކަމުގެ ތުހުމަތުތައް ބައެއް ފަރާތްތަކުން ކުރާ ކަމަށް އެ މަނިކުފާނު ވިދާޅުވިއެވެ. ނަމަވެސް ސަރުކާރުން ގެންގުޅޭ ސިޔާސަތަކީ، އެންމެ ކުޑަ ރަށްތަކަށް ވެސް، އެ ރަށެއްގެ ނިސްބަތުން ޚިދުމަތް ދިނުން ކަމަށް ރައީސް ވިދާޅުވިއެވެ.

"އެހެންވީމަ އެންމެ ކުޑަ ރަށުގެ ރައްޔިތުންނާ ވެސް އަޅުގަނޑު އެބަ ބައްދަލުކުރަން ހުރިހާ ރަށަކަށް ވެސް އެބަދަން ހުރިހާ ރަށެއްގައި ވެސް އެ ރައްޔިތުން ބޭނުންވާ ކަންކަން އެ ރަށަކަށް ބޭނުންވާ ނިސްބަތަކުން ކޮށްދޭނެ ވާހަކަ ދަންނަވަމުން ކުރަމުން މިދަނީ،" އެ މަނިކުފާނު ވިދާޅުވިއެވެ.

އެހެންނަމަވެސް ދުރު ރާސްތާ އަދި މެދު ރާސްތާއަށް ވިސްނާއިރު ރާއްޖޭގެ އެކި ސަރަހައްދުތައް ތަރައްގީވާން ޖެހޭ ކަމަށް އެ މަނިކުފާނު ވިދާޅުވިއެވެ.

"މެދު އަދި ދުރު ރާސްތާގެ ވިސްނުމެއްގައި ސަރަހައްދީ ތަރައްގީ، އާބާދީއާއި ތަރައްގީ އެއްފަސްވުން އެއީ ހަމަ ރާއްޖެއަށް އޮތް ހަމައެކަނި ހައްލު. އެ ނޫން ހައްލެއް ނެތް. އެހެންވީމަ އެކަން އަޅުގަނޑުމެން ކުރަން ޖެހެނީ،" އެ މަނިކުފާނު ވިދާޅުވިއެވެ.

މި ސަރުކާރުން ވަނީ، ސަރަހައްދީ ތަރައްގީގެ މަޝްރޫއެއްގެ ދަށުން ރާއްޖޭގެ އުތުރުގައިއާއި ދެކުނުގައި އެއް ލައްކައިގެ އާބާދީގެ ދެ ރީޖަން ގާއިމުކުރަން ނިންމައިފައެވެ. އަދި 10،000އާ ހިސާބަށް މީހުން ދިރިއުޅޭނެ އާބަން ސެންޓަރުތައް ވެސް ގާއިމުކުރަން ރާވާފައިވެއެވެ.

ރައީސް ވިދާޅުވީ އެގޮތަށް ސަރަހައްދުތަކެއް ތަރައްގީކޮށް، ރަށްތަކެއް ތަރައްގީ ކުރުމަކީ ޒިންމާދާރު ކަމާއެކީ ރައްޔިތުންނަށް ތަރައްގީ ގެނެސްދިނުމަށް ކުރައްވާ މަސައްކަތެއް ކަމަށެވެ.

ރައީސް ޑރ. މުޙައްމަދު މުއިއްޒުގެ ރިޔާސީ ވައުދުފުޅުގެ ދަށުން، ރާއްޖޭގައި އާބަން ސެންޓަރުތައް ގާއިމުކުރާ ހަތް ރަށް މިމަހުގެ ނުވައެއްގައި ވަނީ އިއުލާންކޮށްފައެވެ.

އެ ރަށްތަކަކީ:

• ރ. އުނގޫފާރު
• ބ. އޭދަފުށި
• ޅ. ނައިފަރު
• އދ. މަހިބަދޫ
• ފ. ނިލަންދޫ
• ދ. ކުޑަހުވަދޫ
• ލ. ފޮނަދޫ

މިދިޔަ ނޮވެމްވަރު މަހު ރައްޔިތުންގެ މަޖިލީހުން ވަނީ، ރާއްޖޭގައި އާބަން ސަރަހައްދުތައް ކަނޑައެޅުމާއި، އާބަން ސަރަހައްދުތައް ތަރައްގީކޮށް ހިންގުމާގުޅޭ ގައުމީ ސިޔާސަތު ކަނޑައަޅާނީ ވަޒީރުންގެ މަޖިލީހުގެ ލަފާގެމަތިން ރައީސް ކަމަށް ބަޔާންކޮށްފައިވާ ބިލެއް ފާސްކޮށްފައެވެ. އަދި މިދިޔަ ޑިސެމްބަރު މަހުގެ ދެވަނަ ދުވަހު ރައީސް ވަނީ އެ ބިލް ތަސްދީގު ކުރައްވައިފައެވެ.