ބޮލީވުޑްގެ އެކްޓަރުންގެ ތެރެއިން ޒުވާނުންގެ މެދުގައި ބޮޑު މަގުބޫލުކަމެއް ހޯދާފައިވާ ކާތިކް އާރްޔަން ހުރީ ހުސްކޮށް ކަމަށާއި އެއީ ސަތޭކަ ޕަސެންޓު ތެދު ވާހަކައެއް ކަމަށް އެކްޓަރު ބުނެފިއެވެ.
ކާތިކް ހުރީ ހުސްކޮށް ކަމަށާއި ހަޔާތުގެ ބައިވެރިއަކު ނެތްކަމަށް ބުނެފައި ވަނީ ދާދިފަހުން ކާތިކް ބައިވެރިވި ޒީ ރިއަލް ހީރޯސް އެވޯޑްސް 2024ގެ ހަފްލާގައި ނޫސްވެރިއަކު ކުރި ސުވާލަކަށް ޖަވާބު ދެމުންނެވެ.
ކާތިކް އިތުރަށް ބުނެފައި ވަނީ މި ފަހަކަށް އައިސް ވަރަށް ގިނަ ވަގުތު ހޭދަކުރަން ޖެހެނީ ފިލްމީ މަސައްކަތްތަކުގައި ކަމަށާއި އިތުރު އެހެން އެއްވެސް ކަމަކަށް ވަގުތު ދެވެން ނެތް ކަމަށެވެ.
ފިލްމު ޕްރޮޑިއުސަރުންނާއި ޑައިރެކްޓަރުންނާ އެކު މަސައްކަތްކޮށް އެކި ބައްދަލަވުންތަކަށް ފިލްމު ޕްރޮޑަކްޝަން އޮފީސްތަކަށް ދިއުމަކީ މިހާރު ކޮންމެ ދުވަހަކު ކަހަލަ ގޮތަކަށް އޭނާގެ ތާވަލުގައި ހިމެނޭ ކަންކަން ކަމުން އިތުރު އެހެން މީހަކާ އަދި ބަޔަކާ ބައްދަލުކޮށް އެހެން ތަނަކަށް ދާނެ ވަގުތެއް ވެސް ކާތިކަށް ނުލިބޭ ކަމަށް އެކްޓަރު ވަނީ ބުނެފައެވެ.
ކާތިކް ބަތަލާ ސާރާ އަލީ ޚާންއާ އެކު--ފޮޓޯ/ބޮލީވުޑްހަންގާމާ
ފިލްމު "ޕިޔާރު ކާ ޕަންޗްނާމާ"އިން 2011 ވަނަ އަހަރު ބޮލީވުޑަށް ތައާރަފްވި ކާތިކް އާއި ބަތަލާ ސާރާ އަލީ ޚާންގެ ސީރިއަސް ލޯބީގެ ގުޅުމެއް އޮތް ކަމަށް މީޑިއާތަކުން ބުނެފައިވާއިރު ދެ ތަރިންގެ ފަރާތުން ވެސް އެކަން ކަށަވަރުކޮށްދީފައެއް ނުވެއެވެ.
ނަމަވެސް ދެ ތަރިން އެކީގައި 2020 ވަނަ އަހަރު ފެނުނު ފިލްމު "ލަވް އާޖްކަލް" ކުޅުނު ދުވަސްވަރު ދެ މީހުންގެ މެދުގައި ލޯބީގެ ގުޅުމެއް އުފެދުނު ކަމަށާއި އެ ގުޅުން ނިމުމަކަށް ހީވެސް ނުކުރާހާ އަވަހަށް ކަމަށް މީޑިއާތަކުން ވަނީ ބުނެފައެވެ.
ކާތިކްގެ މިދިޔަ އަހަރު ދެ ފިލްމަކުން ބެލުންތެރިންނަށް ވަނީ ފެނިފައެވެ. އެއީ ކުޅިވަރުގެ ބައޮޕިކްއެއް ކަމަށްވާ "ޗަންދޫ ޗެމްޕިއަން" އަދި ފިލްމު "ބޫލް ބުލައްޔާ 3"އެވެ.