ޓްރާންސްޕޯޓު މިނިސްޓްރީން ރައްޔިތުންނަށް ދޭ ޚިދުމަތުގެ ފެންވަރު ދަށްވެ، އެ މިނިސްޓްރީއާ ދޭތެރޭގައި އާންމުންގެ އިތުބާރު ކުޑަވެފައިވާ ކަމަށް އޮޑިޓު ރިޕޯޓެއްގައި ބުނެފިއެވެ.
އެ އޮޑިޓުގައި ބަލާފައިވަނީ ސެޕްޓެންބަރު 2021އިން ފެށިގެން 2023ގެ އޮގަސްޓުގެ ނިޔަލަށް ކުރެވިފައިވާ މަސައްކަތްތަކަށާއި، 2018ވަނަ އަހަރުން ފެށިގެން މެއި 2023އާ ދެމެދު، މަސައްކަތްތައް ހަރުދަނާ ކުރުމަށް އަޅާފައިވާ ފިޔަވަޅުތަކަށެވެ.
އޮޑިޓު ރިޕޯޓުގައި ފާހަގަ ކޮށްފައިވާ ގޮތުގައި، އެއްގަމާއި ކަނޑު އުޅަނދުފަހަރުގެ ރަޖިސްޓްރޭޝަނަށް ބޭނުންކުރާ "މެޓްރިސް" ސިސްޓަމުގައި ކޮންޓްރޯލް މައްސަލަތައް ހުރުމުގެ ސަބަބުން، ސިސްޓަމް ބޭނުން ނަހަމަ ގޮތުގައި ހިފައި، ގަވާއިދާ ޚިލާފަށް އުޅަނދު ރެޖިސްޓްރީ ކުރުމުގެ ފުރުސަތު ވަނީ ބޮޑުވެފައެވެ.
މަސައްކަތްތައް ލަސްވާ ސަބަބެއްގެ ގޮތުގައި ފާހަގަކޮށްފައިވަނީ ޚިދުމަތް ދިނުމުގައި އިންޓަގްރޭޓެޑް ކޮށްފައިނުވާ ގިނަ ސިސްޓަމްތަކެއް ބޭނުންކުރަން ޖެހުމުގެ ސަބަބުން، ސިސްޓަމުގެ ބޭރުން ކުރަން ޖެހޭ މަސައްކަތްތަކާއި މެނުއަލްކޮށް ކުރަންޖެހޭ މަސައްކަތްތައް ގިނަވުމެވެ.
ރިޕޯޓުގައި ބުނެފައިވަނީ، މިނިސްޓްރީގެ ސިސްޓަމްތައް ޒަމާނީ ޓެކްނޮލޮޖީއަށް ފައްތަން ކޮށްފައިވާ މަސައްކަތުން، އަހަރުތަކަކަށް ދިގުލައިގެން ގޮސްފައިވާ މައްސަލަތަކަށް ވެސް ހައްލު ލިބިފައި ނުވާ ކަމަށެވެ.
އެ ގޮތުން މިނިސްޓްރީން ފޯރުކޮށްދޭ ކަނޑު އުޅަނދުފަހަރާ ގުޅޭ ޚިދުމަތްތަކަށް ޚާއްސަކޮށްގެން ފަރުމާކުރަން ފެށި "ޓޭވިސް" ސިސްޓަމް ބޭނުންކޮށްފައިނުވުމާއި، ޚިދުމަތްތައް އެއް ސިސްޓަމެއްގެ ދަށަށް ގެނައުމަށް ޓަކައި ތައާރަފުކުރި "ސިމްސް" ސިސްޓަމުން އިންޓަގްރޭޓެޑް ހައްލު ލިބިފައިނުވާކަން ފާހަގަކޮށްފައިވެއެވެ.
ރިޕޯޓުގައި ބުނަނީ ސެޕްޓެންބަރު 2021އިން ފެށިގެން 2022ގެ އޮގަސްޓުގެ ނިޔަލަށް އެއްގަމު އުޅަނދުގެ ލައިސަންސް ފިޔަވައި އެހެން ޚިދުމަތްތަކާއި ގުޅޭ 25،347 އެޕްލިކޭޝަނުން މީޑިއަން އެވަރެޖުކޮށް 49 އިންސައްތަ އެޕްލިކޭޝަން ސާވިސް ޗާޓާގައިވާ މުއްދަތަށްވުރެ ލަސްވެފައިވާ ކަމަށެވެ. އަދި ކަނޑު ދަތުރުފަތުރުގެ ޚިދުމަތްތަކުގެ 6،587 އެޕްލިކޭޝަންގެ ތެރެއިން 43 އިންސައްތަ މީޑިއަން އެވަރެޖުކޮށް ލަސްވެފައިވާ ކަމަށް ވެސް ބުނެފައިވެއެވެ.
