ރިޔާސީ ދައުރުގެ ފުރަތަމަ ދުވަހު ގިނަ އަދަދެއްގެ އަމުރުގައި ސޮއިކުރައްވާ ނެރުއްވާނެ ކަމަށް އެމެރިކާގެ އިންތިޚާބީ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.
ރައީސްކަމުގެ ހުވާ ކުރެއްވުމަށް މަދު ގަޑިއިރުތަކަކަށްވެފައި ވަނިކޮށް ޓްރަމްޕް އެގޮތަށް ވިދާޅުވީ މިދިޔަ ނޮވެމްބަރު މަހު ބޭއްވި އެމެރިކާގެ ރިޔާސީ އިންތިޚާބުގައި ޓްރަމްޕަށް ލިބިވަޑައިގެންނެވި ކާމިޔާބީ ފާހަގަކުރައްވަން ބޭއްވި ރެލީއެއްގައި ވާހަކަފުޅުދައްކަވަމުންނެވެ.
"ތާރީހީ ސްޕީޑާއި ވަރުގަދަކަމާއެކު އަމަލުކޮށް، އަޅުގަނޑުމެންގެ ގައުމަށް ކުރިމަތިވެފައިވާ ކޮންމެ ގޮންޖެހުމަކުން އަރައިގަންނާނަން،" އެއްވެ ތިބި މީހުންނާ މުޚާތަބުކުރައްވައި ޓްރަމްޕް ވިދާޅުވިއެވެ.
"ބައިޑެންގެ ވެރިކަމުގައި ނެރެފައިވާ ތާކުންތާކު ނުޖެހޭ ހުރިހާ އަމުރެއް އަޅުގަނޑު ހުވާ ކުރާތާ ގަޑިއެއްހާއިރުގެ ތެރޭގައި އުވާލެވޭނެ،"
އާޓިފިޝަލް އިންޓެލިޖެންސް (އޭއައި) ކުރިއަރުވައި، ޑިޕާޓްމަންޓް އޮފް ގަވާމަންޓް އެފިޝަންސީ (ޑީއޯޖީ) އުފެއްދުމާއި، ކުރީގެ ރައީސުން އަވަހާރަކޮށްލުމާ ގުޅޭ ރެކޯޑްތައް ހޯދުމާއި، އަޔަން ޑޯމް މިސައިލް ޑިފެންސް ޝީލްޑް އުފެއްދުމަށް އަސްކަރިއްޔާއަށް އިރުޝާދު ދިނުމާއި، ޑައިވާސިޓީ، އިކުއިޓީ އަދި އިންކްލޫޝަން (ޑީއީއައި) ގެ ސިޔާސަތުތައް އަސްކަރިއްޔާއިން ނައްތާލުމަށް އަމުރު ނެރޭނެ ކަމަށް ޓްރަމްޕް ވަނީ ވައުދުވެވަޑައިގެންފައެވެ.
މީޑިއާ ރިޕޯޓްތައް ބުނާ ގޮތުގައި މިއަދު ޓްރަމްޕް 200 އަށް ވުރެ ގިނަ އެގްޒެކެޓިވް އެކްޝަން ނެރޭނެ ކަމަށް ބެލެވޭ ކަމަށާއި ނަމަވެސް އެއީ އެގްޒެކެޓިވް އަމުރާ ތަފާތު ކަމެއް ކަމަށެވެ.
އެގްޒެކެޓިވް އަމުރަކީ ކޯޓުތަކުން ބަލައިގަންނަ، ގާނޫނީ ގޮތުން ބާރުއަޅާ އަދި ފެޑެރަލް ރެޖިސްޓާގައި ޝާއިއުކުރާ އަމުރުތަކެކެވެ. އެއީ ކުރިއަށް އިންތިޚާބުވާ ރައީސުންނަށް ވެސް ބަދަލު ކުރެވޭނެ ކަންކަމެވެ.
ނަމަވެސް އެގްޒެކެޓިވް އެކްޝަން ތަކަކީ ބަރުދަން ކުޑަވެ، ގާނޫނީ ގޮތުން މުރާޖައާ ނުކުރެވޭނެ ކަންކަމެވެ. އެއީ ރައީސަކު ހާސިލް ކުރަން އުއްމީދުކުރާ ސިޔާސަތުތަކުގެ "ވިޝް ލިސްޓެއް" ކަމަށް ސިޔާސީ ކަންކަމާ ގުޅޭ ލިޔުންތައް ލިޔުއްވާ ޓޮމް މާސް ލިޔުއްވާފައިވެއެވެ.
