ރައްޔިތުންނަށް ޚިދުމަތް ދިނުމުގައި ބައެއް ވަޒީރު ބޭފުޅުން އިޚުލާސްތެރި ނޫން ކަމަށާއި ރައީސް ޑރ. މުހައްމަދު މުއިއްޒާ ގާތްވުމަކީ އެ ބޭފުޅުންނަށް މަގާމުގައި ދެމިތިއްބެވޭނެ ސަބަބެއް ނޫން ކަމަށް ދިއްދޫ ދާއިރާގެ, ޕީއެންސީ މެންބަރު އަބްދުއްލަތީފް މުހައްމަދު (ލަތީބެ) މިއަދު ވިދާޅުވެއްޖެއެވެ.
ބައެއް ވަޒީރުން ފޯނު ނުނަންގަވާ މައްސަލައިގައި އޭނާ ވަނީ ވަރަށް ބޮޑަށް ނުރުހުން ފާޅުކުރައްވައިފައެވެ.
ރައްޔިތުންގެ މަޖިލީހުގެ ދައުރުން ބޭރުން ބާއްވާ ދެވަނަ ޖަލްސާގައި މިއަދު ވާހަކަދައްކަވަމުން މެންބަރު ލަތީފް ވިދާޅުވީ، ދިވެހި ރައްޔިތުންނަށް ބޭނުންވާ ވަރަށް ގިނަ ކަންކަމުގައި މަޖިލީސް މެންބަރުން ވަޒީރުންނަށް ފޯނުކުރަންޖެހޭ ކަމަށެވެ. އެއީ، އެކި މަސައްކަތްތައް އަވަސްކޮށްދިނުމާއި ކަންކަން ފަހިކޮށްދޭން އެދި ކަމަށް އޭނާ ވިދާޅުވިއެވެ.
"މި ވަޒީރުން ފޯނު ނުނަންގަވާ މައްސަލައަކީ ބޮޑު މައްސަލައެއް. އަދި، ކަންތައްތައް ނުކޮށްދޭ މައްސަލައަކީ ވެސް ވަރަށް ބޮޑު މައްސަލައެއް،" އޭނާ ނުރުހުން ފާޅުކުރެއްވިއެވެ.
"މިއިން ބައެއް ވަޒީރުން ޚުދު ރައީސުލްޖުމްހޫރިއްޔާއަށް ވެސް އިޚުލާސްތެރިކަމާ އެކު މަސައްކަތްކުރާކަން، ނުވަތަ އިޚުލާސްތެރިކަމާ އެކު މަސައްކަތްކޮށްދޭކަން އަޅުގަނޑުމެންނަށް ކަށަވަރެއް ނޫން،"
ދިއްދޫ ދާއިރާގެ މެންބަރު އަބްދުއްލަތީފް: އޭނާ ވަނީ ވަޒީރުންނަށް ފާޑު ވިދާޅުވެފައި --- ސަން ފޮޓޯ/ މުހައްމަދު އަފްރާހް
އޭނާ ވިދާޅުވީ، ބައެއް ވަޒީރު ބޭފުޅުން ރައީސް މުއިއްޒާ ގާތްވުމުން، އެ ބޭފުޅުން މަގާމުން ދުރުނުކުރެވޭނެ ކަމަށް ހީކުރާ ކަމަށެވެ. އެކަމަކު، އެއީ ހަގީގަތެއް ނޫން ކަމަށާއި އެހެން އެކަން އޮތް ނަމަވެސް މަޖިލީސް މެންބަރުން ބޭނުންފުޅުވެއްޖެ ނަމަ ވަޒީރުން މަގާމުން ވަކިކުރެވޭނެކަން އޭނާ ވަނީ ހަނދާންކޮށްދީފައެވެ.
"ވަޒީރުންނަށް ހީވާ ކަހަލަ، ރައީސުލްޖުމްހޫރިއްޔާއާ މާ ގާތްވީމާ އެ ބޭފުޅުންނަށް މަގާމުގައި ތެމިތިބެވޭނޭ ބައިވަރު ދުވަހު... 18 ވަނަ މަޖިލީހުގައި ވެސް އަޅުގަނޑުމެން ހުންނާނީ އަޅުގަނޑުމެންގެ ވަޒީރުން މަގާމުން ވަކިކޮށްފައި،" އޭނާ ވަޒީރުންނަށް ހަނދާންކޮށްދެއްވިއެވެ.
"އެކަން މިހާރު ވެސް ހަނދާންކޮށްދެން ވަޒީރުންނަށް. އަޅުގަނޑުމެންނަށް އިޚުލާސްތެރިކަމާ އެކު، މި ސަރުކާރަށް، ރައްޔިތުންނަށް އިޚުލާސްތެރިކަމާ އެކު މަސައްކަތް ނުކޮށްދޭ ނަމަ، ވަޒީރުން އެ މަގާމުގައި ދެމިތިބެވޭނެ ކަމަށް ހީކޮށްގެން ނުވާނެ،"
މެންބަރު ލަތީފް ވިދާޅުވީ، ބައެއް ވަޒީރުން އުޅުއްވަނީ ރައްޔިތުންނަށް ފިލައިގެން ކަމަށެވެ.
މަޖިލީހުގެ މިއަދުގެ ޖަލްސާގެ ތެރެއިން -- ފޮޓޯ/ މަޖިލިސް
ސަރުކާރާއި ރައްޔިތުންނާ ގުޅުވަން ތިބޭ ބަޔަކީ މަޖިލީހުގެ މެންބަރުންކަން ފާހަގަކުރައްވައި ލަތީފް ވިދާޅުވީ، އެ ގުޅުން ކަނޑާލައިގެން ނުކުންނަ ނަތީޖާ ރަނގަޅުނުވާނެ ކަމަށެވެ. ވަޒީރުން ފޯނު ނުނަންގަވާ ވާހަކަ ވަރަށް ގިނަ ރައްޔިތުން ދައްކާ ކަމަށް އޭނާ ވިދާޅުވިއެވެ.
"ރައީސުލްޖުމްހޫރިއްޔާއާ މާ ބޮޑަށް ގާތްވީމާ މަގާމުގައި ދެމިހުރެވޭނެ ކަމަށް ހީކުރުމަކީ ކުށްހީއެއް،" ވާހަކަ ނިންމަވައިލެއްވުމުގެ ކުރީގައި ތަކުރާރުކޮށް އޭނާ ވިދާޅުވިއެވެ.
އެނގިފައިވާ ގޮތުގައި ބައެއް ވަޒީރުންނާ ބައްދަލުނުވެ، ފޯނުން ވެސް ވާހަކަ ނުދެކެވޭ މައްސަލައިގައި ބައެއް މެންބަރުން ވަނީ ވަރަށް ބޮޑަށް ކަންބޮޑުވުން ފާޅުކޮށްފައެވެ.
މި ހިނގާ ވިހިވަނަ މަޖިލީހުގައި ސަރުކާރު ހިންގާ ޕީއެންސީއަށް ނިސްބަތްވާ 75 މެންބަރުން ތިއްބަވައެވެ. އެ ސުޕަ މެޖޯރިޓީގެ ބޭނުން ހިފައި، ޕީއެންސީން ވަނީ މެންބަރުން ޕާޓީން ވަކިކުރި ނަމަވެސް އަދި އަމިއްލައަށް ޕާޓީން ވަކިވިޔަސް މެންބަރުކަން ގެއްލޭ ގޮތަށް ގާނޫނުއަސާސީއަށް އިސްލާހެއް ގެނެސްފައެވެ.