ޓްރާންސްޕޯޓު މިނިސްޓްރީގެ އައިޓީ ސިސްޓަމްތައް ބަލަހައްޓާނެ ހަރުދަނާ ނިޒާމެއް ނެތްކަމާއި، ބޭނުންކުރާ އައިޓީ ސިސްޓަމްތައް ހަރުދަނާ ކުރުމަށް ޓަކައި މިނިސްޓްރީން ތަންފީޒުކުރާނެ ދުރުރާސްތާ ޕްލޭނެއް ތައްޔާރު ކުރެވިފައި ނެތްކަން ވެސް އޮޑިޓުގައި ފާހަގަކޮށްފައިވެއެވެ.
މީގެ އިތުރުން، މިނިސްޓްރީން ދޭ ޚިދުމަތްތަކާ ގުޅިގެން ރައްޔިތުންގެ ޝަކުވާތަކާ ހިއްސާކުރެވޭނެ ގޮތަށް ކޯލް ސެންޓަރެއް ގާއިމްކުރި ނަމަވެސް، އެ ތަން ހިންގާނެ ވަކި އުސޫލެއް ލިޔުމުން އެކުލަވާލާފައި ނެތުމާއި، ކޯލް ސެންޓަރުތަކުން ޖަވާބު ދެވުނު މިންވަރު ވެސް ދަށްވެފައިވާ ކަމަށް އެ ރިޕޯޓުގައިވަނީ ފާހަގަކޮށްފައެވެ.
އޮޑިޓު ރިޕޯޓުގައި ފާހަގަކޮށްފައިވާ ގޮތުން، މިނިސްޓްރީން ދޭ ޚިދުމަތުގެ ފެންވަރު ރަނގަޅުކޮށް، ސާވިސް ޗާޓާއާ އެއްގޮތަށް ޚިދުމަތްތައް ފޯރުކޮށްދިނުމަށް މަގުފަހިވާނެހެން މުވައްޒަފުންނާ ގުޅޭ ކަންތައްތައް ރާވައިގެން ހިންގާފައެއް ނުވެއެވެ. އެ ގޮތުން މުވައްޒަފުންނާ މަޝްވަރާ ކުރުމަކާ ނުލައި، އަދި ލިޔުމުން އެންގުމަކާ ނުލައި މަސްއޫލިއްޔަތުތަކަށް ބަދަލުގެނައިކަން ފާހަގަކޮށްފައިވެއެވެ. އަދި މުވައްޒަފުންގެ ގާބިލްކަން އިތުރު ކުރުމަށް ބޭނުންވާ ވަރަށް ތަމްރީނު ޕްރޮގްރާމްތައް ހިނގާފައިނުވާ ކަމަށް ވެސް ވަނީ ފާހަގަކޮށްފައެވެ.
ޚިދުމަތްތައް ފޯރުކޮށްދޭނެ ގޮތުގެ ސާވިސް ޗާޓާއެއް 2022ގައި އާންމުކޮށްފައިވީ ނަމަވެސް، ޚިދުމަތްތައް ފޯރުކޮށްދެނީ ސާވިސް ޗާޓާއާ އެއްގޮތަށްތޯ ބަލައި، ޚިދުމަތް ދިނުމަށް ލަސްވެފައިވާ އެޕްލިކޭޝަންތައް ދެނެގަނެ، ޚިދުމަތުގެ ދުވެލި އަވަސް ކުރުމަށް ފިޔަވަޅު އަޅާފައިނުވުމުގެ ސަބަބުން ޚިދުމަތުގެ ފެންވަރު ދަށްވެ އާންމުންގެ އިތުބާރު ކުޑަވެފައިވާ ކަމަށް އޮޑިޓު ރިޕޯޓުގައިވަނީ ބުނެފައެވެ.
މި މައްސަލަތައް ހައްލު ކުރުމަށް ޓަކައި މުވައްޒަފުން ޒިންމާދާރު ކުރެވޭނެހެން ސިސްޓަމްގައި އޮޑިޓް ޓްރެއިލް ގާއިމްކޮށް، މުވައްޒަފުންގެ ޒިންމާއާ އެއްގޮތަށް ސިސްޓަމަށް އެކްސެސް ދިނުމަށް އޮޑިޓު ރިޕޯޓުގައި ވަނީ ލަފާދީފައެވެ.
މީގެ އިތުރުން، ސާވިސް ޗާޓާއާ އެއްގޮތަށް މަސައްކަތް ކުރިޔަށްދޭތޯ ބަލައި، ހަލުވި ކަމަށާއެކު ރައްޔިތުންނަށް ޚިދުމަތް ދިނުމަށް ފިޔަވަޅު އެޅުމުގެ މުހިންމުކަން ފާހަގަ ކޮށްފައިވެއެވެ.