ކުޑަ ކުއްޖަކަށް ގޭގައި ގެންގުޅޭ ބިދޭސީ އަންހެނަކު އަނިޔާކުރި ކަމަށް ތުހުމަތުވާ މައްސަލައެއް ފުލުހުން ބަލަން ފަށައިފިއެވެ.
މީޑިއާތަކާ ހިއްސާކުރި މެސެޖެއްގައި ފުލުހުން ބުނީ، މާލޭގައި ތިން އަހަރުގެ ކުޑަ ކުއްޖަކަށް ގޭގައި ގެންގުޅޭ ނޭޕާލް އަންހެނެއް އަނިޔާކުރި ކަމަށް ތުހުމަތުވާ މައްސަލައެއް އިއްޔެ ހުށަހަޅާފައިވާ ކަމަށެވެ.
މި މައްސަލާގައި މިހާތަނަށް މީހަކު ހައްޔަރުކޮށްފައި ނުވާއިރު، މި މައްސަލަ ފުލުހުން އަންނަނީ ތަހުގީގު ކުރަމުންނެވެ.
މިދިޔަ ބުރާސްފަތި ދުވަހު ވަނީ މާލެ ސަރަހައްދުގެ ސްކޫލެއްގެ ޕްރައިމަރީ ގްރޭޑްގައި ތައުލީމު ހާސިލްކުރާ ހާއްސަ އެހީއަށް ބޭނުންވާ ކުއްޖަކަށް ޓީޗަރަކު ޖިސްމާނީ އަނިޔާ ކުރިކަމަށް ތުހުމަތުވާ މައްސަލައެއް ފެންމަތިވިއެވެ.
ފުލުހުން ބުނީ، މިދިޔަ ހުކުރު ދުވަހު ތުހުމަތުކުރެވޭ ޓީޗަރު ކޯޓު އަމުރެއްގެ ދަށުން ފުލުުންގެ ބެލުމުގެ ދަށަށް ގެންގޮސް، އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރު ކުރުމުން ޝަރުތުކޮށް ދޫކޮށްލާފައިވާ ކަމަށެވެ.