މި އެގްޒެކެޓިވް އަމުރުތަކުގެ ތެރެއިން ގިނަ އަމުރުތަކަށް ކޯޓުގައި ގޮންޖަހާނެ ކަމަށް ބެލެވޭ ކަމަށް ބީބީސީން ރިޕޯޓުކޮށްފައިވެއެވެ.
މީގެ އިތުރުން ޓްރަމްޕް ވަނީ މިހާތަނަށް އެމެރިކާގައި ހިންގާ އެންމެ ބޮޑު ޑިޕޯޓް އޮޕަރޭޝަން ކަމަށް ވިދާޅުވެ، ބޯޑަރުގައި ގަވާއިދާ ޚިލާފަށް އުޅޭ މީހުންނަށް ހައްލު ހޯދުމަށް އެގްޒެކެޓިވް އެކްޝަންތަކުގައި ސޮއި ކުރައްވާނެ ކަމަށް ވެސް ވައުދުވެވަޑައިގެންފައެވެ.
ތަޖުރިބާކާރުން ވިދާޅުވާ ގޮތުގައި އެގޮތަށް ދިރިއުޅޭ އެތައް މިލިއަން މީހުން ފޮނުވާލުމަށް ޓްރަމްޕް ވައުދުވެވަޑައިގަތުމުން ލޮޖިސްޓިކްގެ ގޮތުން ބޮޑެތި ހުރަސްތަކެއް ކުރިމަތިވާނެ ކަމަށާއި، އެތައް ސަތޭކަ ބިލިއަން ޑޮލަރެއް ޚަރަދުވެދާނެއެވެ.
އަދި އެމެރިކާގެ ސިޓީތަކުގައި ހިނގާ ކުށްތަކަށް ފިޔަވަޅު އަޅައި، ސަރުކާރުގައި ކަނާތުފިޔައިގެ ސިޔާސަތުތައް ނައްތާލައްވާނެ ކަމަށް ވެސް ޓްރަމްޕް ވަނީ ވައުދުވެވަޑައިގެންފައެވެ.
ޓްރަމްޕް ވަނީ ހަފްތާ ބަންދުގައި އެމެރިކާގައި ޓިކްޓޮކް މަނާކުރުމަށްފަހު އަލުން ހުއްދަ ކުރުމާއި، ޣައްޒާ ހަނގުރާމަ ހުއްޓާލުމުގެ އެއްބަސްވުމަށް ވެސް އަމަލުކުރަން ފެށުނީ އެމަނިކުފާނުގެ ސަބަބުން ކަމަށް ދޭހަވާ މޭރުމަކުން ވެސް ވާހަކަދައްކަވާފައެވެ.
އެމެރިކާގެ އާ ރައީސްކަމަށް ޓްރަމްޕް ހުވާ ކުރެއްވުމަށް ހަމަޖެހިފައި ވަނީ މިއަދެވެ.
ނަމަވެސް ވޭތުވެދިޔަ އަހަރުތަކާ ޚިލާފަށް ފިނި މޫސުމުގެ ސަބަބުން މިފަހަރު ހުވާކުރެއްވުމުގެ ރަސްމިއްޔާތު އޮންނާނީ ކެޕިޓޮލް އިމާރާތުގެ އެތެރޭގައެވެ.
އެމެރިކާގެ ރައީސުން ހުވާކުރެއްވުމުގެ ރަސްމިއްޔާތު ކެޕިޓޮލްގެ އެތެރޭގައި ނުބާއްވާތާ 40 އަހަރު ވެއްޖެއެވެ.
ހުވާކުރެއްވުމުގެ ރަސްމިއްޔާތުގައި ޓްރަމްޕް ތަގުރީރު ވެސް ކުރައްވާނެއެވެ. ރިޕޯޓްތައް ބުނާ ގޮތުގައި އެމަނިކުފާނުގެ ތަގުރީރުގެ މައުޟޫއަކީ އެއްބައިވަންތަކަމާއި ވަރުގަދަކަމާއި އިންސާފުވެރިކަމެވެ. ޓްރަމްޕަ ހުވާކުރައްވާނީ އެމެރިކާގެ 47 ވަނަ ރައީސްގެ ގޮތުގައެވެ.