ފުރަތަމަ މަރުހަލާގައި ދޫކުރާނެކަމަށް ހަމާސްއިން އެއްބަސްވީ އިސްރާއީލުގެ 33 އަސީރުންގެ ލިސްޓެއް ހާމަނުކުރަނީސް އިސްރާއީލުން ޣައްޒާގެ އާންމުންނާ ދެކޮޅަށް ހިންގާ ގަތުލުއާންމުތައް ހުއްޓައިލުމުގެ އެއްބަސްވުމަށް އަމަލުނުކުރާނެކަމަށް އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ މިރޭ ބުނެފިއެވެ.
ނަތަންޔާހޫ މިހެން ބުނެފައިވާއިރު ހަނގުރާމަ ހުއްޓައިލުމުގެ އެއްބަސްވުމަށް މާދަމާ އަމަލުކުރަން ފަށަން ވަގުތުވަނީ ކުޑަތަން ވެފައެވެ.
"އަހަރުމެން އެއްބަސްވުމާއެކު ކުރިއަށް ނުދާނަން މިނިވަންވާނެ އަސީރުންގެ ލިސްޓެއް ނުލިބެނީސް. އިސްރާއީލުން މި އެއްބަސްވުމާ ޚިލާފުވުމުގެ އެއްވެސް އަމަލެއް ބަލައެއް ނުގަންނާނެ. މިކަމުގެ ހުރިހާ ބާރެއް އޮތީ ހަމާސްގެ އަތްމަތީ،" އެކްސްގައި ކުރި ޕޯސްޓެއްގައި ނަތަންޔާހޫ ބުނެފައިވެއެވެ.
މީގެ ކުރިން އިސްރާއީިލުން ބުނަމުން އައީ ހަމާސްގެ އަތްދަށުން އިސްރާއީލުގެ އަސީރުން މިނިވަންކުރާނީ ހަމާސް އާއެކު ހަދާ ޑީލެއްގެ ދަށުން ނޫންކަމާއި އެކަންކުރާނީ ބާރުގެ ބޭނުންކޮށްގެން ހަމާސް އެއްކޮށް ބަލިކޮށްލައިގެން ކަމަށެވެ. އެ ގޮތުގައި ގޮތްދޫނުކުރަން އަހަރަކަށް ވުރެ ގިނަ ދުވަހު އިސްރާއީލު ހިފެހެއްޓި ހިފެހެއްޓުންތައް މަޑު މަޑުން ދޫކުރަމުން ގޮސް ދޫވި ނަމަވެސް ފަހުވަގުތު މިވަނީ އަނެއްކާ ވެސް އިތުރު ކަމެއް މަތިކޮށްފައެވެ.
އަލްޖަޒީރާ ބުނާގޮތުން ހަމަލާތައް ހުއްޓާލުމުގެ އެއްބަސްވުން ބިނާވެފައިވަނީ ހަމާސް ކުރިން ވެސް އެދުނުގޮތަށް ދާއިމީގޮތަކަށް ހަމަލާތައް ހުއްޓާލުމުގެ މައްޗަށެވެ. ދެފަރާތުން ވެސް އަސީރުން މިނިވަންކުރުމަށާއި އިސްރާއީލު ސިފައިން ޣައްޒާއިން އެއްކޮށް ފޭބުމުގެ މައްޗަށެވެ.
ޣައްޒާއަށް ހަތިޔާރު ވެއްދުން މަނާކުރުމަށާއި ޣައްޒާގެ ރައްޔިތުންނަށް ބޭނުންވާ ކާބޯތަކެއްޗާއި ބޭހާ އަދި ހިޔާވަހިކަމާއި ދިރިއުޅުމަށް ބޭނުންވާ ތަކެތި އދ. އާއި މިސްރުގެ ބެލުމުގެދަށުން ހުއްޓުމެއްނެތި ދާއިމީގޮތަކަށް ޣައްޒާއަށް ވެއްދުމުގެ މައްޗަށެވެ.
މިކަންކަން ކުރުމަށް އެއްބަސްވެފައިވަނީ ހަމާސް އެންމެ ކުރިން ވެސް އެދުނުގޮތަށް ދެތިން މަރުހަލާއަކަށް ބަހާލައިގެންނެވެ.
ފުރަތަމަ މަރުހަލާގައި ހިމެނެނީ ހަމަލާތައް އެއްކޮށް ހުއްޓާލުމަށްފަހު ޣައްޒާގެ ބައެއް ސަރަހައްދުތަކުން އިސްރާއީލު ސިފައިން ފޭބުމެވެ.
މި މަރުހަލާ 16 ދުވަހަށް ދެމިގެންދާއިރު ހަމާސްއިން އަސީރުކޮށްފައިވާ އިސްރާއީލުގެ 33 މީހަކާއި އިސްރާއީލުގެ ޖަލުތަކުގައިވާ ފަލަސްތީނުގެ ތިން ހާހެއްހާ މީހުން މި މަރުހަލާގައި މިނިވަންކުރާނެއެވެ.
ދެފަރާތުންވެސް ފުރަތަމަ މިނިވަންކުރާނީ އަންހެނުންނާއި ބަލިމީހުންނާއި ކުޑަކުދިންނާއި މުސްކުޅިންނެވެ.